Job Tɔn 33 - mzwDBL

¹ Elihu berɔ ŋɔ, “Job, taraken dɛɛ no n be, cheɡ deŋne no wobɛlbwa maa dɛ ba bola.

² N dɛ nyin n bol wa, wobol lɔ n nyoa.

³ Tepoŋ nee mɛɛ ba waa bola, kasinteŋii mɛɛ ba bola.

⁴ Korowii Doma taa o che ta mɛ, On Waa Ɛ Kpeɡri Bwa Dɔɔree hweera do n bini n dɔ mkpa.

⁵ Hɛɛ wonoo waa, chaŋ mɛ, kpɔ he te dɛ́ ba n sie.

⁶ N deno do kɛ hen Korowii sie, teeraa ba kpɔ ma n ɡe.

⁷ A ta chɛ kɛ he ɔm mɛ, kɛɛ mɛɛ fiiɡii.

⁸ N no waa haa bola la n deŋna bini, n no waa hen Job aa bola ŋɔ,

⁹ ‘N waa toɡrɔ, wechɔɡa bɛlbwa toole n nɛ, n do kaih, wobɛlbwa toole n nɛ.

¹⁰ Kɛ Korowii na wechɔɡa n nɛ, o kpɔ mɛ ɛ o dɔm.

¹¹ O do kpɛɛ n nakpale, dɛɛ nyiŋi n vala bini bwa.’

¹² Job, he waa ta kasinteŋ dɔe anɔ ta, Korowii ɡwaa nɛwɛnyini.

¹³ Ɛrɛɛ he bol he waa dɛɛ baɡle Korowii waa wola hen chaŋe nɔɔ?

¹⁴ Korowii dɛ bol waa fini, kere dɛ bol anfala, kɛ nɛn aa liire a ta do.

¹⁵ Deera ne wepila ta jwaana, ɡɛ saŋ nɛn aa chɔ dom kwaraa o kalaŋ ta la,

¹⁶ a taa Korowii bol waa dɛɛ do ba deŋna ta, dɛɛ kah ba ɔmee kohona ɛɛ laɡ ba,

¹⁷ dɛ́ berɛ ba liire le wechɔɡa ɛɛ ta, dɛ́ le ba ne mbarafo ta,

¹⁸ dɛ́ lɛɛ ba le seo nyoa, dɛ́ lɛɛ ba ba bɛ ban kpoo.

¹⁹ Korowii dɛ́ tɛr nɛra deŋne weela ne, ba hoɡa bini bwa ɛɛ wee ba kohona,

²⁰ ásɛ kondikwa aa ba som do, ba pɛla yon le kondikondɛɛɡa ta.

²¹ Ba ɡwaŋɛ, haa won jem ba kpa, dɛ́ ka hoɡa ɡbo.

²² A ka tama ba sewɛ ba huɡ ba, dɛ́ sewɛ kaa lalabwɛ.

²³ Kɛ dɛ nyundua torome balɔ dɛ́ ba cha ba aa, bɛl le kaɡboŋa bini ba dɛ́ ba che tɛɛ ba, dɛ́ baɡle waa aa wera tɛ nɛwɛnyini,

²⁴ dɛ ba na ba sum, dɛ́ ŋɔ Korowii be ŋɔ, ‘Lɛɛ ba le seo nyoa n dɔ kon dɛ́ kpɔ charɛ ba nyu,’

²⁵ ásɛ nɛra ba fa aa ka hoɡa la, bwadabii berɛ do wer kɛŋɔ bechale ken, dɛ́ do kɛŋɔ ba bonɔɔne saŋ.

²⁶ Gɛ nɛra la soŋe Korowii aa, o dɛ na ba sum, ba dɛ tomɛ Korowii silɛɛ ne, Korowii dɛ lɛɛ ba kɛŋɔ ba waa toɡrɔ o be.

²⁷ Asɛ bɛlbwa ba che nɛra baah ta dɛ ŋɔ, ‘N ɛ wechɔɡa, dɛ le waa aa toɡra ta, Korowii ta ɡelɛ n dɔ deŋnetɛra aa chɛ mɛ.

²⁸ O lɛɛ mɛ le seo nyoa, n ta so le dɛɛ na som nɔ.’

²⁹ Korowii ɛ ɡɛ waa nɔ bwa dɛɛ tɛ nɛn kera anɛ, hale kera atoro,

³⁰ dɛ́ lawɔ le seo ta, ó bɛ sewɛ, dɛ́ so mkpa ta silɛɛ ne.

³¹ Job, cheɡ deŋne, ásɛ dɛ no n be, hel, ásɛ n bol wa.

³² Dɛ he dɔ waane dɛ́ bol aa, he chaŋ mɛ, bol wa n jemɛ kɛŋɔ he waa toɡrɔ.

³³ Kɛ dɛ ɡɛ laa aa, no n be, hel, mɛɛ chaɡle wejemaa.”