Job Tɔn 2 - mzwDBL

Job nɛɛtena daahna dɛ́ na

¹ Awola bɛl ɡe ja, nyundua toroma la baa cheme Korowii sie, dɛ Bɔnsam ɡe ja bɛl.

² Anee Korowii pɛɛ Bɔnsam ŋɔ, “Leperaa he le dɛ ba nɔ?” O ŋɔ, “Gaaɡaa n do harɛ nɔ ta dɛ ɡaaɡe la dɛɛ ba.”

³ Ate, Korowii ŋɔ o be ŋɔ, “Ɛrɛɛ he na n bonɔɔ Job waɔ? Nomɛlbwa toole o waa toɡre kɛ on harɛ nɔ ta, wechɔɡe bɛlbwa toole o nɛ, o dɛ tom mɛ, dɛ laa o te dɛɛ kpɔ wechɔɡa ta. He ba n be ŋɔ n tɛɛ ŋwɛnɛ he ka chɔɡo, dɛ o ta waane ɛɛ, kɛ ane a bwa, o waa ta toɡrɔ.”

⁴ Bɔnsam chaŋe Korowii ŋɔ, “Nɛn dɛ nyin o nyu aa, wɛɛ won kpɔ kwaa waa dɔa bwa charɛ.

⁵ Lɔɔ bil weela ta dɛ́ na, dɛ waa hen taah he na naa.”

⁶ Belaa Korowii ŋɔ Bɔnsam be ŋɔ, “A wer ɡa, n kpɔɔ do he nɔn ta, kɛ na kɛ haa on kpo.”

⁷ Anomanta, Bɔnsam le Korowii be bela dɛ ka kpɔ ŋwɛrchɔɡa ta Job nɛ, le o nyu ta ba ta o napaala ta.

⁸ Asɛ Job ka so tɔɔ ta a baɡle kɛ o loo kuu, dɛ kpɔ kaŋli dɛɛ paa ŋwɛra la.

⁹ Job haah ŋɔ o be ŋɔ, “He ta lɔ toɡra he wa aa toɡra la ta naa? Taah Korowii dɛ́ sewɛ!”

¹⁰ Asɛ Job chaŋo ŋɔ, “He dɛ bol ɡɛnewobol. Wedɛɛɡa ɡboo yaa ba dɔe le Korowii be, yaa wola wechɔɡa tenee dɔ aa?” A ɡɛ waa nɔ bwa ta la, o ta waa bolɛ yaɡɛ Korowii bwa.

Job daamanar batoro wa

¹¹ Dɛ Job dɔ daamanar batoro bane. Bɛlee Teman te Elifas, ne Bildad waa le Su harɛ ta, dɛ Sofar o ɡe aa le Naama harɛ ta. Ba no wahala waa dɛ na la, dɛ ka cheme, dɛ bwa sɛh kɛŋɔ baa lao, dɛ́ ka bwɛɛlo.

¹² O daamanar la aa dɛ ba, dɛ che bojaŋ nao la, ba ta on jemɛ. Ba wio kohona, dɛ laa ba laala kɛɛ, dɛ ɛ tɔɔ do ba nyuune ta, a baɡle kɛ ba loo kuu.

¹³ Ba ne o soɡe harɛpɛɛ, chɔɔ ne jwaana, tɔpera anuanɛ. Bɛlbwa ta waa o be bolɛ, dɛkalkɛ dɛ ba na ɡɛ o bwara aa dɛ nyɛɡ.