Amanesoma Jɔn Aa Chwera Tɔn 8 - mzwDBL

Haah baa lawɔ jwamane bɔe ta wa

¹ Asɛ Yeesu kaa Ɔlevere Bwejen la ta.

² Bɔr aa dɛ chaah chɔmbibi la, o berɛ kaa Korowii Dea. Belaa nɛnlaa ba o be dɛ ba baro cheme, asɛ o so harɛ dɛɛ chaɡ ba Korowii Wa.

³ Asɛ Tɔnjerema ne Farisii tena lawɛ haah bɛl waa dɛ bɔ jwamane dɛ ba o ne Yeesu be, dɛ ɡel o ba che ba bwa baah ta.

⁴ Asɛ ba ŋɔ Yeesu be ŋɔ, “Nomoa, ya lawɛ haah nɔ dɛ o ne baa bɛl waa wola o jaa ɛɛ chɔɔ.

⁵ Mosis Mmara dɛ baɡle kɛŋɔ haah waa do ken la chɛ kɛŋɔ bá foɡro bwea kpo. Amɔ taraken ɛrɛɛ he ɡe ŋɔɔ?”

⁶ Ba pɛɛro ɡɛ waa nɔ dɛ́ kpɔ daahno na kɛŋɔ wɛɛ bol waanee ásɛ ba fee dɔ o nyoa lawɛ. Belaa Yeesu joŋi asɛ dɛ kpɔ o nonii dɛɛ chwerɛ harɛ.

⁷ Ba taa cheɡa dɛɛ pɛɛro waa ɡɛ la, o iro che asɛ dɛ ŋɔ ba be ŋɔ, “Hé bini bɛlbwa waa wola wechɔɡa ɛɛ bwa la, ó tɔ sie ta bwe forɔ.”

⁸ Asɛ dɛ berɛ kwaa joŋi dɛɛ chwerɛ harɛ ja.

⁹ Waa ŋɔ ɡɛ la, bɛlbwa lii o wechɔɡa waa ɛa. Bɛlbwa ta wone kpɔ kon forɔ kpa, dɛ bwa peɡre. Ba nomonomee tɔ sie dɛ kaa beŋkpoŋa beŋkpoŋa a ba tel bechale nɛɛ dɛ ba tonɛ, a ba ka Yeesu ne haah la o ta che bela ɡɛ.

¹⁰ Asɛ Yeesu ir che, dɛ pɛɛ haah la ŋɔ, “Leperaa ba kaalɔ? Ba bini bɛlbwa toole dɛ́ pae bolchɔɡe kpa aa?”

¹¹ Anee o ŋɔ, “Ɔɔh, n Dɔɔ, bɛlbwa toole.” Asɛ Yeesu ŋɔ, “Ate, n ɡe aa hen bolchɔɡee pa kpa. Kaa, kɛ bɛ wechɔɡa ka ɛ kpa.”

Yeesu ɛ harɛ nɔ ta kandea

¹² Yeesu bol waa baɡle Farisii tena la ja, dɛ ŋɔ, “N ɛ kandea dɛɛ chaah harɛ nɔ ta nɛra. Nomɛlbwa waa dɛ teŋɛ n nɛɛ la aa biro taa valɛ bwa, wɛɛ valɛ bochaah taa dɛ́ dɔ mkpa.”

¹³ Belaa Farisii tena la ŋɔ o be ŋɔ, “Henee bol he waa dɛ ɡbaɡba berɛ di he te danseɛ, anomanta, nyosonee hɛɛ teŋe.”

¹⁴ Anee o ŋɔ, “Akai. A lole kɛ n dɛ di n ɡbaɡba danseɛ te, kɛ kasinteŋii mɛɛ bol, dɛkalkɛ n jemɛ bela maa lea ne bela maa dɛ kaa. Haa n leebɔr ne n kaabɔr jemɛ.

¹⁵ Harɛ nɔ ta liiree he kpɔ nyiŋi nɛn dɛɛ bol wa, kɛ n te aa bole pa.

¹⁶ Dɛ mɛɛ ɛ ɡɛ kwaraa yaa, mɛɛ ɛa á toɡre, dɛkalkɛ n ɡbo laa, n Mɛɛ waa tom mɛ la ja n nɛ.

¹⁷ He mmarare la dɛ baɡle kɛŋɔ webeŋkpoŋ nɛra banɛ bwa aa bol la ɛ kpela.

¹⁸ N ɡbaɡbaa dɛɛ di n te danseɛ, asɛ n Mɛɛ la waa tom mɛ la ɡe ɛ danseɛ dɛ ja n nɛɛ wobɛlbwa maa dɛ ɛ ta.”

¹⁹ Asɛ ba pɛɛro ŋɔ, “Leperaa he mɛɛ nɔ doɔ?” Anee o ŋɔ, “Gɛ haa wola men jemɛ nɔ, ɡɛɛ haa wola n Mɛɛ la ɡe jemɛ,” dɛ berɛ ŋɔ, “Dɛ he fe jem mɛ naa, he fe jemɛ n Mɛɛ la ɡe.”

²⁰ Korowii Dea suuɡa tae dakare bɔr belaa Yeesu do dɛɛ baɡle waa dɛ bol ɡɛ waa nɔ. Bɛlbwa ta wone lawɔ, dɛkalkɛ dɛ o tɔpere ta tele mɔɔ.

Yeesu ŋɔ, haa won la bela maa dɛ kaa

²¹ Asɛ Yeesu berɛ bol waa baɡle nɛra la ja ŋɔ, “Mɛɛ ba kaaloo he ɡaaɡe dɛɛ nyin n bɔr, kɛ haa men na. He wechɔɡa taa hɛɛ ba sewa. Bela maa kaa la, haa won ba bela.”

²² Anee Juu tena nomonome la bɔɔ dɔŋa ŋɔ, “O ŋɔ yaa won la bela waa dɛ kaa! Jamɔ wɛɛ kpo o tenee kɛɛ?”

²³ Belaa Yeesu chaŋ ba ŋɔ, “Harɛ nɔ ta nɛraa heya, asɛ n ɡe le nyundua. He le harɛ nɔ ta, kɛ n te, harɛ nɔ ta laa n le.

²⁴ A waa n ŋɔ he be ŋɔ, hɛɛ sewɛ he wechɔɡa taa la. Dɛ nomɛlbwa ta men yaradae kɛŋɔ Menee Men te naa, hɛɛ sewɛ he wechɔɡa taa.”

²⁵ Belaa ba bɔɔro ja ŋɔ, “Henee ume o?” Asɛ o chaŋe ŋɔ, “Anee n ŋɔ he be chɔɔ bwa la.

²⁶ N fe dɔ he waa dɛ bol kohona he di bolchɔɡe a ta, kɛ maa bol. Naate waa tom mɛ la waa dɔ kasinteŋ nomanta, n wobɛlbwa maa bol nɛra be la ɛ waa aa le o be.”

²⁷ Waa ŋɔ ɡɛ la, ba ta o waa la mun noɛ kɛŋɔ o Mɛɛ Korowii waa wɛɛ bol.

²⁸ Anomanta, o ŋɔ ba be ŋɔ, “Awola haa ɡɔɔ Men Nɛn Bie nyundua la, belaa hɛɛ ba n nae kɛŋɔ Menee Men kpela, ásɛ dɛ jemɛ kɛŋɔ n ɡbaɡba kpeɡri ne laa mɛɛ ɛ wa, kɛ anɔ la n Mɛɛ la aa ŋɔ n be laanee mɛɛ bol.

²⁹ Naate waa tom mɛ la ja n nɛ, o ta men tae, dɛkalkɛ n dɛ ɛ anɔ la aa dɛ too o tea.”

³⁰ Nɛra baa no Yeesu waa la kɛrɛdɛ yaradao.

Kasinteŋ jema ɛɛ ɡeloo ya dɔ ya te

³¹ Asɛ o ŋɔ Juu tena baa yaradao la be ŋɔ, “Dɛ he ɡelɔ n waa maa baɡle heyaa la do he bambile bini hɛɛ teŋɛ a ta te naa, dɛ he ɛ n habɔteŋra kpela,

³² dɛ won jemɛ kasinteŋ la, asɛ kasinteŋ la ɡel he dɔ he te.”

³³ Anee ba ŋɔ, “Abraham naanaree ya te, nomɛlbwa nɛndɔɔla laa yan. Aah, ɛrɛɛ hɛɛ baɡle kɛŋɔ yaa dɔ ya tenee yaa wola nɛndɔɔlaa ɛ kpa nɔɔ?”

³⁴ Belaa Yeesu ŋɔ, “Kasinteŋ, n dɛ ŋɔ he be, nomɛlbwa waa dɛ ɛ wechɔɡa la ɛ yom. Wechɔɡa yawɔ yom.

³⁵ Yom aa o dɔɔ deemii do ka tonɛ, kɛ dem te bie te ɛɛ do dem belaa saŋ bɛlbwa.

³⁶ Anomanta, dɛ men Korowii Bie la lɛ heyaa dɛ ɡel he dɔ he te naa, amɔ te dɛ he dɔ he te kɛrɛdɛ.

³⁷ N ɡbabir jemɔ kɛŋɔ he ɛ Abraham naanar, kɛ he berɔ dɛɛ nyin mɛ dɛ́ kpo, dɛkalkɛ haa n webaɡla yarada.

³⁸ Waa n Mɛɛ aa baɡ mɛɛ mɛɛ bol he be la, asɛ he ɡe ɛɛ ɛ anɔ la he mɛɛ aa bola he no.”

³⁹ Anee ba ŋɔ, “Ya mɛɛɛ Abraham.” Belaa Yeesu ŋɔ, “Dɛ Abraham bii tentenee heya aa, he fe dɛ ɛ o we-ɛɛla siwi.

⁴⁰ N waa maa dɛ bol saŋ bɛlbwa la ɛ kasinteŋ waa maa noa le Korowii be, kɛ he dɛ nyin mɛ dɛ́ kpo. Gɛɛ Abraham ɛ aa?

⁴¹ He ɡe mɛɛ toma siwii hɛɛ ɛ la.” Anee ba ŋɔ, “Nyoasɛm bii laa yan oo, Korowii ɡboo ya Mɛɛ.”

⁴² Yeesu ŋɔ ba be ŋɔ, “Dɛ he Mɛɛ Korowii kpela aa, he fe dɛ nyin n wa, dɛkalkɛ o bee n le ba, dɛ do bonɔ taraken nɔ. N ɡbaɡba kpeɡri ne laa n ba, onee tom mɛ.

⁴³ Ɛrɛɛ haa wola n waa mun no nɔɔ? Haa wola nyin kɛ he teŋɛ a ta la waa.

⁴⁴ Bɔnsam biirii heya. Waa waa dɛ nyin ɛɛ laanee he ɡee nyin ɛɛ. Chɔɔ bwaa o le nɛŋkpoa we-ɛɛla ne, waa kasinteŋ ŋwɛnɛ kpɔ nemenɛ nyosone ɡbo. O ŋɔ o bol wa aa, nyosone ɡboo wɛɛ teŋe, dɛkalkɛ o daa. O ɛ nyosonteŋni, asɛ nyosone bwa kooroo on.

⁴⁵ Kɛ n te maa dɛ bol kasinteŋ la waa haa wola men yarada la.

⁴⁶ He bini umee dɛ́ won chaɡle kɛ n ɛ wechɔɡa kaɔ? Aah dɛ n dɛ bol kasinteŋ aa, ɛrɛɛ haa wola men yarada ɔ?

⁴⁷ Nomɛlbwa waa ɛ Korowii bie la dɛ no o wa. Haa wola o bii ɛɛ la waa haa wola o waa nyin dɛ́ no la.”

Gɛ Yeesu aa baɡle o nɛnsoo

⁴⁸ Belaa Juu tena la bɔɔro ŋɔ, “Nyosonee yaa teŋe kɛ yaa ŋɔa ŋɔ, he ɛ Samaria te kwa ɛɛ ir he nɛɛ la aa?”

⁴⁹ Anee o ŋɔ, “Kwa aa n nɛɛ ir, n Mɛɛ sɔnee mɛɛ kwaa, asɛ he te ɛɛ chɔɡ mɛ.

⁵⁰ Sɔn laa mɛɛ nyin. Nɛn waa nyin sɔn dɛɛ tɛ mɛ la lole. Onee dɛ́ ba pa nomɛlbwa bole.

⁵¹ Kasinteŋ, n dɛ ŋɔ he be, nomɛlbwa waa no n waa nɔ dɛ teŋɛ a ta la aa sewɛ bwa.”

⁵² Anee Juu tena la ŋɔ, “Ya ta ŋɔe yaa? Kwaa dɛ ir o nɛ. Ya nabaa Abraham ne Korowii keamere la ɡba serewɔ, ɡɛɛ he te ŋɔ nomɛlbwa waa no he waa nɔ dɛ́ teŋɛ a ta la aa sewɛ bwa naa?

⁵³ He ɡwaa ya nabaa Abraham waa sewa la kɛɛ? Korowii keamere la ɡe serewɔ. Aah dɛ ɛrɛɛ hɛɛ lii he te nɔ?”

⁵⁴ Anee Yeesu ŋɔ, “N ɡbaɡba dɛ nyin sɔn aa, a ɛ pɛɛpɛɛ, kɛ n Mɛɛ la haa dɛ bol o waa ŋɔ onee Korowii haa dɛ tomɔ laanee dɛɛ tɛ mɛ sɔn.

⁵⁵ Haa on jemɛ, kɛ n te jemɔ. Dɛ n ŋɔ maa on jemaa, dɛ n ɛ nyosonteŋni kɛ heya. N jemɔ asɛ dɛɛ no o deŋna wa.

⁵⁶ He nabaa Abraham sie lɛo wɛɛ tamane n bala wa. O nao o baah sɔɔhno.”

⁵⁷ Asɛ ba ŋɔ o be ŋɔ, “He ta bene fifraanue ɡba dii mɔɔ, ɡɛɛ he na Abraham aa?”

⁵⁸ Anee o ŋɔ, “Kasinteŋ, n dɛ ŋɔ he be, baa wola Abraham lolɛ mɔɔ la dɛ n lole.”

⁵⁹ Belaa ba pa bwea ŋɔ ba dɛ foɡro, asɛ o sɔh dɛ le Korowii Dea bela kaa.