Job Tɔn 17 - mzwDBL

¹ Job berɔ ŋɔ Korowii be ŋɔ, “Maa won hwee kɛrɛdɛ kpa, n seo tɔpere telo tonɛ, lalbɔɔ ɡbosoo kaa dɛ chɔ kpaa mɛ.

² Nɛra bwa dɛ mam mɛ, n dɛ na ɡɛ ba sie aa beɡra baa muɡli n baah.

³ N Naa Korowii, he ɡbabir ba che tɛ mɛ nɔ. Umee lole dɛ́ ba che n habɔɔ?

⁴ He kpɔ waa mun noe sɔɔh ba, haa ɡel ba di bole n nɛ.

⁵ Gɛ baa dɛ sɛɡle ŋɔ, Dɛ nomɛl le o daamanar tɛ dɛ lɛ komɛl aa, naate la biirii dɛ́ na a waa la.

⁶ Gɛɛ nɛra kpɔ sɛɡla nɔ dɛɛ bol n wa, nɛra lawɛ n sie dɛɛ teɡɛ harɛ.

⁷ Suna dii ɡelɔ maa na kɛrɛdɛ n nɔɔra ne nakpale ɡwaŋre, dɛ do kɛŋɔ dawii ken.

⁸ Nɛra ba wa aa toɡra bwara yɔrɔ a wa, dɛɛ pwaah mɛ ŋɔ maa Korowii tomɛ.

⁹ Kɛ ane a bwa, nɛra ba wa aa toɡra la ɛɛ teŋɔɔ dɛ́ do ɡɛ dɛɛ la, dɛ́ teŋɛ dɔ bokpeɡa saŋ bɛlbwa.

¹⁰ Dɛ ba bwa berɔ ba dɛ ba che n sie naa, maa ba bini bɛlbwaa na kɛ o ɛ wejereme.

¹¹ N soɡa bini tɔpera tonɔ, n waa maa maɡla bil ɡe chɔɡ, n hwɛɡa ɡe tonɛ.

¹² N daamanar kpɔ jwaana berɛ webaŋa bɔr joɔ ɡe aa ba ŋɔ, ‘A ka tama bɔr chaah.’

¹³ N hwɛɡa bwa lɔ lalabwɛ, belaa mɛɛ ba n kalaŋ pae dɛ́ chɔ biro ta.

¹⁴ Ásɛ n ŋɔ lalbɔɔ be ŋɔ, ‘N mɛɛ hen,’ dɛ́ ŋɔ dudule ɡe be ŋɔ, ‘Heyaa n nya ne n nimambii.’

¹⁵ Dɛ lee n hwɛɡa dɔɔ jaɔ? Waa n sie aa dawɛ a ta la, umee dɛ́ na nɔ?

¹⁶ Waa maa dɛ hwɛɡɛ a ta la, n ne aa lalabwɛɛ kaa.”