Job Tɔn 14 - mzwDBL

¹ Job berɔ ŋɔ, “Ba lolɛ nɛn aa, o tɔpera aa kanɛ, a lɔ tamaa ken, wenaale ɡe ɡboo a bwa.

² O dɛ kpeɡ warane kɛ kpɔɡa ken, dɛɛ hol warane, tamaa ken dɛ o nyoɡrɔ kɛŋɔ lileo ken.

³ N Naa Korowii, hɛɛ nyiŋ mɛɛ dɛ́ na kɛ n lɔ bonɔ, dɛ́ ba bol n waa kɛɛ?

⁴ Nɛn waa kah doŋa la ɛɛ won lolɛ nɛn waa wola doŋa kaeh yaa? Nɛn toole!

⁵ He tɔ sie jemɛ ɡɛ nɛn aa so ka tel, dɛ jemɛ korobie aa lɔ o soɡa la ta. He maɡa ɡɛ bil aa wola charɛ.

⁶ Laa sie kpɔ o nɛɛ dɛ́ ta o waa tɛo, dɛ́ ɡel o ɛ o toma ka tel kɛŋɔ waa tonɛ dɛ́ onɛ kɛŋɔ paate.

⁷ Hwɛɡa lole dɛ tɛ daa baa teŋo ta, wɛɛ berɔɔ pamɛ dɛ moɡɛ.

⁸ Hale dɛ o lune la ɛ ambena o muŋkpul sewɛ dɛ ka harɛ bini,

⁹ dɛ berɛ dɔ nee tama aa, o berɔ dɛɛ ir dɛ ta kpala kɛŋɔ daa baa chɔɔro ken.

¹⁰ Kɛ dɛ nɛn te sewaa, dɛ a tonɔ, o sewaa, dɛ lee o dɔɔ jaɔ?

¹¹ Gɛ neerare yon ɡel pala, ásɛ nenabɔɔne hweeh dɛ́ hol la,

¹² ɡɛɛ nɛn yon sewɛ, waa wola ir kpa. Nyundua ne harɛ taa lole nɔ, waa won ir kpa.

¹³ N Naa Korowii, n dɛ nyin kɛŋɔ he laɡ mɛ sɔh lalabwɛ, dɛ́ ɡel n do bela ka tel saŋ he bandia nyoa aa sɔɔh, ásɛ he lii n waa tɔpetooro bɛl.

¹⁴ Nɛn sewaa, wɛɛ won ir dɛ́ dɔ mkpa ja aa? N fe ɛɛ ɛ tomaa dɛ kpa ka tel kɛŋɔ n wenaale bwa aa ba a jaɡa.

¹⁵ He fe ɛɛ yer mɛɛ, ásɛ n ɡe chaŋe, ásɛ he sie lɛ men haa ta mɛ la nɛ.

¹⁶ Kasinteŋ, he fe ɛɛ dɛɛ nyiŋi n vala binii, haa wola n wechɔɡaa nyiŋi.

¹⁷ Hɛɛ kpɔɔ kɛ mɛ haa wola an lii kpa, dɛ́ fee wechɔɡa bɛlbwa maa ɛa.

¹⁸ Gɛɛ, bwejena yon kuuɡi dɛ́ choɡli, ásɛ bwea huɡri le bela aa lole,

¹⁹ ásɛ nee palɛ dɛ́ kpɔ bwea ta dɛɛ kɛɡra, bwaalajen won teera taɡa dɛ́ kaa, ɡɛɛ he won ɡela nɛwɛnyini hwɛɡa ɛɛ ɛ pɛɛpɛɛ.

²⁰ He dɛ pɔ o nɛɛ o sewɛ dɛ́ kaa, dɛ́ ɡel o siebɔr beɡre ó kaa.

²¹ O bibaala dɔ jirima kwaraa naa waa jemɛ, ba di sihiih ɡe aa, waa no.

²² O ɡbosoroo bwadabii wee, ne suna waa dɛ dii wɛɛ na.”