Amanesoma Jɔn Aa Chwera Tɔn 9 - mzwDBL

Yeesu chah baa bɛl baa lolɔ nyoŋe

¹ Yeesu ne o habɔteŋra aa dɛ valɛ la, o na baa bɛl baa lolɔ nyoŋe.

² Belaa o habɔteŋra la bɔɔro ŋɔ, “Nomoa, baa nɔ ne o nya ne o mɛɛ, ba bini ume wechɔɡaa ba nyoŋa nɔ ne nɔɔ?”

³ Anee Yeesu ŋɔ, “Baa nɔ ne o lolanar bini bɛlbwa wechɔɡa be laa a le. Gɛ aa ɛ Korowii chaɡle o kpeɡri o nɛɛ waa a ba ɡɛ la.

⁴ A wer kɛŋɔ bɔr aa chaahna nɔ, ya swɛɛ siwi dɛɛ ɛ Naate waa tom mɛ la toma, dɛkalkɛ bɔr dɛ ba bira nomɛlbwa aa wola won ɛ toma bɛlbwa kpa.

⁵ N taa lɔ harɛ nɔ ta bonɔ nɔ, menee kandea dɛɛ chaah nɛra bwa.”

⁶ Waa bol ɡɛ tonɛ la, o ta nentane ta harɛ dɛ teɡɛ a ne teera, dɛ kpɔ fɔɡɛ baa la sie.

⁷ Asɛ dɛ ŋɔ, “La tam la baa dɛ yerɔ Siloam la ta dɛ́ ka samɛ he sie.” Gɛ sɔn Siloam la munii kɛŋɔ “Ba tomɔ.” Waa laŋa dɛ ka samɛ o sie la tonɛ la, dɛ o dɛ na, dɛ berɛ ba buse.

⁸ Belaa o bala ne nɛra ba fa aa nao ka kɛ o fa nyoŋɔ dɛɛ soŋe kwaa la ŋɔ, “Baa nɔ laa fa yon so dɛɛ soŋe kwaa la aa?”

⁹ Bane ŋɔ, “Onee,” asɛ bane ɡe ŋɔ, “Akai, o laa, lee wɛɛ leo.” Asɛ baa la ɡe ɡbaɡba ŋɔ, “Menee!”

¹⁰ Anee ba bɔɔro ŋɔ, “Ɛrɛɛ a ɛ he berɛ won dɛɛ na nɔɔ?”

¹¹ Belaa o ŋɔ, “Baa la baa dɛ yerɔ Yeesu laanee ta nentane dɛ teɡɛ a ne teera pɛ dɛ kpɔ fɔɡɛ n sie, dɛ ŋɔ ń la Siloam ta dɛ ka samɛ ta. Asɛ maa laŋa dɛ ka samɛ la, buɡ la ta, mɛɛ na la.”

¹² Anee ba pɛɛro ja ŋɔ, “Leperaa o dɔɔ?” Asɛ o ŋɔ, “Maa jemɛ bela waa lole.”

Farisii tena wepɛɛre

¹³ Belaa ba lawɛ baa la o fa aa nyoŋa la dɛ kaa o ne Farisii tena sie.

¹⁴ Dɛ tɔpere Yeesu aa teɡɛ nentane pɛ teera ta dɛ kpɔ chaoh la ɛ Ona Tɔpere.

¹⁵ Belaa Farisii tena la berɛ pɛɛro ɡɛ aa ɛa asɛ o won dɛɛ na. Anee o ŋɔ, “Kpechɛɡree o kpɔ maa n sie asɛ n samɛ ta taraken dɛ won dɛɛ na la.”

¹⁶ Asɛ Farisii tena la bane ŋɔ, “Baa nɔ ta Korowii be leɛ, dɛkalkɛ o chɔɡ Ona Tɔpere.” Bane ɡe ŋɔ, “Ɛrɛɛ wechɔɡ-ɛɛ ɛɛ ba wona ɛ nyokpowaa nɔ dɔŋa baa nɔ aa ɛa nɔɔ?” A cheɡɛ a ta ba nyoa ta pɛɛ kpa.

¹⁷ Asɛ Farisii tena la berɛ pɛɛ baa la ja ŋɔ, “He ŋɔ o chaeh dɛ ɡel hɛɛ na bɔr, taraken nɔ, ɛrɛɛ he na o waɔ?” Anee o ŋɔ, “Korowii keamee on.”

¹⁸ Dɛ Juu tena nomonome la te dɛ tɔŋle ŋɔ, ba fe aa yarada kɛŋɔ o fa nyoŋɔ ka asɛ dɛ berɛ dɛɛ na, nemenɛ baa na o nya ne o mɛɛ mɔɔ.

¹⁹ Ba yer ba dɛ bɔɔ ba ŋɔ, “He bie nɔ naa? He ŋɔ haa lolɔ dɛ o nyoŋɔ ɛ? Aah ɛrɛɛ a ɛ asɛ o berɛ won dɛɛ na nɔ?”

²⁰ Anee ba ŋɔ, “Ya jemɔ kɛ ya biee. Yaa lolɔ dɛ o nyoŋɔ.

²¹ Kɛ yaa ɡɛ aa ɛa asɛ wɛɛ na ne naate waa ɡela wɛɛ na te waa jemɛ. Amɔ hé pɛɛ o ɡbaɡba na nɔ, dɛkalkɛ o kpeɡo dɛ́ won bol wa.”

²² Dɛ Juu tena nomonome laanee baa ɔmɛ waa ba ŋɔ ɡɛ. Nomonome la ɛ nyoa beŋkpoŋ kɛŋɔ nomɛlbwa waa ŋɔ Yeesu ɛ Kristo la, baa doŋi naatee o bɛ ba cheremi dea jo kpa.

²³ A waa o nya ne o mɛɛ ŋɔ o kpeɡo ŋɔ bá pɛɛro la.

²⁴ Ba berɔ yerɛ baa la o fa aa nyoŋa la nɛɛtena, asɛ dɛ ŋɔ o be ŋɔ, “Nyiŋi Korowii dɛ bol kasinteŋ. Ya te jemɔ kɛ baa nɔ waa chaeh nɔ ɛ wechɔɡ-ɛɛ.”

²⁵ Belaa o ŋɔ, “Dɛ o ɛ wechɔɡ-ɛɛ ne o ta ɛɛ yoo, n te aa jemɛ. Webeŋkpoŋ maa jema laanee kɛ, n fa nyoŋɔ asɛ taraken dɛ berɛ dɛɛ na.”

²⁶ Anee ba berɛ pɛɛro ŋɔ, “Aah ɛrɛɛ o ɛɛ nɔ? Bɔkwa waa o ɛ dɛ won pili he sie nɔɔ?”

²⁷ Anee o ŋɔ, “N fa aa bol he be wubwa la, he vɛh noe. Ɛrɛɛ hɛɛ nyin kɛ ń bol jaɔ? He ɡe dɛ nyin he ɛ o habɔteŋra kɛɛ?”

²⁸ Belaa ba chɛɡro kohona, asɛ dɛ ŋɔ, “Henee o habɔteŋre! Ya te, Mosis habɔteŋraa yan.

²⁹ Gɛ yaa jema laanee kɛ Korowii bol waa dɛ baɡle Mosis, kɛ baa nɔ te, yaa o leebɔr jemɛ.”

³⁰ Asɛ baa la chaŋe ŋɔ, “Bɔkwa waa nɔɔ? Heyaa ŋɔa haa o leebɔr jemɛ, kɛ o ɡelɔ n te won dɛɛ na.

³¹ Ya jemɔ kɛŋɔ Korowii deŋna toole wechɔɡ-ɛɛra be. O deŋna lɔ banɔ la baa dɛ duuru dɛɛ ɛ waa waa dɛ nyin la be.

³² Le harɛ mumpar bwa, umee noa kɛŋɔ nomɛl wono pili nɛn baa lolɔ dɛ o nyoŋɔ sie bwa nɔ?

³³ Dɛ Korowii be laa baa nɔ le ba naa, o fe aa won ɛ waa nɔ dɔŋa.”

³⁴ Anee ba ŋɔ o be ŋɔ, “He ne he wechɔɡaa ba lolɛ. Gɛɛ he ŋɔ hé chaɡle yaa wa aa?” Asɛ ba doŋu cheremi dea bela bala kwara.

Korowii Doma bini nyoŋa wa

³⁵ Yeesu aa noa kɛŋɔ ba doŋu cheremi dea bala la, o nyin o bɔr asɛ dɛ pɛɛro ŋɔ, “He dɛ yarada Men Nɛn Bie la aa?”

³⁶ Asɛ o pɛɛro ŋɔ, “Nomoa, umee naate ásɛ he chaɡ mɛ n jemɔ dɛ́ yaradao wɔ?”

³⁷ Anee o ŋɔ, “Naatee he den na la, o ne henee dɛɛ bol waa la.”

³⁸ Belaa baa la ŋɔ, “N Dɔɔ, n dɛ yaradae!” Asɛ dɛ ɡuŋi o sie dɛ tɛo duure.

³⁹ Asɛ Yeesu ŋɔ, “Nɛra waa bola dɛ́ pa bole waa n ba harɛ nɔ ta, ásɛ nyoŋa berɛ dɛɛ na, ásɛ banɔ la ɡe baa dɛ na la berɛ nyoŋa.”

⁴⁰ Dɛ Farisii tena bane lɔ bela. Baa no ɡɛ la, ba bɔɔro ŋɔ, “Amɔ ya ɡe ɛ nyoŋa kɛɛ?”

⁴¹ Anee Yeesu chaŋe ŋɔ, “Dɛ he fe sɛoh kɛŋɔ he ɛ nyoŋa kwaraa naa, wechɔɡa fe toole he nɛ, kɛ haa ŋɔa he dɛ na nomanta, he ta lɔ wechɔɡa ta.”