Job Tɔn 31 - mzwDBL

¹ Job berɔ ŋɔ, “N ŋwɛɛrɔ kɛŋɔ maa bitoloo nyiŋi n pɛla dɔɔ.

² Aa do ɡɛ nɔ, bɔkwaa Korowii Waa Ɛ Kpeɡri Bwa Dɔɔ la kpɔ tɛ nɛn dɛ le nyundua ɔ? Bɔkwaa Korowii le cheɡ tɛ nɛn ɔ?

³ O ta kon waa chɔɡ nyubinikpeɡ tena ɛɛ yaa? O ta wenaale ɛɛ tɛ nɛra baa dɛ ɛ wechɔɡa aa?

⁴ Waa n we-ɛɛla jemaa? Waa n naɡale bɛlbwa na naa?

⁵ Dɛ n teŋɛ wepuu ta, kɛɛ dɛ teŋɛ nyosone waa ta naa,

⁶ amɔ Korowii nyiŋi n waa bini, wɛɛ nao kɛŋɔ wechɔɡa bɛlbwa toole n nɛ,

⁷ dɛ n bɛɡɔ le o ŋwɛnɛ la ta, dɛ n siwi ɡelɔ n bambile lawɛ wechɔɡa kɛɛ dɛ n ɛ wechɔɡa dɛ kah doŋa aa,

⁸ amɔ Korowii ɡel nɛra bane di kwaa maa para, dɛ́ ɡel ba fuɡri n koo kondikwa.

⁹ Dɛ n pɛla dɔ haah, kɛɛ dɛ n kaa pɛl n dɔŋ bɛl doonyoa aa,

¹⁰ amɔ Korowii ɡel n haah ka ɛ kondikwaa dɛɛ tɛ baa bɛl, ásɛ dɛ kaa chɔ baala bane habɔɔ.

¹¹ A fe ɛ sihihwa, dɛ ɛ wechɔɡa aa chɛ kɛŋɔ bá bol a waa dɛ́ pa bole.

¹² Aa doo kɛŋɔ nii dɛɛ chɔɡ kwa, dɛ́ kaa n ne seo ta, dɛ́ chɔɡ komɛlbwa maa dɔa.

¹³ Dɛ n ta kasinteŋ bolɛ n bonɔɔna ne toli be, ɡɛ saŋ waa aa lɔ n ne ba baah ta naa,

¹⁴ ɛrɛɛ mɛɛ ba wona ka che Korowii sie nɔ? Bɔkwa waa mɛɛ ba dɔe dɛ́ bol o be n we-ɛɛla waɔ?

¹⁵ Korowii waa ta mɛ do n nya tea bini laa ta ba ɡe aa? O tenten laa ta ya bwa do teene bini naa?

¹⁶ Dɛ n vɛh nyaara pɛla kwaa kpɔe dɛ tɛɛ ba, kɛɛ dɛ ɡel luhaana hwɛɡa ta pɛɛ,

¹⁷ n ɡbosoo kpɔ n kondikwa, n ta bilalbii ane tɛɛ,

¹⁸ kɛ n bonɔɔne saŋ n nyiŋi nyaara nɛɛ kɛŋɔ ba mɛɛ, dɛ nyiŋi luhaahna nɛɛ le n bechale saŋ,

¹⁹ dɛ n na nomɛl waa dɛ ba sewa yal bɛ dɔe wa, kɛɛ nyaa waa wola komɛlbwa dɔe dɛ́ tɔ,

²⁰ o ta andɛɛɡa sweerɛ tɛ mɛ, kɛ maa wola n peera pona kpɔe sɔh yal tɛo,

²¹ kɛɛ dɛ n aah bilalbie dɛ fiiɡu, jema maa jema kɛŋɔ mɛɛ di bole kɔɔto la waa yaa,

²² Kórowii ɡel n nɔɔra kuuɡi, dɛ́ tor le n vam ta.

²³ N ɔmɛ waa Korowii aa ɡel a ba n nɛ, n ɔmɛ o kan waa doa, n ta wone ɛ ɡɛ waa la.

²⁴ Dɛ n fe kpɔ n hwɛɡa dawɛ suuɡaswɛm ta kɛɛ dɛ ŋɔ suuɡaswɛm tenten be kɛŋɔ nɛn ŋɔ, ‘Henee n lɛɛ,’

²⁵ dɛ n fe dɛ hɛɡre n kondɔɔh kohona wa, kɛɛ kwaa maa dɔa,

²⁶ n na ɡɛ wee aa dɛ lɔ dɛɛ chaah bɔr, kɛɛ korobie kaala ne o wer waa doa,

²⁷ a ta wone ɡel n liire berɛ kɛ n sɔh dɛ́ toma, n ta ɡuŋe dɛ kpɔ duure tɛa aa,

²⁸ a ɡe fe ɛ wechɔɡa Korowii be ó bol dɛ́ pa bole, n fe ɛ nɛn n wa aa wola kasinteŋ dɔe, Korowii waa lɔ nyundua be.

²⁹ Dɛ n sie fe lɛ n dɔm wahala waa dɛ na, kɛɛ n bwara sɔɔh mɛ o waa waa dɛ na ta,

³⁰ n ta waa bolɛ dɛ ɛ wechɔɡa, dɛ taahno o sewɛ,

³¹ dɛ n dem nɛra fe ta bolɛ ŋɔ, ‘Umee wola Job nɔn ta ola dɔe chwe kohona kaɔ?’

³² Kɛɛ hɔɔh bɛlbwa ta fɔɡbaah chɔe jwaana, dɛkalkɛ saŋ bɛlbwaa mɛɛ lɛ hɔɔhra n dem,

³³ dɛ n tɔ n wechɔɡa ta ɡɛ bane aa dɛ ɛ, a do n bambile bini,

³⁴ kɛŋɔ maa bol waa nɛra aa bol la wa, asɛ n ɔmɛ mama n lolanar aa mam mɛ waa kohona, n tɔ nyoa n ta buse leɛ.

³⁵ Dɛ n fe dɔ nɛn waa no n wa, n kpɔ n waa bil o sie, Korowii Waa Ɛ Kpeɡri Bwa Dɔɔree dɛ́ chaŋ mɛ, nɛn n ne waa dɔa la, ó chwerɛ waa la.

³⁶ Mɛɛ kpɔa dawɛ n vam ta, dɛ́ kpɔ pi kɛ kooɡbɛrɛ.

³⁷ Mɛɛ baɡle Korowii wobɛlbwa maa ɛa n baŋa pa ásɛ n ba o sie maa wola ɔmɛ.

³⁸ Dɛ n harɛ la dɛ wi n tɛl kɛŋɔ nɛn, o pweeri ɛɛ wi siniire,

³⁹ dɛ n di harɛ la ta kondikwa n ta a kem bɔe, dɛ ɡel harɛ la tena bambile chɔɡ aa,

⁴⁰ ate Korowii ɡel mea a fe aa le la, jabalnadaŋɛre le chiɡ a naa ta, ane ɡe soo siwi aa le la, kpɔɡa le chiɡ a naa ta.” Job nyoa wobol la chiɡo.