Job Tɔn 13 - mzwDBL

¹ Job berɔ ŋɔ, “N na ɡɛ waa nɔ bwa, n noɔ, dɛ jemɛ a mun.

² Waa haa jema la, n ɡe jema, he ta men ɡwaalɛ.

³ N ne Korowii Waa Ɛ Kpeɡri Bwa Dɔɔree dɔa, n ne he laa. N dɛ nyin kɛ n ne Korowii cheme, ásɛ n baɡle kɛ n ta bolchɔɡe dii.

⁴ Hé kpɔ nyosone tɔ kasinteŋ ta, hé do kɛŋɔ tɛɛɡa te waa wola won chah weela!

⁵ Hé tɔ nyoa kwaraa naa, dɛ a fe ɛ wejemwa.

⁶ Hé no n waa nɔ bini, hé no n wesoŋa maa kpɔa dɛɛ bil he sie nɔ.

⁷ Ɛrɛɛ hɛɛ teŋe nyosone nɔɔ? Hé dɛ lii kɛŋɔ ɡɛɛ dɛ́ won cha Korowii kɛɛ?

⁸ Hɛɛ won ɡel o baŋa pa aa? Hɛɛ won bol o waa tɛo kɔɔto aa?

⁹ Korowii nyiŋi he bini naa, wɛɛ na wedɛɛɡa anee yaa? Hɛɛ won neɡro ɡɛ haa dɛ neɡre nɛra la kɛɛ?

¹⁰ Dɛ he ɛ waa dɛ sɔh dɛɛ nyiŋi nɛra sie ta naa, Korowii ɛɛ pa heyaa bolchɔɡee.

¹¹ O kan waa doa la ɛɛ ɡeloo he jum jah. Aa ɡel ɔmee lawɛ heya aa?

¹² He sɛɡla ta mun dɔe, a do kɛŋɔ tɔɔ. Waa haa bola dɛ kpɔ dɛɛ lɛ he te do kɛŋɔ choh aa wola kpeɡe ken.

¹³ Hé tɔ nyoa, dɛ́ tɛ mɛ ŋwɛnɛ ń bol wa, ásɛ waa aa ba n nɛɛ la ba.

¹⁴ Dɛ wobɛlbwa kwaraa yaa, n sɛoh kɛŋɔ n kpɔ n nyu charɛ seo.

¹⁵ Hale dɛ Korowii kpo mɛ naa, n ta dɔ hwɛɡa o be dɛ́ chemo, dɛ́ baɡle kɛŋɔ n ta bolchɔɡe dii.

¹⁶ Anee dɛ́ ɡel n dɔ lɛɛ, dɛkalkɛ wechɔɡ-ɛɛ bɛlbwa aa won ba o sie.

¹⁷ Hé cheɡ deŋne no waa maa dɛ ba bola, dɛ́ no ɡɛ maa dɛ baɡle nɔ.

¹⁸ Maa dɔa lii n waa cheɡ nɔ, n jemɔ kɛ Korowii ɛɛ pa mɛ bolee.

¹⁹ Nomɛl lole n ne o won cheme n waa nɔ ta naa? Nɛn lole ɡɛ naa, n fe ɛɛ heloo dɛ́ sewɛ.

²⁰ N Naa Korowii, ɛ webele anɛ nɔ ɡbo tɛ mɛ, ásɛ n won ba he sie.

²¹ Gel n deŋne tɛra dɛ laa ɔmee kohona kpɔ n nɛ.

²² Dɛ he yer mɛ naa mɛɛ chaŋee, kɛɛ n bol wa ásɛ he chaŋ mɛ.

²³ Keraŋwɛnɛɛ n ɛ wechɔɡa dɛ koni waa ta nɔ? Gel ń jemɛ waa maa koni a ta.

²⁴ Ɛrɛɛ he laa sie kpɔ n nɛ, dɛ kpɔ mɛ berɛ he dɔm nɔɔ?

²⁵ He dɛ nyin he aah mɛɛ kɛɛ? He ɛɛ mɛ kɛŋɔ papohole peu aa taa kpɔ dɛɛ kaa kɛɛ? Hɛɛ doŋ mɛɛ kɛŋɔ haahra peu aa dɛ kaa a nee yaa?

²⁶ He chwerɛ n bwara waa aa wola were, hale anɔ la maa ɛa n bonɔɔne saŋ.

²⁷ He do kpɛɛ n nakpale, dɛɛ nyiŋi n vala bini, dɛɛ dawɛ n nabuɡe.

²⁸ Gɛɛ a do, nɛn do kɛ daa waa pɔah, kɛŋɔ yal chao aa dɛ diu ken.”