Job Tɔn 27 - mzwDBL

¹ Job ta teŋɔ dɛɛ bol o waa la dɛ ŋɔ,

² “N ŋwɛɛ Korowii, waa lole saŋ bɛl bwa, Korowii Waa Ɛ Kpeɡri Bwa Dɔɔ waa wola men kɛrɛdɛ ɛɛ, dɛ ɡel mɛɛ na wahala,

³ n ta aa lɔ mkpa bini, Korowii ta ɡel mɛɛ hwee nɔ,

⁴ maa nyoa pili bol wechɔɡe bɛlbwa, maa nyosonee teŋe.

⁵ Maa won ŋɔ he waa wer, maa sɛh ŋɔ n di bolchɔɡe ka tel kɛŋɔ maa sewa.

⁶ Mɛɛ che toɡra n wa aa toɡra taa kiŋkiŋ maa wola ɡel. N liire aa men bolchɔɡee pa, saŋ bɛlbwa n ta aa soɡe le nɔ.

⁷ Korowii, ɡel n dɔma na ɡɛ wechɔɡ-ɛɛra aa dɛ na, bá na ɡɛ nɛra ba wa aa wola kasinteŋ dɔe aa dɛ na.

⁸ Dɛ Korowii teŋe nɛra baa wola on tomɛ hweera ta naa, bɔkwa hwɛɡaa baa ba dɔe yɔ, dɛ o teŋe ba mkpa ta naa?

⁹ Korowii ɛɛ no ba wii ɡɛ saŋ wenaale aa ba ba nɛɛ yaa?

¹⁰ Ba sie ɛɛ dɛɛ lɛ Korowii Waa Ɛ Kpeɡri Bwa Dɔɔ nɛɛ yaa? Baa dɛɛ soŋe Korowii saŋ bɛlbwaa yaa?

¹¹ Mɛɛ baɡle ɡɛ Korowii kpeɡri aa doa, maa On Waa Ɛ Kpeɡri Bwa Dɔɔ la ŋwɛnɛree kpɔ sɔh heya.

¹² He bwa siwi na ɡɛ waa nɔ. Ɛrɛɛ he ta ɛɛ bol waa aa wola mun dɔe nɔɔ?

¹³ Waa Korowii Waa Ɛ Kpeɡri Bwa Dɔɔ, aa dɛ ba ɡela a pu nyubinikpeɡ ne sikpeɡ tena laanee nɔ.

¹⁴ Ba bii ɛɛ warɔɔ, kɛ baa kpoo ba laa taa, ba naanar aa kondikwaa dɔ di vaɡɛ.

¹⁵ Weechɔɡaa dɛ́ kpoo ba bii ne ba naanar baa ba ka la, ba luhaahna aa ban wi.

¹⁶ A lole kɛ ba dɔ suuɡapoŋ kɛ nee ken, dɛ dɔ yale kohona,

¹⁷ nɛra ba wa aa toɡra laanee dɛ́ tɔ yale la, ásɛ banɔ la wobɛlbwa aa wola toole ba nɛɛ kpɔ suuɡapoŋa la bɔne dɔŋa.

¹⁸ Nyubinikpeɡ tena deene baa maa do kɛŋɔ kon dudul yon sɔh tɔ o nɛɛ la, kɛɛ pata nɛn waa dɛ kpa koo aa doa.

¹⁹ Ba dɛ chɔ kɛ kondɔɔhna, kɛ baa ɡɛɛ ka, ba ne jara dɛ a bwa le ba nɔn ta.

²⁰ Ɔmee dɛ́ piɡ ba kɛŋɔ nee aa sua, peukpeɡ ta dɛ́ ba kpɔ ba kaa jwaana.

²¹ Peu waa le wee leebɔr ta dɛ́ ba kpɔ ba kaa, dɛ́ le ba ne ba deremi ta kaa.

²² Wɛɛ ba taɡ baa ta, waa wola ba nɛɛ sune, ba chwa dɛɛ le o be.

²³ Peu lɔ kpaŋa ta ba nɛɛ kɛ nɛn, ba wechɔɡa wa, o nyoa ɛɛ si dɛ taɡ ba le ba deremi.”