Job Tɔn 28 - mzwDBL

¹ Job berɔ ŋɔ, “Bela baa dɛ kwi suuɡapoŋa lole, bela baa laa doŋa dɛɛ kpɔ suuɡaswɛm ta ɡe do le.

² Harɛ binii ba kwi buni dɛɛ le, dɛ dɔ ayaawa dɛɛ le bwea ane ɡe ta.

³ Nɛra kpɔ kandere jo dɛɛ kaa harɛ bini biro ta, ba kwiu dɛɛ la bojaŋ, dɛɛ nyin bwea ɡɛ kwaa nɔ aa lɔ a ta biro ta bela.

⁴ Ba kwiu dɛɛ la bela nɛn aa wola soɡe bwa, bela nɛn aa wola valɛ dɛɛ la, bela nɛra aa wola toole bwaa baa ɛ toma, ŋwɛɛra taa ba saɡre ɡɛ saŋ dɛ jo kaa kwia.

⁵ Harɛ nɔ taa kondikwa le dɛɛ ba, kɛ o bini ɡe, ba kpɔ nii dɛɛ peɡri bwea la ɡɛ saŋ.

⁶ Bwedɛɛɡa ane a yoɡ aa kpeɡa lɔ bwea la ta, suuɡaswɛm do bwea la men ta.

⁷ Jumbii aa dɛ di ola bɛlbwa aa bela ŋwɛnɛ jemɛ, kɔla siwi ta bela nae bwa.

⁸ Kpɔɡ bini ola ta bela kpɔe bwa, nyujente ta bela laŋɛ bwa.

⁹ Nɛra kwiu dɛ paɡre bwekpeɡa, dɛ kwi bwejena a lɔɡre chɔ.

¹⁰ Ba forɛ bɔɔ bwea la bini, ba siwi ɛɛ na kwaa a yoɡ aa kpeɡa la bwa.

¹¹ Ba nyiŋi neerare nyuune ta, dɛ kpɔ kwaa aa sɔah la ɛɛ le baŋ.

¹² Kɛ leperaa yaa ba wejema nae yɔ? Leperaa waa mun noe ɡe doɔ?

¹³ Nɛwɛnyini aa ɡɛ wejema waa aa hiah jemɛ, haa won nao harɛ nɔ ta.

¹⁴ Haa won na wejema neerare vile ta. Mpo ta ɡe, haa won dɔɔ bela.

¹⁵ Baa won kpɔ suuɡaswɛm tenten yawɔ, kɛɛ dɛ kpɔ ɡɛ suuɡapoŋ tɔɡre aa doa maɡɛ o yoɡ.

¹⁶ Haa won kpɔ suuɡaswɛm koŋkwaa dɔɔ, haa won kpɔ bwedɛɛɡa a yoɡ aa kpeɡa dɔɔ.

¹⁷ Haa won kpɔ suuɡaswɛm kɛɛ diɡi maɡɔ, haa won kpɔ suuɡaswɛm koŋkwaare charɔ.

¹⁸ Bwedɛɛɡa ane a yoɡ aa kpeɡa ta wejema tele, bwedɛɛɡa ane aa ɛ ampoŋa ne answɛɛma dɛɛ nyɛɡle ta on tele.

¹⁹ Ane ɡe a yoɡ aa kpeɡa, ne suuɡaswɛm baa yawa dɛɛ le bojaŋ harɛ ɡba, ta on tele.

²⁰ Amɔ dɛ leperaa wejema leɔ? Lee waa mun noe doɔ?

²¹ O sɔh nɛra ne ola bwa Korowii aa taa, hale jumbii aa dɛ ɡah ɡba.

²² Banɔ la baa lɔ lalabwɛɛ ŋɔ, ‘Tamaa kenii ya no o wa.’

²³ Korowii dɔ o ŋwɛnɛ wejema, o ɡboo jemɛ bela waa lole,

²⁴ dɛkalkɛ o dɛ na harɛ jaɡa bwa, dɛɛ na komɛlbwa waa lɔ o ta.

²⁵ Korowiirii ɡela peu nyoa do kpeɡri, dɛ maɡɛ mpo bini ne,

²⁶ dɛ baɡle ɡɛ saŋ bwaala aa dɛɛ nɛ, dɛ baɡle ŋwɛnɛ bwaala aa kɔr dɛɛ kpɔ o ta.

²⁷ O na wejema kɛŋɔ o waa hiaoh, dɛ na kɛŋɔ o wer, dɛ daahno na.

²⁸ Asɛ Korowii ŋɔ nɛwɛnyini be ŋɔ, ‘N ɔmaa dɛɛ ba ɡela hé dɔ wejema, he ki wechɔɡa ɡe aa, anee waa mun noe.’ ”