Job Tɔn 3 - mzwDBL

Job waa naɡra

¹ Job ne o daamanar aa soɡa yawanyoa habɔɔ la, o taah nyoa tɔpere baa lolɔ.

² O ŋɔ,

³ “Korowii ɡel tɔpere baa lol mɛ o ta ne jwaana la baa kpoŋe n tea la bɛ ba kpa!

⁴ Korowii, ɡel tɔpere la te waa ta kwara, bɛ o waa lii kpa bwa, bɛ ɡel wee le o ta.

⁵ Gel biro o bini aa ɔma tɔ ɡɛ tɔpere la ta, kpɔ baama tɔ o ta o waa le, bochaah bɛ o ta ba kpa bwa.

⁶ Le ɡɛ tɔpere jwaana la le, o bɛ benanyoa bɛlbwa ta ba kpa, a ba ɛ kɛ baa lii o waa.

⁷ Bɛ ɡel ba kpoŋe bie tea a ɡɛ jwaana la ta, bɛ ɡel silɛɛ ɡbɔɡa bɛlbwa le o ta.

⁸ Gel voɡra taah a ɡɛ tɔpere la, nɛra baa won mpo bini oljen waa dɛ tuuɡi harɛ, waa do kɛŋɔ lɛŋɔ yera la.

⁹ Bɛ ɡel o chɔɔlen weweela chaah, bɛ ɡel bɔr chaah a ba ɛ kɛŋɔ wee ɛɛ leo, dɛ́ chaah bɔr o ta.

¹⁰ Taah awola jwaana baa lol mɛ, n ba dɛ baa na wa, dɛɛ di suna o ta nɔ.

¹¹ Ɛrɛɛ maa wola n nya tea bini sewɛ buɡ ta waa lol mɛ laɔ?

¹² Bɔkwaa n nya kpɔ mɛ dawɛ o nakpale ta, kɛɛ dɛ ɔr mɛ elɔ?

¹³ Dɛ n fe sewɔ ɡɛ saŋ aa, n fe chɔ deŋnesɔɔhna ta, dɛɛ onɛ,

¹⁴ n ne koranar ne nomonjena, ba fa aa ma dejena a saŋ la, dɛ so a ta bwa berɛ dimɡbia.

¹⁵ N ne koranar baa kpɔ suuɡaswɛm ne suuɡapoŋa su ba deene dɛ serewe la bwa fe chɔɔ.

¹⁶ Ɛrɛɛ maa wola doe kɛŋɔ bie baa haro ta dɛ huɡo, kɛɛ bechasɔɔhna waa sewa o ta wee nae bwa nɔ?

¹⁷ Lalbɔɔ binii nyubinikpeɡ tena we-ɛɛla ɛɛ tonɛ, nɛra baa ɛ toma koh la ɡe kaa onɛ.

¹⁸ Belaa nɛra baa laɡ ba do deene bwara ɛɛ sɔɔh ba, baa nyɛɡa ne dokpeɡa bɛlbwa na kpa.

¹⁹ Nomonjena ne dansaara bwa lɔ bela, bela te, yom toole o dɔɔ lɔɡa kpa.

²⁰ Ɛrɛɛ Korowii ɡel nɛra ba bwara aa dɛ nyɛɡ so le nɔɔ? Ɛrɛɛ o tɛ banɔ la baa dɛ di suna mkpa nɔɔ?

²¹ Ba pɛla lawɔ kɛ bá sewɛ kɛ baa dɔ, dɛ ɡaaɡe dɛɛ nyinu ɡwaa kondɛɛɡe bɛl waa sɔah,

²² ba sie aa lɛ kɛrɛdɛ, kɛŋɔ ba fe aa sewa ba huɡ ba.

²³ Korowii ɡelɔ baa ba kerekere waa jemɛ, dɛ tɔ ba do bobɛlbwa.

²⁴ Suna dii ber mɛ kondikwa, maa won ɡel pɛma bwa.

²⁵ Waa maa dɛ ɔma kohona, laanee ba n nɛ.

²⁶ N ta deŋnesɔɔhna dɔe, n ta ona dɔe, atane wenaale ɡbo.”