Job Tɔn 16 - mzwDBL

Job chaŋe Elifas

¹ Anee Job chaŋe Elifas ŋɔ,

² “N no waa nɔ dɔŋa bwa ka, he berɔ dɛɛ chwee n ŋwɛr kwara.

³ He wobojaŋa nɔ aa tonɛ bwa, bɔkwa waa dɛɛ ha heyaa hɛɛ bol ɡɛ waa nɔ n be nɔɔ?

⁴ Dɛ he fe do ɡɛ maa doa nɔ, n ɡe do ɡɛ haa doa nɔ naa, n fe ɛɛ bol waa ɡwaa heya he kwaa la berɛ dɔ wesoma.

⁵ Kɛ n nyoa wobol ɛɛ won tɛ heyaa bokpeɡa, dɛ́ tɛ heyaa bosɔɔhna.

⁶ Wobɛlbwa toole ń bol a cha mɛ, n tɔ nyoa ɡe aa, n weweele nyoa aa sɔɔh.

⁷ N Naa Korowii, he ɡelɔ n bokpeɡa tonɛ, dɛ kpoo n dem tena bwa.

⁸ He laɡ mɛ dɛ ɛɛ mɛ dɔm, n ɡwaŋɔ dɛ ka hoɡa ɡbo nɛra cheɡɛ ɡɛ ta, dɛ pa mɛ bolchɔɡe.

⁹ He toɡri n bini bandia ne kɛ kpɔɡ bini ol ken. He hah mɛ dɛ fome siwi pa n nɛ.

¹⁰ Nɛra dɛ muɡli n baah ba dɛ warɛ dɛ bar mɛ cheme, dɛɛ kpaa n lwɛrɛme.

¹¹ Korowii kpɔ mɛ do wechɔɡ-ɛɛra nɔn ta, o taɡ mɛ ta ba bini.

¹² N fa soɡe deŋnesɔɔhna ta, Korowii den ba hamɛ n baŋa dɛ taɡ mɛ ta harɛ. O kpɔ mɛ dɛɛ hweli hɛm tae.

¹³ O ta hɛma le bobɛlbwa dɛɛ yaɡ mɛ, hɛma la yaɡ mɛ dɛɛ vah. O ɡel n teabini kwaa bwa chɔ baŋ, hale o ta n nɛɛ sune tamaa bɛlbwa.

¹⁴ O teŋɔ dɛɛ do mɛ bola, kɛŋɔ nɛn aa dɛ yo laa siswɛm ne la.

¹⁵ N tɔ lweyal dɛɛ wi, Korowii pɔ n nɛɛ n so bomboɡ ta.

¹⁶ N wio n sibie swɛɛ dɛ bwa ɔɡre.

¹⁷ N ta naɡrenyin we-ɛɛla ane bɛlbwa ɛɛ, n Korowii soŋa ta ɡe n kpɔ duure tɛo.

¹⁸ Dɛ n sewaa, bɛ nɛra baa ɛɛ mɛ wechɔɡa kpɔ kɛ ba! Bɛ ɡel wii maa dɛ wi n kasinteŋ waa la ta tɔ.

¹⁹ Taraken, n dɔ nomɛl nyundua waa dɛ ba n naa ta cheɡa, dɛ́ bol n waa tɛ mɛ.

²⁰ N daamanar dɛ mam mɛ, n dɛ wi siniire ŋɔ Korowii cha mɛ.

²¹ N dɛ nyin nomɛl ó che n naa ta soŋe Korowii tɛ mɛ, ɡɛ dam yon soŋe dɛɛ tɛ o dɔŋ la.

²² A ka n bene tamaa ken, n kaa bela baa wola laŋɛ dɛɛ ba kpa.”