Job Tɔn 36 - mzwDBL

Elihu wobol naarɛtena

¹ Elihu berɔ ŋɔ,

² “Job, lawɛ bambile tɛ mɛ tama, n ta dɔ waa dɛ́ che Korowii naa ta dɛ́ bol.

³ Mɛɛ baɡle kɛ n dɔ wejema kohona, dɛ́ baɡle kɛ Korowii waa ta mɛ la waa wer.

⁴ Nɛn waa dɔ wejema kohonaa cheɡɛ he sie la, jemɛ kɛrɛdɛ kɛŋɔ maa nyosone teŋe.

⁵ Na ɡɛ Korowii aa kana kohona, waa nomɛlbwa vɛh, o kan dɛ jemɛ wobɛlbwa bini.

⁶ O ta ɡelɛ nyubinikpeɡ tena so dɛɛ biɡri, o bol nyaara waa dɛɛ tɛɛ ba aŋwɛnɛ ta.

⁷ Waa sie laa dɛɛ kpɔ nɛra ba wa aa toɡra nɛ, o ɡelɔ baa do kɛ koranar, dɛɛ dɔ duure saŋ bɛlbwa.

⁸ Dɛ ba lawɛ nɛra do dea, dɛ do ba jɔɡrɔre baa na waa baa ɛa aa,

⁹ Korowii dɛ́ baɡle ba bá wechɔɡa ne ba mbarafo we-ɛɛla.

¹⁰ Korowii dɛ kah ba bá sɛh ba chɔɡre, dɛ́ do ba bá charɛ liire le ba wechɔɡa ta.

¹¹ Dɛ ba no Korowii baa dɛ tomɔ wa aa, ba sie ɛɛ lɛ tɔpera aa ka ba sie taa, ásɛ dɛ so bosɔɔhna ta.

¹² Kɛ dɛ baa no aa, baa kpoo ba keri nee, dɛ ba ta wejema dɔe.

¹³ Nɛra baa wola Korowii tomɛ la dɔ bandia ba bini, dɛ Korowii tɛr ba deŋne kwaraa naa, baa on soŋe ŋɔ ó cha ba.

¹⁴ Ba dɛ serewe ba bonɔɔne saŋ, ba we-ɛɛla ɡelɔ baa dɔ sihihseo seo.

¹⁵ Kɛ banɔ la baa lɔ wenaale ta la, Korowii lɛɛ ba dɛɛ le, o cheɡɛ ba wenaale ta, dɛ bol waa dɛɛ baɡ ba.

¹⁶ Korowii siwi beɡrɔ kɛ ó lawɛ dɛɛ le he wenaale ta, dɛ́ tɛɛ bosɔɔhna, dɛ́ ɡel he dɔ kondikondɛɛɡa kohona dɛɛ di.

¹⁷ Kɛ taraken he dɔ deŋnetɛra ɡɛ aa chɛa kɛ ba kpɔ tɛɛ.

¹⁸ Nyiŋi kɛrɛdɛ nomɛlbwa bɛ kondɔɔh kpɔ neɡre, bɛ ɡel sen yawa ɡole he wa.

¹⁹ He kondɔɔh kɛɛ he kpeɡri haa dɔa bwa, aa won chae.

²⁰ Bɛ too ŋɔ seo ba kpɔe warane, ɡɛ saŋ harɛ nɔ nɛra bwa aa serewe.

²¹ Nyiŋi kɛrɛdɛ dɛ bɛ he te kpɔ jo wechɔɡa ta, a waa Korowii kpɔ wahala ba ta he nɛ.

²² Korowii kpeɡri kan dɛ ɡwaa wobɛlbwa. Umee dɛ won baɡle waa kɛ Korowii ɔ?

²³ Umee dɛ won baɡle Korowii wa, kɛɛ dɛ ŋɔ o ɛ wechɔɡa ɔ?

²⁴ Lii dɛ kpɛɛro kohona o we-ɛɛla wa, ɡɛ nɛra aa ɡo yela kpɛɛro a waa la.

²⁵ Nɛwɛnyina bwa na waa waa ɛa, nɛra che bojaŋ dɛ nyiŋa jeiih ken.

²⁶ Na ɡɛ Korowii aa kana! O kan waa doa ɡwaa nɛn liire ta, nomɛlbwa aa saŋ waa lea do le, ba le fini jemɛ.

²⁷ Onee tɛr nee le harɛ kaa nyundua, dɛ ɡel a berɛ bwaala, dɛ palɛ dɛɛ jo nenabɔɔne ta.

²⁸ Bwaala le baama ta, dɛɛ nɛ kohona nɛwɛnyina bwa nɛ.

²⁹ Umee dɛ́ won jemɛ ɡɛ Korowii aa kpɔ baama bɔle nyundua, o wobol le bwaala kɔra bini bela waa lole nɔ?

³⁰ Na ɡɛ waa ɡela bwaala ɛɛ nyɛɡle nyundua bwa, asɛ dɛ ɡel mpo vile bwa te bir.

³¹ Ken taa o che dɛɛ nyiŋi harɛre nɛra bwa nɛ, dɛɛ tɛɛ ba kondikwaa kohona.

³² Bwaala kɔra kpeɡri lɔ o nɔn ta, dɛ́ won ɡel o ka chiɡ bela bwa waa dɛ nyin.

³³ Bwaala kɔra dɛ tɔ sie ásɛ dompeu teŋɛ, ásɛ nae bwa jemɛ o bala wa.”