Job Tɔn 35 - mzwDBL

Elihu wobol toorotena

¹ Elihu berɔ ŋɔ,

² “Job, he dɛ lii kɛŋɔ waa nɔ toɡraa? He ŋɔ, ‘N Naa Korowii, ɛrɛɛ n bolchɔɡe dii ɛɛ ba wona ɛɛ nɔ?’

³ Kɛ he berɔ ŋɔ Korowii be ŋɔ, ‘Tɔnɔ besoo aa ba dɔe tɛ mɛ, bɔkwaa mɛɛ ba dɔe wechɔɡa maa wola ɛ ta nɔ?’

⁴ N dɛ nyin kɛ n chaŋe, he ne he daamanar baa ja he nɛ.

⁵ Hé nyiŋi nyundua na, hé ha sie nyiŋi jeiih ɡɛ baama aa kaa nyundua.

⁶ Dɛ he ɛ wechɔɡa aa, a dɛ ɛ Korowii waane aa? He wechɔɡa wara aa, bɔkwaa aa ɛo wɔ?

⁷ Dɛ he waa toɡrɔ aa, bɔkwaa aa tɛo wɔ? Korowii aa komɛlbwa lɛ he be.

⁸ He wechɔɡa ɡelɔ nɛra bane ɛɛ na wa, he waa toɡraa, nɛra banee a dɔ tɔnɔ tɛ.

⁹ Ba dɛ fiiɡi nɛra kohona a ɡwaa ba nɛɛ aa, ba dɛ pɛmɛ, ba dɛ wi dɛɛ soŋe nɛn ó lɛɛ ba le kpeɡnɛn la nɔn ta.

¹⁰ Kɛ bɛlbwa aa bol ŋɔ, ‘Leperaa Korowii waa ta mɛ la dɔɔ? Onee dɛɛ larawe nɛn bwara o wenaale ta jwaana.

¹¹ Onee dɛɛ baɡle yaa waa dɛ ɡwaa ɡɛ waa dɛ baɡle kpɔɡ bini ola, dɛ ɡel ya dɔ wejema ɡwaa jumbii.’

¹² Ba dɛ wi aa, Korowii aa ban chaŋe, mbarafo wechɔɡ-ɛɛra aa dɛ ɛ nomanta.

¹³ Kasinteŋ, Korowii aa soŋa baa dɛ soŋo ba wesale ta no, On Waa Ɛ Kpeɡri Bwa Dɔɔ la aa deŋne cheɡɛɛ dɛɛ no ba be.

¹⁴ Job, dɛ ɡɛɛ yaa, ɛrɛɛ Korowii ɛɛ ba he be noe, a ba ɛ kɛŋɔ haa ŋɔa ŋɔ haa on na nɔɔ? He waa chɔ o sie, a chɛ kɛ he lawɛ bambile dɛɛ kpao.

¹⁵ Anɔ la aa jaa, he ŋɔ waa nɛra deŋne tɛr o bandia ne, waa sie do kohona wechɔɡ-ɛɛra be.

¹⁶ Job, he dɛ bol waa pɛɛpɛɛ, haa wola wejema dɔe nomanta, he wobol warɔ.”