Job Tɔn 30 - mzwDBL

¹ Job teŋɔ ŋɔ, “Nɛra maa ɡwaa ba nomonome kwaraa dɛ mam mɛ taraken! Ba mɛɛnanar kwaraa n fe aa wola ban kpɔ, ba ne n nyootena daah n peera.

² Wedɛɛɡa besoo mɛɛ ba dɔe le, a ɡɛ nɛra baa do ken dɛ ɡwɛɡre nɔ be nɔ?

³ Nyaa ne lɔr nomanta, ba lɔ pua hɛŋle ɡbo harɛ ta, dɛ ɡaaɡe dɛɛ nyin kondikwa jwaana.

⁴ Kpɔɡ la binii ba toɡri papooni a bini aa do nyɛɡre, ne dalune a ɛ ba kondikwa.

⁵ Ba doŋi a ɡɛ nɛra la le ba bala bini, dɛɛ moo ba kɛŋɔ ŋwɛɛra ken.

⁶ Nenabɔɔne aa hweehra binii ba ka so, bwea baah ne bɔɔne bini bwa.

⁷ Ba lɔ kpɔɡ bini dɛɛ wi kɛŋɔ ola, dɛ pɛɡle dɔŋa kpɔɡa lɔɡre, ɡɛ aa ɛ ba bwara wɔrɔbe.

⁸ Ba ɛ nɛra ba wa aa wola tɔnɔ dɔe, ba ta sɔna dɔe, ba doŋ ba le harɛ la ta.

⁹ Name, menee ba bibaala kpɔ ɡo yela dɛɛ mamɛ, menee ba kpɔ maɡɛ waa dɛ bol dɛɛ mamɛ.

¹⁰ Ba hah mɛ, baa men bɛne, baa waa haŋre, dɛ ta nentane dɛɛ ta n siebɔr.

¹¹ Korowii aa ɡela n ɡwɛɡre, maa wola won ɛ wobɛlbwa nomanta, ba na mɛ naa, ba dɛ ɛɛ mɛ wobɛlbwa baa dɛ nyin.

¹² Ba yon pɛ nyoa lɔ ba tɔ n nɛɛ dɛɛ yoo mɛ, dɛ doŋ mɛ n chwa dɛɛ kaa, dɛɛ nyin mɛ dɛ́ kpo.

¹³ Ba tɔ mɛ ŋwɛnɛ, dɛ́ dɔ bɔr chɔɡ mɛ, nomɛlbwa toole dɛ́ kah ba.

¹⁴ Ba yoo mɛ kɛŋɔ laa tena aa ku danjwɛɛ dɛ jo ken, dɛ che bela aa peɡra la dɛ wur ba n be.

¹⁵ Ɔmee kohona chole n nɛ, n nyanyini kaa kɛŋɔ peu ken, n kondɔɔh ɡe bwa le n nɔn ta kaa kɛŋɔ bam ken.

¹⁶ N dɛ ba sewa, tɔpere bɛlbwaa mɛɛ na wahala.

¹⁷ N hoɡa bini dɛ chwee mɛ jwaana, n bwara bini wee aa men ɡel bwa.

¹⁸ Korowii hamɛ n baŋa, n batakaare jwereme marɛ n nɛ.

¹⁹ O taɡ mɛ ta kpechɛɡre ta, n do kɛŋɔ teera ne tɔɔ aa wola toole wobɛlbwa bini la.

²⁰ N Naa Korowii, n wio dɛɛ yerɛ kɛ haa men chaŋe, n iro che, kɛ he sie pa n nɛɛ pɛɛpɛɛ.

²¹ He nyu bini kpeɡri n nɛ, dɛɛ yoo mɛ he kpeɡri bwa ne.

²² He laɡ mɛ ir che, dɛ ɡel peu ta dɛ kpɔ mɛ dɛɛ kaa, he vuɡ mɛ dɛɛ ta peukpeɡ bini bobɛlbwa.

²³ N jemɔ kɛŋɔ seo binii hɛɛ kaa n ne, bela haa lea cheɡ nomɛlbwa la.

²⁴ Kpelaa, nɛn waa lɔ wahala ta, dɛ wi dɛɛ nyin nɛn ó chao la, baa on lɔ.

²⁵ N fa ta wie tɛ banɔ la baa lɔ wahala ta naa? N loo fa ta kui tɛ nyaara aa?

²⁶ Kɛ maa dɛɛ hwɛɡɛ wedɛɛɡa ta la, wechɔɡaa mɛɛ dɔ, maa dɛɛ nyin bochaah la, biroo mɛɛ na.

²⁷ N bambile bini dɛ wure, waa ɡel bwa, tɔpere bɛlbwaa wenaale ɛɛ puu mɛ.

²⁸ N lɔ tebinichɔɡ ta saŋ bɛlbwa, maa wɛre bwa, n iro dɛɛ che nɛra baah ta, dɛɛ soŋe kɛ ba cha mɛ.

²⁹ N dɛ wi suna wii kɛŋɔ kalampoŋa kɛɛ taataa aa dɛ si la ken.

³⁰ N bwadabii sie biro dɛɛ sɔle, n bwara bwa wɔrɔbɔ kɛŋɔ kabul aa laɡ mɛ ken.

³¹ N harame n janjela dɛɛ lɔ wii yela, dɛ hoh n kalipe dɛɛ taa wiile.”