Job Tɔn 21 - mzwDBL

Job wobol

¹ Ate, Job chaŋe ŋɔ,

² “N dɛ soŋe heya, hé cheɡ deŋne no waa maa dɛ ba bola nɔ, dɛ he ɛ ɡɛ naa, aa larawe n bwaraa.

³ Hé tɛ mɛ ŋwɛnɛ, ásɛ n bol n wa, ásɛ n tonɔ mɔɔ naa, hé mam mɛ.

⁴ Nɛn siee n kpɔ waa dɛɛ bil aa? Ɛrɛɛ chɛ kɛ ń lawɛ bambile ɔ?

⁵ Hé nyiŋ mɛ asɛ he bwara yɔr, dɛ́ kpɔ nɔɔra sawɛ nyoo.

⁶ N lii waa aa puu mɛ nɔ naa, dɛ ɔmee laɡ mɛ taeh, n bwara bwa ɛɛ sa.

⁷ Ɛrɛɛ Korowii ɡel nyubinikpeɡ tena so biɡri, dɛ hwɛɛh dɛɛ dɔ ba te nɔɔ?

⁸ Ba dɛ dɔ bii ne naanar, dɛ́ so ba kpeɡ ba siwi ta.

⁹ Ba soɡe deŋnesɔɔhna ta ba deremi, baa wola ɔmɛ, Korowii aa ba deŋne tɛr.

¹⁰ Ba nabala dɛ jwee, ba naneene loɡle, aa harɛ dɛɛ ta.

¹¹ Nyubinikpeɡ tena la ɡelɔ ba bii ɛɛ le, dɛ́ do bobɛlbwa dɛɛ hɛlɛ dɛɛ jah kɛŋɔ pebiiri ken.

¹² Ba yiiɡi kwaa dɛɛ lɔ janjela ba bii ɛɛ sa, ba bii no kalipe sii ba sie lɛ kohona.

¹³ Gɛ nɛra la dɛ́ dɔ kondɔɔh ba soɡa bini bwa, dɛ yon sewɛ deŋnesɔɔhna ta, bá huɡ ba.

¹⁴ Ane a bwa, ba dɛ bol Korowii be ŋɔ, ‘Gel ya so ya soɡa jeiih ken! Yaa he waa la nyin dɛɛ teŋɛ a ta.

¹⁵ Umee Korowii Waa Ɛ Kpeɡri Bwa Dɔɔ ya tomɔ wɔ? Bɔkwa tɔnɔɔ yaa ba dɔe le Korowii soŋa ta nɔ?’

¹⁶ Ba wer doe toole ba ɡbaɡba be, anomanta, n ne ba toole wobɛlbwa bini.

¹⁷ Korowii ɡelɔ nyubinikpeɡ tena piɡri dɛɛ sewaa? Wekpeɡa toolo dɛɛ ba ba nɛ aa? Korowii baah diu o tɛr nɛnchɔɡe deŋne bwa naa?

¹⁸ Ba do kɛŋɔ kpɔɡhole peu kpɔa ba kaa la aa? Kɛɛ haahra dompeu kpɔ ba kaa. Akai!

¹⁹ He bolɔ ŋɔ, ‘Korowii kwaa mɛɛ wechɔɡa dɛɛ cheɡ o bie.’ Korowii tɛr mɛɛ la ɡbaɡba deŋne o wechɔɡa la waa o na.

²⁰ Gel wechɔɡ-ɛɛ la ɡbabir na o deŋnetɛra waa dɛ ba dɔe, dɛ́ nyɔ Korowii Waa Ɛ Kpeɡri Bwa Dɔɔ la danana ne.

²¹ O waane laa bii waa ta ba habɔɔ wa, ɡɛ saŋ o tɔpera aa ba su dɛ ba a jaɡa la.

²² Nomɛl ɛɛ won baɡle Korowii wa aa? Onee dɛɛ bol hale nomonjena wa.

²³ Nomɛl dɛ́ sewɛ dɛ o bwara ta kpeɡri kohona, ɡɛ saŋ o bwara aa sɔɔhno o dɔ bosɔɔhna,

²⁴ o bwadabii dɛ́ do wer kɛrɛdɛ, o hoɡa bini ɡe do kpeɡri.

²⁵ Nomɛl ɡe dɛ́ sewɛ sum ne, o ta som bɛlbwa nae bwa.

²⁶ Ba bwa dɛ́ sewɛ baa huɡ ba, ásɛ kwaa di ba ola.

²⁷ N jemɛ waa bwa aa lɔ hé liire bini, ne liichɔɡa haa liira dɛɛ tɛ mɛ bwa wa.

²⁸ He dɛ bɔɔ ŋɔ, ‘Leperaa nɛnjena la nɛra, ba fa aa ɛ nyubinikpeɡ tena deremi, ba fa aa soɡe a bini la dɔɔ?’

²⁹ He ta vavala la bɔɔrɛ kɛɛ? He ta waa baa baa bol noɛ kɛɛ?

³⁰ Korowii laa wechɔɡ-ɛɛra daa le, awola waa ba tɛr nɛra deŋne, wɛɛ ɡel ba tenee awola waa ba kembɔr ne la.

³¹ Umee dɛ́ won bol wechɔɡ-ɛɛra waa baa ɛa ba be nɔ? Waa baa dɛ ɛ la, umee dɛ́ won bɔ ba ba we-ɛɛla kem ɔ?

³² Ba te la, ba dɛ la ka huɡ ba, nɛra dɛ daah ba ŋwama,

³³ nɛnlaa tenten dɛ teŋɛ ba nɛɛ kaa ba huɡribɔr, ásɛ teera tɔ ba nɛ, ba chɔ jeiih ken.

³⁴ He te, waa aa wola mun dɔe he bol dɛɛ larawe n bwara, he wobol bwa ɛ nyosone.”