Job Tɔn 32 - mzwDBL

Elihu wobol

¹ Gɛɛ a do Job daamanar batoro la ɡel o chaŋa, dɛkalkɛ dɛ o dɛ lii kɛ o waa toɡrɔ o ɡbaɡba be.

² Belaa Barakɛl bibaa Elihu, o nabaa sɔne Ram, ba bwa le Bus dea. Elihu baah di Job nɛɛ kɛ waa ŋɔa ŋɔ o waa toɡrɔ ɡwaa Korowii la.

³ O baah di Job daamanar batoro la ɡe nɛ, kɛ baa wola wone ŋɔ Job be ŋɔ o waa ta maɡrɛ la.

⁴ Elihu lawɛ bambile tama mɔɔ dɛ bol waa Job be, dɛkalkɛŋɔ ba ɡwaalo nomonome.

⁵ Waa naa kɛŋɔ nɛra batoro la ta waane dɔe dɛ́ bol Job be la, o baah diu.

⁶ Ate, Barakɛl bibaa Elihu ŋɔ, “Bechalaa men, heyaa nomonome, a waa mɛɛ ɔmɛ kɛ n pili nyoa dɛ́ baɡle waa maa jema he be.

⁷ N liiro kɛŋɔ, ‘Nomonomee chɛ kɛ ba bol wa, ásɛ nɛra baa biɡra ɡe ɛɛ baɡle nɛra wejema.’

⁸ Kɛ Korowii kpɔ o Doma dɛɛ do nɛn bini, On Waa Ɛ Kpeɡri Bwa Dɔɔree hweera dɛɛ tɛo wejema.

⁹ Nɛra baa hwɛɛhra ɡbo laa dɔ wejema, nɛra baa biɡra ɡe ɡbo laa dɛɛ no waa mun.

¹⁰ Anomanta, n ŋɔ, he cheɡ deŋne no n be! N ɡe ɛɛ baɡle heyaa anɔ la maa jema.

¹¹ N tɔ nyoa he bol wa, dɛ no waa haa baɡla, dɛ he dɛ nyin waa dɛ bol,

¹² n cheɡ deŋne kɛrɛdɛ dɛ no he be. Kɛ he bini bɛlbwa ta wone ŋɔ Job be ŋɔ o waa ta maɡrɛ, bɛlbwa ta wone chaŋe waa waa bola.

¹³ He bɛ ŋɔ, ‘Ya na wejema, Korowiirii dɛ ŋɔ o wa aa were, nɛn te laa.’

¹⁴ N laa Job bol waa yaɡɛ, maa he nyoa wobol taa che dɛ́ chaŋo.

¹⁵ Job daamanar batoro la bwara yɔrɔ, ba ta waane dɔe dɛ́ bol, baa jemɛ waa baa bol.

¹⁶ Baa hela nɔ, n kpa tama aa? Baa cheɡa baa wola wobɛlbwa dɔe dɛ́ bol nɔ.

¹⁷ N ɡee bol waa, mɛɛ bol anɔ la maa jemaa.

¹⁸ Wobol su n nyoa, maa won ɡel a ka n tea bini.

¹⁹ Waa su n bini kɛŋɔ loŋ baa do sen o bini dɛ tɔ o nyoa, mɛɛ peroo kɛŋɔ loŋfale, baa do senfala o bini wɛɛ ba pera.

²⁰ A chɛ kɛ n bol wa ásɛ n bwara sɔɔh mɛ, a chɛ kɛ n pili nyoa dɛ́ chaŋe.

²¹ Maa bɛlbwa siebɔree nyiŋi ɡwaa bɛl, maa waa bol dɛɛ fɛrɛ,

²² dɛ n bol waa dɛɛ fɛrɛ aa, Korowii ɛɛ chɔɡ mɛɛ.”