Job Tɔn 24 - mzwDBL

¹ Job berɔ ŋɔ, “Ɛrɛɛ Korowii Waa Ɛ Kpeɡri Bwa Dɔɔ aa wola tɔpere bɛl leɛ cheɡ, dɛ́ bol nɛra waa dɛ́ pa bole ɔ? Nɛra baa dɛ tomɔ la bɛ on na kɛ o dɛ bol wechɔɡ-ɛɛra la wa.

² Nɛra dɛ huɡri bwea baa kpɔa bil harɛ jwɛhre ta, ásɛ ba kwaa do kan, ba ŋwɛ peera ba ja ba kwaa ta, dɛ́ kpɔa dɛɛ la dibɔra.

³ Ba dɛ ŋwɛ bilalbie keeɡo, dɛ́ kpɔ suuɡa kemɛ luhaah, dɛ́ lɛ o nabal cheɡ awɔba.

⁴ Ba dɛ tɔ nyaara ŋwɛnɛ ba wenyina ta, dɛ́ doŋ ba bwa bá chwa ka sɔh.

⁵ Gɛ keeɡore yon do pua hɛŋle ɡbo harɛ ta dɛɛ ɡaaɡe kondikwaa la, ɡɛɛ nyaara la ɡe do, ɡɛ tentenee ba ɡaaɡe nyin kondikwaa dɛɛ tɛ ba bii.

⁶ Kooni aa wola ba kwaa ɛɛ taa baa kuuh kondikwa, dɛ́ ka kuuh daa nɔna nyubinikpeɡ tena kooni ta.

⁷ Ba ta yale dɔe, dɛɛ chɔ dakpaŋ, waa dɛ kpo ba jwaana, komɛlbwa toole ba kpɔ tɔ.

⁸ Bwaalajena nɛo dɛɛ kpo ba bwejena dor, baa wola bobɛlbwa dɔe dɛ jo la, ba yon ka pɛɡle bwea ba bwara wɔrɔbe.

⁹ Ba lɛ bilalbie o taa dɛ ɔr le o nya be, dɛ lɛ nyaa bie ka cheɡ awɔba.

¹⁰ Baa wola yale dɔe nomanta, pɛɛpɛɛ ɡɛɛ baa valɛ, dɛ́ che mea le kooni ta dɛ́ chɔ lɔr.

¹¹ Nyaara la harame nyubinikpeɡ tena noo dɛɛ tɛɛ ba, dɛ harame ba ɡrepo nɔna nee baa kpɔa dɛɛ ɛ sen, kɛ baa ɡel ba nyɔ ane.

¹² Nɛra baa dɛ ba serewa dɛ pɛmɛ bwɛjen la ta, banɔ la baa do ba bola ɡe ɛɛ wi, dɛɛ nyin Korowii ó cha ba, kɛ Korowii laa sie kpɔ ɡɛ wechɔɡ-ɛɛra la nɛ.

¹³ Nɛra bane lole dɛ hah bochaah, baa jemɛ webaŋa valɛ.

¹⁴ Bɔr joɔ waa, dɛ nɛn waa dɛ kpoo nɛra iro, dɛ́ kaa kpoo nɛŋɡwɛɡra ne nyaara, jwaana dɛɛ bɛɛ kɛŋɔ ŋwɛɛ.

¹⁵ Nɛn waa lawɛ nɛra bane haahna dɛɛ chɔ la, dɛ́ kpa kɛŋɔ bɔr bir. O dɛ lii kɛŋɔ, ‘Nomɛlbwa aa men na,’ dɛ́ kpɔ sie sɔh.

¹⁶ Ŋwɛɛra ku deene ɡbeni dɛɛ jo a bini jwaana, kɛ webaŋa dɛ ba tɔ ba te do dea, baa bɔr chaahna nyin dɛ́ kpɔ ɛ wobɛlbwa.

¹⁷ Bɔr biraa, o ber ba webaŋa, ɔmewaa aa lɔ biro ta la man ba.

¹⁸ Nyubinikpeɡ tena la do kɛŋɔ, doŋa aa jaah nee sie, Korowii taah harɛ baa dɔɔ, nomɛlbwa aa ba daa kooni taa la kaa ɛ toma.

¹⁹ Gɛ dombwea yon nyoɡre bɔwɔb kɛɛ hwel saŋ la, ɡɛɛ wechɔɡ-ɛɛra ɡe nyoɡre dɛɛ kaa lalabwɛ.

²⁰ Ba nyare baa lol ba ɡba soh ba wa, dudule di ba ola. Ba dɛ soh nyubinikpeɡ tena la waa kwaraa, ba dɛ do kɛŋɔ daa waa kuuɡa ken.

²¹ Ba fiiɡi hambara ne haahna baa wola bii dɔe, ba ta luhaahna nɛɛ sune.

²² Kɛ Korowii cheɡɛ o kpeɡri ta dɛ chɔɡ kpeɡnɛra, a lole kɛŋɔ ba soɡe le, kɛ ba jemɔ kɛ baa mkpaa dɔ.

²³ Korowii ken ɛɛ ɡeloo ba bwara sɔɔh ba ba soɡa bini, kɛ dɛ o sie lɔ ba we-ɛɛla ta.

²⁴ Nyubinikpeɡ tena la soɡa bini dɛ do wer tamaa bɛl, tamaa ken ɡe dɛ ba kaa harɛ, ba nyanyini tonɛ kɛŋɔ kpɔɡa baa kua dɛ boa a nyoa, dɛ berɛ do kɛŋɔ mea paa aa koma a ka a daa ɡbo la.

²⁵ Dɛ ɡɛ laa aa, umee dɛ won ŋɔ n teŋe nyosone, dɛ́ baɡle kɛ ɡɛ laa waa la doɔ?”