Job Tɔn 26 - mzwDBL

Job wobol

¹ Belaa Job chaŋe Bildad ŋɔ,

² “Na ɡɛ haa cha nɛn waa wola bokpeɡa dɔe! Berɛ na ɡɛ haa lɛ men maa ɡwɛɡraa nɔ!

³ Na jae haa ja nɛn waa wola wejema dɔe! Na ɡɛ haa baɡ mɛ waa mun noe kohona!

⁴ Umee chae he bol ɡɛ waa nɔɔ? Umee tɛɛ liire he bol ɡɛ waa nɔɔ?

⁵ Lala bwara dɛ sa kɛrɛdɛ, banla baa lɔ neerare bini, ne kwaa aa soɡe a bini bwa.

⁶ Lalabwɛɛ chɔ pɛɛ Korowii siwi ta, komɛlbwa toole dɛ́ tɔ o ta waa wola on na.

⁷ Korowii paɡri weekaŋle nyunduabɔr bɔle, bela komɛlbwa aa wola toole, o ta ɡelɛ harɛ saɡɛ komɛlbwa ta o lawɔ kpoŋe.

⁸ Korowiirii vɔrɔwe bwaala nee do o baama bini, kɛ bwaala nee la tɔɡre ɡe aa won baama la pere.

⁹ O kpɔ kon tɔ korobie bwa, dɛ paɡri o baama tɔ o ta.

¹⁰ O pere bochaah le biro ta, o do kɛŋɔ jwɛh dɛ teŋɛ mpo ne nyundua baah.

¹¹ Dɛ Korowii ŋɔ wɛɛ chɔɡ pilare aa lawɛ nyundua kpoŋe laanee yaa, aa yiiɡuu ɔmee lawa.

¹² O cheɡɛ o kpeɡri ta dɛ ɡel mpo ɛɛ vuuɡi, dɛ che o wejema ta chɔɡ mpo bini oljen Rahab.

¹³ O nyoa peuwee ɡela nyundua chaah, o nɔn nee o kpo kontuuɡi damanta waa ɛ harɛkon, dɛ tuuɡa dɛɛ kaa la.

¹⁴ Waa waa ɛa la bini tamaa la, a bini wetama anee ya no. Umee dɛ́ won jemɛ kpela, ɡɛ Korowii kan ne o kpeɡri aa doa ɔ?”