Job Tɔn 1 - mzwDBL

Job bwara wa

¹ Baa bɛl fa lole, o sɔne Job, dɛ do harɛ bɛl ta baa yerɛ bela Us. Wobɛlbwa toole o nɛ, o waa toɡre. O dɛ tomɛ Korowii, dɛ laa o te dɛɛ kpɔ wechɔɡa ta.

² O lolɛ bibaala banuanɛ dɛ bihaahna batoro,

³ dɛ dɔ peera kaɡboŋa anuanɛ, nyoɡmare kaɡboŋa atoro ne nae kaɡboŋ baa kpɔa dɛɛ parɛ, ne keeɡore lafraanue, dɛ dɔ bonɔɔna ne toli ɡe kohona. Job aa dɔ kwaa kohona nomanta, dɛ onee suuɡate dɛ ɡwaa nɛra baa lɔ wee leebɔr harɛ la bwa ta.

⁴ O bibaala la bɛlbwa yon le o tɔpere cheɡ, dɛ́ ɡel ba daa kondikonjena o dem, dɛ́ yerɛ ba nimambihaahna batoro la, bá ka puu ba di kwaa la dɛ́ lɛ ba sie.

⁵ Ba di kondikonjena la dɛ bar chiɡ tonaa, ba mɛɛ Job yon ir chɔɔ, dɛ kpo kon ɛ saraha soŋe ba wechɔɡa Korowii be, bɛlbwa nyu ta. O yon lii ŋɔ, “N bii nɔ ken ɛ wechɔɡa, dɛ jo Korowii nɛɛ ba ta jemɛ.” Dɛ waa Job aa dɛ ɛ saŋ bɛlbwa laanee la.

Job loɡla daahna dɛ́ na

⁶ Awola bɛl, nyundua toroma la Korowii be, dɛ Bɔnsam ɡe ja bɛl.

⁷ Anee Korowii pɛɛ Bɔnsam ŋɔ, “Leperaa he le dɛ ba nɔ?” O ŋɔ, “Gaaɡaa n do harɛ nɔ ta dɛ ɡaaɡe la dɛɛ ba.”

⁸ Korowii ŋɔ o be ŋɔ, “Ɛrɛɛ he na n bonɔɔ Job waɔ? Nomɛlbwa toole o waa toɡre kɛ on harɛ nɔ ta, wechɔɡe bɛlbwa toole o nɛ, o dɛ tom mɛ, o laa o te dɛɛ kpɔ wechɔɡa ta.”

⁹ Ate, Bɔnsam chaŋe ŋɔ, “He dɛ lii kɛŋɔ Job ɛɛ tomɛ pɛɛpɛɛ yaa?

¹⁰ He kpɔ nɔn tɔ o ne o dem tena ne komɛlbwa waa dɔa nɛ. Dɛ swee andɛɛɡa tɛo o toma bɛlbwa ta, dɛ ɡel o kondɛɛra ya perɛ harɛ la bwa ta.

¹¹ Laa nɔn kpɔ komɛlbwa waa dɔa ta dɛ́ na, wɛɛ taahnee he na.”

¹² Anee Korowii ŋɔ Bɔnsam be ŋɔ, “A wer, komɛlbwa waa dɔa la lɔ he nɔn ta, kɛ o te ɡbabir te, bɛ nɔn kpɔ leɡo.” Asɛ Bɔnsam le Korowii be dɛ kaa.

¹³ Awola bɛl, Job bibaala ne bihaahna la dɛ di kondikonjena la ane, dɛɛ lɛ ba sie ba dɔɔ nomoa dem,

¹⁴ belaa torome bɛl kpɔ chwae ba Job be dɛ ba ŋɔ, “Ya kpɔ nae kaa parɛ, asɛ keeɡore ɡe do ya jwɛɛh dɛɛ di,

¹⁵ asɛ Seba tena ba lɔ jo a bini, dɛ lawa kaa. Ba kpoo n bala la bwa. N ɡboo wona dɔ bɔr chwa, dɛ baa bol he be la!”

¹⁶ Torome la nyoa taa lɔ waa la ta wɛɛ bol la, dɛ torome la bɛl ɡe balɔ dɛ ba ŋɔ, “Bwaala kɔrɔ jo ya ne kondɛɛra la bini, dɛ fuh a ne n bala la bwa. N ɡboo le a nyoa, asɛ dɛ baa bol he be la.”

¹⁷ O ɡe nyoa ta chiɡe, dɛ torome bɛl ɡe balɔ dɛ ba ŋɔ, “Kaldea tena baa kpoŋe dɔmkwaa dɛɛ ŋwɛ bɔne ba bini nɛmbele batoro, dɛ ba lɔ jo ya bini, dɛ lawɛ he nyoɡmare la bwa kaa. Ba kpoo n bala la bwa. N ɡboo wona dɔ bɔr chwa, dɛ baa bol he be la!”

¹⁸ Torome la ɡe nyoa ta chiɡe, dɛ bɛl ɡe balɔ dɛ ba ŋɔ, “Dɛ he bibaala ne bihaahna la lɔ ba dɔɔ nomoa la dem, dɛɛ di kondikonjena dɛɛ lɛ ba sie,

¹⁹ asɛ peukpeɡ den ta le pua hɛŋle ɡbo harɛ ta dɛ ba lɔ dem la, o bwa ku chole ba nɛɛ ba bwa serewe. N ɡboo wona le a nyoa, dɛ baa bol he be la.”

²⁰ Job aa no ɡɛ la, o ir che dɛ laa o batakaare kɛɛ, a baɡle kɛ o loo kuu, dɛ fonɛ o nyu. Ate, dɛ chɔ kpɔ sie pi harɛ, dɛ jam Korowii,

²¹ dɛ ŋɔ, “Ba lol mɛ mumɡbal, mumɡbal nee n berɛ dɛɛ ba kaala. Korowiirii dɛɛ tɛ, onee dɛɛ lɛ. Hé ɡel ya kpɛɛ o sɔn.”

²² Waa nɔ bwa ta la, Job ta Korowii nɛɛ nyae a ɛ wechɔɡa tɛo.