Job Tɔn 11 - mzwDBL

Job dam Sofar wobol

¹ Job bol waa tonɛ, asɛ o dam Sofar waa ɛ Naama te ɡe ŋɔ,

² “Amɔ nomɛlbwa aa ɡɛ waa nɔɔ chaŋe aa? Wobol kohona ɡelɔ nɛn waa ɛɛ do wer aa?

³ He dɛ lii kɛŋɔ yaa won chaŋe kɛɛ? He wepuu waa nɔ ɛɛ won tɔ yaa ŋwɛnɛ, ya bɛ won bol wa aa?

⁴ He dɛ bol ŋɔ he waa ɛ kasinteŋ, he ŋɔ he waa toɡrɔ Korowii sie.

⁵ Gɛ n fe aa dɛ nyin kɛ Korowii fee chaŋe!

⁶ Dɛ ɡel he jemɛ kɛ wejema fuuh, waane lole dɛ ɡwaa nɛwɛnyina liire ta. Korowii fe chɛ kɛ ó tɛr he deŋne ɡwaa ken.

⁷ Hɛɛ won jemɛ Korowii waa nyoa aa? Korowii Waa Ɛ Kpeɡri Bwa Dɔɔ la kpeɡri waa dɔa la, hɛɛ won no a mun aa?

⁸ Korowii wejema la ɡwaa nyundua ne harɛ jaŋne. A bini luŋri ɡwaa lalabwɛ. Hɛɛ won jemɛ ɡɛ naa?

⁹ O wejema la kan ɡwaa ɡɛ harɛ nɔ paɡri aa doa, dɛ ɡwaa mpo ɡba.

¹⁰ O lawɛ ŋɔ ba bol he waa dɛ́ doe dea aa, umee dɛ́ won tɔɔ ŋwɛnɛ ɔ?

¹¹ Korowii jemɛ nyosonteŋna wa, o dɛ na ba wechɔɡa we-ɛɛla bwa kɛrɛdɛ.

¹² Gɛne ne wejema dɔe la, dɛ ba wono dɛɛ kpɔɡ bini ol o berɛ dem kon.

¹³ Job, kpɔ he bambile bwa tɛ Korowii, dɛɛ soŋo.

¹⁴ Gel wechɔɡa ɛɛ, hale wechɔɡa haa ɛa dɛɛ sɔh bwa.

¹⁵ Anee dɛ́ ɡel he ir nyu ne, dɛ́ dɔ hwɛɡa, he che kiŋkiŋ haa wola ɔmɛ.

¹⁶ Hɛɛ soh he wenaale la bwaa kwaraa, kɛŋɔ nee aa pala ba kaa, haa wola an na kpa la.

¹⁷ He soɡa bini ɛɛ chaahnoo dɛ ɡwaa webaŋa, ásɛ he wenaale aa do kɛŋɔ biro la do kɛŋɔ chɔmbibi wechɛn ken.

¹⁸ Hɛɛ soo kɛrɛdɛ dɛkalkɛ he dɔ hwɛɡa, Korowii ɛɛ nyiŋi he nɛɛ dɛ́ ɡel he onɛ, ɔmee bɛlbwa aa wola toole.

¹⁹ Hɛɛ chɔɔ nomɛlbwa aa wola won aahre, nɛra ɡalɡa ba he be, hɛɛ cha ba.

²⁰ Kɛ wechɔɡ-ɛɛra ɛɛ nao baa a munii no, baa bɔree dɔ dɛ́ chwa kaa. Ba hwɛɡa bwaa kɛŋɔ ba fee sewɛ.”