Job Tɔn 19 - mzwDBL

Job chaŋe Bildad

¹ Ate, Job chaŋe Bildad ŋɔ,

² “Saŋ besoo hɛɛ ba ɡela n bambile sɔɔh mɛ nɔ?

³ Saŋ bɛlbwaa hɛɛ chɛɡ mɛ, sihiih aa heyaa kpo ɡɛ haa dɛ sopa mɛ nɔ naa?

⁴ Dɛ n ɛ wechɔɡa kwaraa naa, he waane laa, n nɛɛ a dawɛ.

⁵ He dɛ lii kɛ he ɡwaa mɛ, dɛɛ lii kɛŋɔ n wechɔɡaa ɡela mɛɛ na wa.

⁶ Hé jemɛ kɛŋɔ Korowiirii ɡela wenaale nɔ ba n nɛ, o harɛ bel dɛ laɡ mɛ.

⁷ N wio dɛɛ nyin nomɛl ó ba lɛɛ mɛ le n wenaale nɔ ta, n do lɔŋɔ, kɛ kasinteŋ te bɛlbwa toole dɛ́ chaŋ mɛ.

⁸ Korowii tɔ mɛ ŋwɛnɛ, n ta bɔr dɔe dɛ́ kpɔ, o ɡelɔ n ka biro ta dɛɛ nyin bɔr dɛ kaa.

⁹ O laa n wer doe bwa kpɔ n nɛ, dɛ ɡel n paŋɛ n jirima waa lɔ n nɛɛ kɛŋɔ kooɡbɛrɛ la.

¹⁰ O chɔɡ mɛ kɛŋɔ baa kuuɡi dea ta ken, dɛ ɡel n hwɛɡa bwa tonɛ, kɛ baa huɡri daa ta la ken.

¹¹ O baah dɛ di n nɛɛ kohona, wɛɛ yoo mɛ kɛ o dɔm ken.

¹² O ɡelɔ o laa tena lɔ ba tɔ n nɛɛ dɛɛ yoo mɛ, ba ma kwaa dɛ che a ta bar mɛ cheme, ba vɔrɔwe ba sobɔra bar n dea.

¹³ Korowii ɡelɔ n ne n lolanar baah do jaŋne, n berɛ hɔɔh nɛra baa jem mɛ be.

¹⁴ N lolanar bwa chwa mɛ, n daamanar soh n wa.

¹⁵ Nɛra baa soɡe n dem ne n toli dɛ lii mɛ hɔɔh, n berɛ nɛŋhɔɔh ba siwi ta.

¹⁶ N yerɛ n bonɔɔ o ta men chaŋɛ, hale n soŋo ŋɔ ó cha mɛ.

¹⁷ N haah naa n hweera sɔɔh nyin dɛ́ no, n dɔɔranar ne n nimanar aa n jwɛɛh bala nyin.

¹⁸ Bechale ɡba dɛ nyiŋi n nyubaah, ba na mɛ naa, ba dɛ mam mɛ.

¹⁹ N daamanar tenten kii mɛ, nɛra maa dɛ nyin ba berɛ habɔɔ kpo mɛ.

²⁰ N bwadabii tonɔ a ka n hoɡa ɡbo, a ka tama n fee sewɛ.

²¹ N daamanar, hé dɔ tedoma tɛ mɛ, Korowiirii lɔ mɛ bil.

²² Ɛrɛɛ he che n nɛɛ ɡɛ Korowii aa ɡela aa noo mɛ nɔɔ? Ɛrɛɛ hɛɛ ha mɛ ɡɛ nɔɔ?

²³ N dɛ nyin kɛ nomɛl fee lii n waa nɔ, dɛ́ chwera do tɔn bini,

²⁴ kɛɛ ba fee kpɔ buni ɛa dawɛ bwe ta, á do le saŋ bɛlbwa.

²⁵ N jemɔ kɛŋɔ n Lɛɛ lole, waa bwa jaɡa saŋ la, wɛɛ ba harɛ nɔ taa, dɛ́ ba bol n waa tɛ mɛ.

²⁶ Weela nɔ aa chɔɡ n bwadabii nɔ habɔɔ n ta do le nɔ, mɛɛ na Korowiirii.

²⁷ N ɡbabir ɛɛ nao siwi nee, nomɛl laa dɛɛ ba o nae, n sie cheɡɛ chiŋ o wa.

²⁸ Dɛ he ŋɔ, ‘Ŋwɛnɛ besoo taa yaa ba wona ɡel o bwara nyɛɡo wɔ?’ Hé dɛ nyin ŋwɛnɛ haa kpɔ o ta dɛ́ ha mɛ.

²⁹ A chɛ kɛ he ɡbabir ɔmɛ Korowii tokobi dɛ o baah diu waa, ó kpɔ dɛɛ tɛr nɛra deŋne, ásɛ he jemɛ kɛŋɔ nomɛl lole dɛ bol waa dɛɛ pa bole.”