Job Tɔn 23 - mzwDBL

Job chaŋe Elifas

¹ Belaa Job chaŋe Elifas ŋɔ,

² “Hale fini n waa ta kpeɡri dɛ ɡwaa n nɛɛ ja, n pɛma habɔɔ, Korowii ta dɛ tɛr n deŋne.

³ N dɛ nyin kɛ n fe aa na Korowii, dɛ́ na ɡɛ maa ɛ dɛ́ la bela waa soɡa!

⁴ N fe ɛɛ kpɔ n waa bil o sie, dɛ́ bol n waa aa cha mɛ bwa baɡlo.

⁵ N fe ɛɛ nao ɡɛ waa chaŋ mɛ, dɛ́ no waa waa bol baɡ mɛ.

⁶ Korowii ɛɛ che o kpeɡri waa dɔa kohona la taa n ne o tɔŋle waa naa? Akai, waa waa kpɔ dawɛ n nɛ.

⁷ N waa toɡra nomanta, awola mɛɛ kpɔ n waa bil o sie, ó pa mɛ bole dɛ́ lee mɛ ta kwaraa.

⁸ Kɛ n la wee leebɔr aa, o toole bela, n berɔ la wee cholibɔr ɡe aa, maa on na.

⁹ O dɛ ɛ toma weekaŋle nyunduabɔr aa, maa on na. O berɔ do weekaŋle harɛbɔr ɡe aa, n sie aa o nɛɛ dawɛ.

¹⁰ Kɛ o jemɛ ŋwɛnɛ maa dɛ kpɔ o ta, o daah mɛɛ na naa, mɛɛ do werii, kɛŋɔ suuɡaswɛm baa doo nii ta.

¹¹ N dɛ teŋɛ ŋwɛnɛ waa dɛ kpɔ o ta kasinteŋ ta, n dɛ teŋɛ o waa ta, maa bɛlbwa ɡel.

¹² N dɛ teŋɛ o Mmarare waa do mɛ ta, n kpoŋe o nyoa wobol bini, dɛ ɡwaa n wenyina.

¹³ Korowii te, ɡɛ waa doa o den do, nomɛlbwa aa won beɡre waa do o nyoa, anɔ la waa dɛ nyinii wɛɛ ɛ.

¹⁴ Waa waa do mɛ a ta la, anee wɛɛ ba ɡela a ɛ, o ta dɔ a dɔŋa warɛ o be cheɡ mɛ.

¹⁵ A waa ɔmee chole n nɛɛ o sie nɔ, n lii a ɡɛ waa nɔ naa, n dɛ ɔmɔ.

¹⁶ Korowii ɡelɔ n bambile chɔɡ, Korowii Waa Ɛ Kpeɡri Bwa Dɔɔ la ɡelɔ n ɔmɛ.

¹⁷ Kɛ ane a bwa, biro la ta ɡelɛ n ɡel wii, a lole kɛŋɔ biro kohona la ta ɡelɛ mɛɛ na.”