Job Tɔn 12 - mzwDBL

Job chaŋe Sofar

¹ Asɛ Job chaŋe Sofar ŋɔ,

² “Kpelaa, heyaa bol waa nɛra ɛɛ no, he toole n be naa, nomɛlbwa toole dɛ́ bol wejema waa n be kpa.

³ Kɛ n dɔ liire kɛ heya, he ta men ɡwaalɛ. Umee lole waa wola ɡɛ waa nɔ jemɔɔ?

⁴ N berɛ akwekwe nɛn n daamanar be, ba dɛ mam mɛ, kɛ n waa toɡrɔ, wechɔɡa bɛlbwa toole n nɛ, Korowii fa no n wesoŋa ka.

⁵ Nɛn waa lɔ bosɔɔhna ta dɛ mamɛ nɛn waa aa lɔ o nɛ. He nyin waa dɛɛ tɛ nɛn waa dɛ na wa.

⁶ Kɛ ŋwɛɛra ne nɛra baa wola Korowii tomɛ soɡe deŋnesɔɔhna ta, kwaa baa dɛ tomɛ la taa ba kpeɡri do.

⁷ He dɛ nyin waa dɛ hweli aa, he bɔɔ ola ne jumbii á baɡle heyaa wa,

⁸ kɛɛ harɛ nɔ ta kontaala, ne mpo bini pɛŋa á baɡle heyaa wa.

⁹ A ɡɛ kwaa nɔ bwa jemɛ waa Korowii aa ɛa.

¹⁰ Korowii kontaala bwa nyu lɔ o nɔn ta, hale nɛwɛnyina bwa.

¹¹ Gɛ kondikwa aa dɛ do nyondoŋe som, asɛ wobol ɡe ɛɛ do deŋne som la,

¹² ɡɛɛ ya dɔ wejema dɛɛ le nɛra baa biɡra be.

¹³ Korowii bee wejema ne kpeɡri, ne nɛra jae dɛ waa mun noe le.

¹⁴ Korowii taɡɛ kon ta aa, nomɛlbwa aa won berɛ kwaaro cheɡ. O do nɛn dea aa, nomɛlbwa aa won leo.

¹⁵ O won ɡela bwaala ɡel nɛɛ ásɛ hwel che, o pili nyundua bwaala nɛ kohona naa, neerare dɛ suuɡi dɛ́ chɔɡ kwa.

¹⁶ Korowiirii dɔ kpeɡri ne wejema, nɛra baa dɛ neɡre nɛra ne banɔ la baa neɡ ba bwa lɔ o lɔɡa.

¹⁷ O lɛ nɛra baa dɛ ja nɛra wejema, dɛ ɡel nɛra baa bol waa dɛɛ pa bole do kɛŋɔ ɡɛna ken.

¹⁸ O dɛ lɛ koranar kpeɡri, dɛ́ ɛɛ ba kɛŋɔ yoma.

¹⁹ O dɛ lɛ sɔfore wejema, dɛɛ ba banɔ la baa di kpeɡri biɡri ne harɛ.

²⁰ O dɛ sɔɔh nɛra baa dɛ di kasinteŋ nyoa, dɛɛ lɛ nomonome wejema.

²¹ O ɡelɔ sihiih ɛɛ kpo nɛnjena, dɛɛ sɔɔh kpeɡnɛra nyoa.

²² O dɛ le kwaa aa sɔah nɛra aa wola a mun jemɛ ne baŋ, dɛɛ le biro ta kwaa ne bochaah.

²³ O won ɡela harɛ bɛl do kpeɡri dɛ́ chɔɡ bɛl ɡe, dɛ́ berɛ ɡel ba warɛ ó lɔ ba peɡre.

²⁴ Korowii dɛ lɛ harɛre la nomonome liire, dɛ́ ɡel ba wili do hɛŋle ɡbo harɛ ta dɛɛ ɡaaɡe.

²⁵ Dɛ do biro ta dɛɛ laɡre, dɛɛ yɛɛɡe kɛŋɔ sennyɔdɛɛra ken.”