Job Tɔn 15 - mzwDBL

Elifas wobol nɛɛtena

¹ Belaa Elifas, Teman te la chaŋe ŋɔ,

² “Job, wejereme bɛlbwa aa waa bol kɛ he kwaa nɔ, a ta mun dɔe kɛ peuchɔɡe aa dɛ ta.

³ Wejereme bɛlbwa aa waa kenii bol, kɛɛ dɛ́ bol waa lɛ o te wobol aa wola mun dɔe ne.

⁴ Haa Korowii ɔma kpɔe dɛɛ ɛ waane, anomanta, nomɛlbwa aa on soŋe.

⁵ He nyoa wobol dɛ baɡle he da, neɡra lɔ he nyoa wobol ta.

⁶ He ɡbabir nyoa wobol pae bolchɔɡe, waa aa le he nyoa dɛɛ baɡle ɡɛ.

⁷ Henee nɛn baa tɔ sie lolɛ aa? He lole mɔɔ Korowii ta deŋɡarere aa?

⁸ He no waa Korowii aa vɔrɔwa aa? He ɡboo nɛn haa dɔ wejemaa?

⁹ Wobɛlbwa toole he jemɛ ya ɡe aa wola jemɛ. Wejema besoo he dɔ ya ɡe aa wola dɔe yɔ?

¹⁰ Banjeni ne nyumpompoŋa tena lɔ ya bini, banɔ la baa ɡwaa he mɛɛ kwara.

¹¹ Aa were kɛŋɔ Korowii ɡbabir dɛ larawe he bwara aa, he vɛh. Ya sɔɔh bwara dɛ che o naa ta bol waa he be.

¹² Ɛrɛɛ he bwaawee ir asɛ he sie beɡre ya nɛɛ,

¹³ he baah di Korowii nɛɛ kohona dɛ ɡel ɡɛ wobochɔɡa nɔ ɛɛ le he nyoa nɔɔ?

¹⁴ Nɛnee bɔkwa ó ŋɔ doŋa toole o nɛɔ? Nɛn bɛlbwa toole o waa toɡre Korowii be.

¹⁵ Kpelaa, Korowii ta hwɛɡa dɔe tɛ nyundua toroma, ba waa ta toɡrɛ o be,

¹⁶ nɛn te pɔɔh, wechɔɡa suu kɛŋɔ waa dɛ nyɔ ne.

¹⁷ Job, cheɡ deŋne, ń bol waa he be, waa maa naa la, mɛɛ baɡle a binii.

¹⁸ Waa wejerema aa bola, anɔ la aa le ba naawa be saŋ la bwa, ba ta kpɔe sɔh.

¹⁹ Ba naawa ɡboo fa dɔ harɛ la, dɛ nɛŋhɔɔhra toole dɛ ɡel ba laa ba te kpɔ Korowii nɛ.

²⁰ Nyubinikpeɡ tena baa dɛ fiiɡi ba bala, bwara ɛɛ nyɛɡ baa ba soɡa bini bwaa.

²¹ Ɔmewa ɛɛ chole ba deŋna taa, ɡɛ saŋ baa ŋɔ ba soɡe deŋnesɔɔhna ta, ŋwɛɛra den lɔ ba tɔ ba nɛ.

²² Ba ta hwɛɡa dɔe kɛŋɔ baa le waa nyoaa, nomɛl lee ba cheɡ dɛ́ kpoo ba,

²³ ásɛ kɔkɔsakire di ba ola. Ba jemɔ kɛ ba seo tɔpere dɛ́ tel.

²⁴ Wekpeɡa ne wenaale ɡelɔ baa ɔmɛ kohona a dawɛ ba nɛɛ kɛŋɔ kooro waa dɛ la ka yoo ba laa,

²⁵ dɛkalkɛ banee nɛra baa ume nɔn dɛ pa Korowii Waa Ɛ Kpeɡri Bwa Dɔɔ nɛ, dɛ yo Korowii dɛ vɛoh la.

²⁶ Ba deŋne kpeɡri dɛ kpɔ kwaa tɔ ba te ɡbemɡbe dɛ ka yo Korowii.

²⁷ Sodɛɛɡa ɡelɔ ba je faɡra, ba teene do bare.

²⁸ Baa ka so bwɛɛre aa paɡra, ne deremi a nɛra aa chwaa kaa la taa, a ka tama deene la choɡli.

²⁹ Baa nyao, ba kondɔɔh bwa le ba nɔɔra ta, nɛra aa ba kondɔɔh bɛlbwaa na kpa.

³⁰ Sewaa chɛ kɛ bá sewɛ. Baa ɛo kɛŋɔ daa nii aa fuh o kpala, peu ta kpɔ o fee kaa ken.

³¹ Ba bɛ ba te neɡre dɛ́ kpɔ ba te dɛɛ dawɛ konsale ta, baa komɛlbwaa dɔ le a ta.

³² Ba tɔpere aa tel dɛ ba holɔ, kɛŋɔ daa kpale, baa wola won moɡɛ kpa.

³³ Baa ɛo kɛŋɔ ɡrepo daa o nɔna aa wola beɛ dɛ lee, kɛɛ ɔleve daa o fee bwa aa leera.

³⁴ Nɛra baa wola Korowii tomɛ la aa biirii dɔ, ásɛ nii fuh nɛra baa dɛ nyin kɛ baa yaɡ ba sen la deremi.

³⁵ Gɛ nɛra nɔɔ dɛɛ vɔrɔwe wechɔɡa, neɡra ɡe ɡboo ba bwa saŋ bɛlbwa.”