Job Tɔn 18 - mzwDBL

Bildad wobol nɛɛtena

¹ Anee Bildad, Su te la chaŋe Job ŋɔ,

² “Saŋ besoo he wobobala nɔ ɛɛ ba tona ɔ? Tɔ nyoa ya ɡe bol ane.

³ Ɛrɛɛ hɛɛ lii yaa kɛ ola nɔɔ? He dɛ lii kɛ ya ɡɛnɔ kɛɛ?

⁴ He kpɔ bandia dɛɛ chɔɡ he wa. He bandia nomanta, Korowii chɔɡ harɛ kɛɛ dɛ huɡri bwejena le a chebɔra aa?

⁵ Wechɔɡ-ɛɛra kandea ɛɛ dimoo, wɛɛ ɡel hɔe.

⁶ Kandere aa lɔ ba deenee ɛɛ dimoo, bɔr bir ta ba nɛ.

⁷ Ba vala bini fa kpeɡri, kɛ a sɔɔhnɔ, jae baa dɛ ja nɛra bane la ɡelɔ ba ɡbabir chole.

⁸ Ba ɡbaɡba soɡa bini we-ɛɛla dɛ laɡ ba kɛŋɔ bel ken, ba valɛ kaa jo o ta.

⁹ Bel la dɛ lawɛ ba nalurumi, dɛ kpoŋe ba bini kiŋkiŋ.

¹⁰ Ba harɛ bel ba ŋwɛnɛ ta, o chɔ dɛɛ kpaa ba.

¹¹ Kwaa aa dɛ aah ba ɛɛ bar baa cheme, dɛ ti ba dɛɛ di ba nafeena.

¹² Ba fa dɔ kwa, taraken lɔr dɛ kpo ba. Wekpeɡa chɔ le dɛɛ kpaa ba.

¹³ Weechɔɡa ɡboo ba bwadabi, a ɡelɔ ba nɔɔra ne nakpale bwa pɔh.

¹⁴ Seo kpɔ ba le bela baa soɡa ba bwara sɔɔh ba, dɛ kaa ba ne lalabwɛ.

¹⁵ Nomɛlbwa waa dɛ nyin o ka so ba deene la ta ɛɛ won ka so, kɛ bá kpɔ jebɔrɔwe merɛ a bwa bini mɔɔ.

¹⁶ Ba do kɛ daa waa sewa le o lune ta ka ta o kpala ta.

¹⁷ Nomɛlbwa aa ba waa lii harɛ nɔ ta ba sɔna he kwaraa.

¹⁸ Korowii ɛɛ ɡeloo ba dɔma doŋ baa le harɛ nɔ ta, dɛ́ le bochaah ta kaa biro ta.

¹⁹ Baa bii kɛɛ naanaree dɔ, ba dwee bɛlbwa aa ka.

²⁰ Nɛra baa le wee leebɔr, dɛ ka tel wee cholibɔr tena nɛ ɛɛ no ba waa, ásɛ ɔmee chole ba nɛɛ kohona baa chel.

²¹ Gɛ aa dɛ ba wechɔɡ-ɛɛra nɛɛ chiɡa laanee la, nɛra baa wola Korowii tomɛ la.”