Job Tɔn 22 - mzwDBL

Elifas wobol toorotena

¹ Belaa Elifas, Teman te la ŋɔ Job be ŋɔ,

² “Nɛn waa ɛɛ won dɔ tɔnɔ dɛ tɛ Korowii aa? Nɛn waa jemɛ waa kwaraa la, wɛɛ won ɛ waa á do wer o be naa?

³ Dɛ he waa toɡrɔ aa, Korowii Waa Ɛ Kpeɡri Bwa Dɔɔ dɛ dɔ komɛl, kɛɛ he waa wer aa, a dɔ tɔnɔ dɛɛ tɛ Korowii ɔ?

⁴ Haa dɛ ɔmɛ Korowii waa wɛɛ ba he pwaeh, dɛ́ bol he waa kɛɛ?

⁵ He wechɔɡa laa kana aa? He wechɔɡa ta nyoa dɔe.

⁶ He lɛ he dɔŋ kon cheɡ awɔba pɛɛpɛɛ, he laa o yal wur, o che dakpaŋ.

⁷ He vɔmɛ nɛra nyoɡre aa dɛ kpo ba ne, dɛ vɔmɛ nɛra lɔr aa dɛ kpo ba kondikwa,

⁸ a lole kɛŋɔ he dɔ kpeɡri dɛ dɔ harɛ, dɛ dɔ jirima dɛ so o ta.

⁹ He doŋi luhaahna ba kaa nɔŋɡbala ne, dɛ fiiɡi bilalbii ɡe.

¹⁰ A waa nafuɡere bare cheme, asɛ ɔmee den su he bwa la.

¹¹ A waa a do kɛŋɔ bɔr biro ta he nɛɛ haa wola na, a do kɛ nee suu tɔ he nɛɛ la.

¹² Nyundujaɡla laa Korowii do aa? Dɛ ba sie ne harɛ dɛɛ nyiŋi weweela a ɡe aa lɔ nyundua aa?

¹³ Kɛ he ŋɔ, ‘Bɔkwaa Korowii jemɔɔ? Wɛɛ do biro nɔ taa dɛ́ bol nɛra waa dɛ́ pa bole aa?

¹⁴ Baama aa kana tɔ o nɛ, dɛ ɡel waa yaa na. O lɔ nyundujaɡla ne harɛ baah ta dɛɛ valɛ.’

¹⁵ Hɛɛ soo kɛŋɔ saŋ la tena aa? Gɛ wechɔɡ-ɛɛra fa aa soɡa la aa?

¹⁶ Ba serewɔ mɔɔ ba saŋ tel, kɛŋɔ nee yon su ba bɔle deene ta la.

¹⁷ Ba ŋɔ Korowii be ŋɔ, ‘Gel yaa! Bɔkwaa hen Haa Ɛ Kpeɡri Bwa Dɔɔ ɛɛ ba wona ɛ yaa ɔ?’

¹⁸ Kɛ Onee tɛɛ ba kondɛɛɡa a su ba deene, anomanta, n laa n te kpɔ wechɔɡ-ɛɛra liire la ta.

¹⁹ Nɛra ba wa aa toɡra na ɡɛ wechɔɡ-ɛɛra aa dɛ ba chɔɡa ba sie lɛ, nɛra wobɛlbwa aa wola toole ba nɛɛ dɛ mam ba ŋɔ,

²⁰ ‘Kpelaa, Korowii chɔɡ ya dɔma, asɛ nii fuh ba kondɔɔh bwa.’

²¹ Job, kpɔ he te tɛ Korowii, ásɛ he bwara sɔɔhne, he ɛ ɡɛ naa, wobɛlbwa ɛɛ do werii tɛɛ.

²² No waa waa dɛ doe a ta, dɛ́ kpɔa do he nyu bini.

²³ Dɛ he berɔ ba Korowii Waa Ɛ Kpeɡri Bwa Dɔɔ la be naa, wɛɛ lɛɛ. Dɛ he laa wechɔɡa kpɔ bela haa soɡa,

²⁴ dɛ pa he suuɡaswɛm ta bomboɡ ta, ne he suuɡaswɛm tenten ta bwea aa lɔ nenabɔɔne aa hweehra baah ta,

²⁵ ásɛ Korowii Waa Ɛ Kpeɡri Bwa Dɔɔ la do kɛŋɔ suuɡaswɛm, ne suuɡapoŋ kohona tɛɛ.

²⁶ Anee dɛ́ ɡel he sie lɛ o nɛɛ kohona, ásɛ he won dɛɛ tomɔ bambidɛɛɡe ne.

²⁷ Hɛɛ wiu noo ásɛ o no he be, hɛɛ baɡɔɔ nyoa dɛ́ won teŋɛ a ta.

²⁸ Waa haa dɛ lii ŋɔ hɛɛ ɛo ɛɛ do werii tɛɛ, he ŋwɛnɛre bwa chaah.

²⁹ Dɛ nɛn lɔ harɛ naa, hé soŋe Korowii tɛo ŋɔ ó lawɔ ir, o dɛ lɛ banɔ la baa dɛ pwɛr ba te.

³⁰ Nɛn wobɛlbwa aa wola toole o nɛɛ kwaraa la, Korowii ɛɛ lɛo, wɛɛ che he tepoŋ haa dɔa la taa dɛ lɛo.”