Job Tɔn 20 - mzwDBL

Sofar wobol nɛɛtena

¹ Ate, Sofar Naama te la chaŋe Job ŋɔ,

² “Waa la ha mɛ asɛ n piɡri chaŋe, n liire ɛɛ mɛ kɛŋɔ ń chaŋe.

³ N no waa haa bola la a ɛ chɛɡa, kɛ n jemɛ ɡɛ maa chaŋe.

⁴ He ɡbabir jemɛ ɡɛ aa doa dɛ le mumpar, dɛ le ɡɛ saŋ Korowii aa ta nɛwɛnyini o ba so harɛ nɔ ta,

⁵ nyubinikpeɡ tena silɛɛ aa biɡri, nɛra baa wola Korowii jemɛ dɔ silɛɛ, kɛ aa ɡɛɛ ka.

⁶ Ba dɛ ɛ mbarafo dɛɛ ɡɔɔ ba te, ba nyu kaa leɡe baama ta,

⁷ baa nyoɡro kwaraa kɛŋɔ peu aa kpɔ tutuɡ kaa la, ásɛ nɛra baa na ba ka la ɛɛ pɛɛ ŋɔ, ‘Leperaa ba dɔɔ?’

⁸ Hɛɛ na baa fini, kere dɛ ba toole kpa kɛŋɔ deera ken, kɛŋɔ wepila haa naa jwaana, haa wola an na kpa la.

⁹ Nɛra ba fa aa na ba la aa ban na kpa, bela ba fa aa soɡa la.

¹⁰ Ba ɡbabir biirii chɛ kɛ bá bɔ kwaa baa lɛa le nyaara be la, ba ɡbabirii dɛ́ berɛ kwaa baa lɛa la tɛ a tena.

¹¹ Ba bonɔɔne saŋ bokpeɡa la, ba ne anee dɛ́ ka chɔ teera bini.

¹² A do kɛŋɔ wechɔɡa aa ɛ kontora ba nyoa bini ken, asɛ ba kpɔ do ba kaŋa bini dɛɛ moɡra,

¹³ ba ɡelɔ a do bela biɡri, a som la nomanta, a yon ka do ba kaŋa bini.

¹⁴ Kondikwa aa jo ba tea bini la, ɛɛ do kpelii kɛŋɔ tɛɡchɔɡa ken.

¹⁵ Nɛra kondɔɔh nyubinikpeɡ tena aa lɛa la, Korowii ɛɛ ɡeloo ba uɡe a bwa.

¹⁶ Kwaa nyubinikpeɡ tena aa lɛa la do kɛŋɔ tɛɡchɔɡa ken, aa kpoo baa kɛ harɛ aa kpɔ ba ken.

¹⁷ Baa kondikwaa ne sen Korowii aa sweera tɛɛ ba laanee dɔ kohona, a warɛ kɛŋɔ nee aa sua la.

¹⁸ Komɛlbwa baa ɛ toma dɔ la, baa bera tɛ, kwaa baa koah dɔ la, baa dɔ di,

¹⁹ dɛkalkɛ ba fiiɡi nyaara dɛ vɛɛh ba, dɛ lɛ deene ba laa maa.

²⁰ Ba siwi aa komɛlbwa su, kwaa baa lɛa cheɡ la, bɛlbwa aa won lɛɛ ba.

²¹ Ba lɛ nɛra kondɔɔh ba be a tonaa, anɔ la baa lea cheɡ ba be la ɡe ɛɛ le ba nɔn taa.

²² Nyubinikpeɡ tena la aa ba dɔ kwaa kohona la, a taa wenaale ɛɛ ba ba nɛɛ bala, nɛra baa di suna la waa ɛɛ ka dawɛ ba nɛɛ taeh.

²³ Korowii ɛɛ kpɔ o bandia kohonaa ba ba nɛ, dɛ́ tɛr ba deŋne, saŋ ba ta aa lɔ kwaa la ta dɛɛ di la.

²⁴ Ba chwao le dɔmkon baa kpɔ buni ɛo nyoa aa, hɛm o nyoa aa ɛ ayaawaa dɛɛ ba ba yaɡa dɛ́ kpoo ba.

²⁵ Hɛma la ɛɛ yaɡ baa dɛ vah le, a nyoo aa dɛ nyɛɡle la yaɡɛ dɛ che ba pwɛ ta le. Ɔmee kohona ɛɛ chole ba nɛɛ,

²⁶ komɛlbwa baa dɔa nyoɡre biro ta, nii nɛn aa wola an marɛ, ba fuh ba ne ba haahna ne bii bwa.

²⁷ Nyundua ne harɛ, ɛɛ lee baa tɛ kɛŋɔ ba ɛ wechɔɡa.

²⁸ Ba kondɔɔh bwa ɛɛ chɔɡoo, awola Korowii baah aa di kohona, kɛŋɔ nee aa sua dɛ yon kpɔ komɛlbwa kaa la.

²⁹ Waa Korowii aa lea cheɡ nyubinikpeɡ tena laanee la, ɡɛɛ baa ba nae.”