Amanesoma Jɔn Aa Chwera Tɔn 6 - mzwDBL

Yeesu tɛ nɛra kaɡboŋa banue kondikwaa ba di

¹ A habɔɔ la, Yeesu le Galilia Moo baa dɛ yerɔ Tibeerias Moo la.

² Belaa nɛnlaa tenten teŋɛ o nɛ, dɛkalkɛ ba nao kɛ waa ɛ nyokpowaa weela tena chaeh ta ka.

³ Belaa Yeesu ne o habɔteŋra la bwa teeh kaa bwe bɛl doa dɛ ka so bela.

⁴ Dɛ a ka tama Juu tena tɔpejen bɛl baa dɛ yerɔ Galekaa la tel.

⁵ Yeesu baa ha sie dɛ nyiŋi dɛ na kɛŋɔ nɛnlaa bane dɛ ba o be, asɛ dɛ bɔɔ o habɔteŋra la bɛl baa dɛ yerɔ Felep la ŋɔ, “Ɛrɛɛ yaa ba ɛɛ dɛ́ dɔ kondikwaa tɛ nɛndamanta nɔ bwa dɔŋa bá dio?”

⁶ Yeesuu saahna bɔɔ Felep ɡɛ waa nɔ dɛ kpɔ dɛɛ daahno dɛ́ na. Kɛ o te la, dɛ o jemɛ anɔ la waa dɛ ba ɛɛ.

⁷ Asɛ Felep ɡe ŋɔ, “Dɛ yaa dɔ suuɡa damanta kɛŋɔ denaarere lafraanɛɛ dɛ́ yawɛ paanoo kwaraa naa, bɛlbwa aa won dɔ tama tama kwaraa di.”

⁸ Anee Yeesu habɔteŋra la bini bɛl waa ɛ Seemɔn Pita nime baa yerɔ Andriu la ŋɔ Yeesu be ŋɔ,

⁹ “Bibaa bɛl lɔ ya bini bonɔ dɛ dɔ paanoo anue ne pɛŋa anɛ. Aah ɛrɛɛ a ɡe ɛɛ ba wona ɛ nɛndamanta nɔɔ?”

¹⁰ Anee Yeesu ŋɔ ba be ŋɔ, “Hé ɡel ba bwa so harɛ.” Dɛ kpɔɡlor warɛ bela, asɛ ba so a ta. Dɛ ba bini baala ɡbo ɛɛ ɛ kaɡboŋa banue.

¹¹ Belaa Yeesu kpɔ paanoo la dɛ jam Korowii dɛ bɔne tɛ nɛnlaa la. Gɛ tentenee o kpɔ pɛŋa la dɛ jam Korowii dɛ bɔne tɛɛ ba ja. Asɛ bɛlbwa dɔ ɡɛ aa maɡre o ne.

¹² Baa dia tonɛ dɛ bwa vaɡre la, o ŋɔ o habɔteŋra la be ŋɔ, “Hé tɔɔ anla baa dia ka la pɛ ásɛ a bɛ chɔɡ ta.”

¹³ Asɛ ba tɔɔ paanoo anue la nɛnlaa la aa dia a ka la pɛ, asɛ a su wɛɡrɛre fi dɛ anɛ.

¹⁴ Nɛnlaa la aa na a ɡɛ nyokpowaa nɔ Yeesu aa ɛa la, ba ŋɔ dɔŋa be ŋɔ, “Kpelaa! Onɔɔ Korowii keame baa ŋɔa ŋɔ wɛɛ bao la.”

¹⁵ Belaa Yeesu na kɛŋɔ nɛra la dɛ nyin kɛ ba lawɔ dɛ́ cheɡo kora kpeɡri ne ó di, asɛ o sɔh le ba bini dɛ ɡbo ka so bwe la doa ja.

Yeesu valɛ nee sie

¹⁶ A jɔmɔra ne la, Yeesu habɔteŋra la bwa berɔ tu ba moo la nyoa,

¹⁷ asɛ dɛ ba jo ɡbera bini, dɛ berɛ ɡale moo la dɛ fe ɛɛ kaa Kapeeneɔm. Bɔr baa jo dɛ Yeesu ta ba be balɛ mɔɔ.

¹⁸ Gɛ saŋ la ɡe, dɛ peujen bɛl dɛ ta dɛɛ beɡre nee la, asɛ nehɛma tɔ o bwa.

¹⁹ O habɔteŋra la aa tawa dɛ kaa dɛ ɛ kwansini atoro kɛɛ anaarɛ la, ba nao kɛŋɔ Yeesu aa valɛ nee la sie dɛɛ ba ba be, asɛ ɔmee laɡ ba taeh.

²⁰ Belaa waa na ɡɛ la, o ŋɔ ba be ŋɔ, “Menee! He bɛ ɔmɛ!”

²¹ Baa naa kɛ Yeesuu la, ba sie lɛo, asɛ ba ɡel o ba jo ɡbera la bini. A ta biɡre bɛlbwa ba tel bela baa dɛ kaa.

²² Tɔ aa pera la, nɛnlaa la aa soɡe moo la nyoa la nao kɛŋɔ dɛ ɡbera beŋkpoŋ ɡboo fa cheɡɛ leebɔɔ bela. Yeesu habɔteŋra la ɡboo jo ɡbera la bini dɛ kaa, o te ta ba nɛɛ jae.

²³ Asɛ ɡbeni ane le bwɛɛ bɛl baa dɛ yerɔ Tibeerias ta, dɛ ba leebɔɔ la ta bela nɛra la aa soɡa Yeesu kpɔ paanoo dɛ jam Korowii a waa dɛ bɔne tɛɛ ba ba di la.

²⁴ Anomanta, nɛnlaa la aa naa kɛŋɔ Yeesu ne o habɔteŋra la bini bɛlbwa toole bela la, ba jo ɡɛ ɡbeni la bini dɛ kaa o bɔr ɡaaɡa Kapeeneɔm.

Yeesu baɡlɔ kɛ onee kondikwaa aa dɛ tɛ mkpa

²⁵ Nɛra la aa tel bela la, ba kaa na Yeesu kɛ waa lɔ moo la baŋ bela, asɛ dɛ bɔɔro ŋɔ, “Nomoa, saŋ besoo he ba bonɔ nɔ?”

²⁶ Belaa o chaŋ ba ŋɔ, “Kasinteŋ, paanoo la he dɛ aa dia vaɡɛ la waa hɛɛ ɡaaɡe n bɔr la. Menɛkɛsɛ he no nyokpowaa la bɛlbwa mun.

²⁷ He bɛ kondikwaa aa won chɔɡa nɔ ta dɛɛ koh. Hɛ́ɛ koh kondikwaa aa wola chɔɡ dɛɛ tɛ mkpa aa wola jaɡa dɔe la ta. Gɛ kondikwaa nɔɔ Men Nɛn Bie la ɛɛ ba heyaa tɛɛ, dɛkalkɛ menee Korowii tɛ kpeɡri kɛŋɔ kooro aa tomɛ o bie faahna ne la.”

²⁸ Anee ba pɛɛro ŋɔ, “Ɛrɛɛ yaa ba ɛɛ ásɛ dɛ won ɛ waa Korowii aa dɛ nyin ɔ?”

²⁹ Asɛ Yeesu chaŋ ba ŋɔ, “Gɛ Korowii aa dɛ nyin laanee kɛ nómɛlbwa yarada o Bibeŋkpoŋ waa tomɔ la, ásɛ dɛ kpɔ o te tɛo.”

³⁰ Asɛ ba berɛ bɔɔro ja ŋɔ, “Aah bɔkwa nyokpowaa hɛɛ ba ɛɛ ásɛ ya na dɛ yaradae nɔ? Ɛ waane yá na.

³¹ Ya naawa fa di kondikwaa ane soo aa le nyundua baa yera maana ɡɛ saŋ baa dɛ valɛ pua hɛŋle ɡbo harɛ ta la. Anee ba chwerɛ Korowii Tɔn bini kɛŋɔ, ‘O tɛɛ ba kondikwaa aa le nyundua ba asɛ ba di la.’ ”

³² Asɛ Yeesu ŋɔ, “Kasinteŋ, n dɛ ŋɔ he be, Mosis laa tɛ heyaa kondikwaa aa le nyundua la. N Mɛɛ ɡboo won kondikwaa tenten aa le nyundua la kpɔe dɛ tɛ.

³³ Kondikwaa la Korowii aa tɛ yaa laanee nɛn waa le o ɡbaɡba be nyundua dɛ ba mkpa ne ba tɛ nɛwɛnyini bwa la.”

³⁴ Anee nɛnlaa la ŋɔ, “Nomoa, tɛ yaa ɡɛ kondikwaa nɔ tɔpere bɛlbwa yaa di.”

³⁵ Asɛ Yeesu ŋɔ, “Menee kondikwaa aa dɛ tɛ Korowii mkpa la. Nomɛlbwa waa ba n be la, lɔr aa on kpo. Asɛ nomɛlbwa ɡe waa yarada mɛ dɛ́ kpɔ o te tɛ mɛ la, nyɔɡre ɡba aa o kpoe ba bwa.

³⁶ N ŋɔ he be ŋɔ he na mɛ, kɛ he ta men yaradae dɛ kpɔ he te tɛ mɛ mɔɔ.

³⁷ Nomɛlbwa n Mɛɛ Korowii aa kpɔ tɛ mɛ la ɛɛ ba n bee dɛ́ ba teŋɛ n nɛ. Maa nomɛlbwa ɡe waa ba n be laanee doŋi ta bwa,

³⁸ dɛkalkɛŋɔ n ɡbaɡba tetoowa waa laa n le nyundua ba. Naate waa tom mɛ la tetoowa waa n ba.

³⁹ N Mɛɛ Korowii waa tom mɛ la tetoowaa kɛŋɔ nomɛlbwa waa kpɔa tɛ mɛ la bɛ n nɔn ta le, asɛ tɔpera bwa jaɡa wee la, ń iru seo ta.

⁴⁰ Dɛkalkɛ ɡɛ n Mɛɛ la aa dɛ nyin laanee kɛŋɔ, nomɛlbwa waa na men maa ɛ o Bie la dɛ yarada mɛ dɛ kpɔ o te tɛ mɛ la, wɛɛ dɔ mkpa aa wola jaɡa dɔe, ásɛ n iru seo ta, tɔpera bwa jaɡa wee.”

⁴¹ Belaa Juu tena la ɛɛ naɡre o waa kɛŋɔ o ŋɔ onee kondikwaa tenten aa le nyundua ba la.

⁴² Asɛ ba ŋɔ, “Amɔ Josef bie Yeesu la laa kɛɛ? Ya jemɛ o nya ne o mɛɛ bwa. Aah ɛrɛɛ o berɛ ŋɔ nyunduaa o te le ba nɔɔ?”

⁴³ Asɛ Yeesu ŋɔ, “Hé ɡel n waa naɡra dɔŋa be ɡɛ.

⁴⁴ Nomɛlbwa aa won ba n be nemenɛ n Mɛɛ la ɡbaɡba waa tom mɛ la tɛro ba n be, ásɛ tɔpera bwa jaɡa wee la, ń iru seo ta.

⁴⁵ Ba chwerɔ do Korowii keamere tɔne bini ŋɔ, ‘Korowiirii dɛɛ ba nomɛlbwa waa baɡla.’ Anomanta, nomɛlbwa Korowii aa dɛ baɡlo o waa la asɛ wɛɛ hweli la, wɛɛ ba n bee.

⁴⁶ A ta ɛɛ kɛŋɔ nomɛl na Korowii siwi ne ka, nemenɛ men maa le o be nyundua dɛ ba la ɡbo.

⁴⁷ Kasinteŋ, n dɛ ŋɔ he be, nomɛlbwa waa yarada mɛ la dɔ mkpa aa wola jaɡa dɔe.

⁴⁸ Menee kondikwaa waa dɛ tɛ Korowii mkpa la.

⁴⁹ He naawa fa di kondikwaa ane soo baa yera maana aa le nyundua, kɛ ba serewɔ.

⁵⁰ Kondikwaa nɔ maa dɛ bol o waa nɔ, nyunduaa o ɡe le, kɛ nomɛlbwa waa di a ɡɛ kondikwaa nɔ soo la waa sewɛ.

⁵¹ Menee kondikwaa aa le nyundua ba dɛ dɔ mkpa la. Nomɛlbwa waa di ɡɛ kondikwaa nɔ la ɛɛ dɔ mkpa aa wola jaɡa dɔe. Asɛ kondikwaa maa kpɔ tɛ nɛwɛnyini bwa bá di dɛ́ dɔ mkpa laanee n bo-ol.”

⁵² Belaa Juu tena la berɛ dɛɛ tɔŋle dɔŋa ŋɔ, “Aah ɛrɛɛ wɛɛ ba wona tɛ yaa o bo-ol yaa dio?”

⁵³ Anee Yeesu ŋɔ, “Kasinteŋ, n dɛ ŋɔ he be, dɛ nomɛlbwa ta Men Nɛn Bie la bo-ol dii asɛ dɛ nyɔ n chal aa, amɔ dɛ o ta mkpa la dɔe.

⁵⁴ Nomɛlbwa waa di n bo-ol ásɛ dɛ nyɔ n chal ɡe la dɔ mkpa aa wola jaɡa dɔe, ásɛ tɔpera bwa jaɡa wee la, ń iru seo ta.

⁵⁵ N bo-olii kondikwaa tenten, asɛ n chal ɡee nee tenten.

⁵⁶ Nomɛlbwa waa di n bo-ol asɛ dɛ nyɔ n chal la, n ne wɛɛ ɛ beŋkpoŋii, waa wola won daɡre o te n nɛɛ kpa.

⁵⁷ N Mɛɛ waa tom mɛ laanee mkpa dɔɔ la, anomanta, o ɡelɔ n ɡe dɔ mkpa. Gɛɛ nomɛlbwa waa di n bo-ol la, mɛɛ ba ɡela o dɔ mkpa.

⁵⁸ Kondikwaa aa le nyundua ba dɛɛ tɛ mkpa laanee nɔ, o ta do kɛŋɔ he naawa kondikwaa baa dɛ yera maana baa dia mkpa aa wola toole a ta ba serewe la. Nomɛlbwa waa di kondikwaa nɔ la ɛɛ dɔ mkpa aa wola jaɡa dɔe.”

⁵⁹ Kapeeneɔm cheremi deaa Yeesu do dɛɛ baɡle nɛra waa dɛ bol a ɡɛ waa nɔ.

Mkpa aa wola jaɡa dɔe

⁶⁰ O habɔteŋra la aa no ɡɛ la, ba kɛrɛdɛ ŋɔ, “Waa nɔ te kpeɡri kohona to, yaa won ɛ ɡɛ.”

⁶¹ Yeesu aa naa kɛ o habɔteŋra la dɛ naɡre a ɡɛ waa la, o pɛɛ ba ŋɔ, “Gɛ waa nɔ kpeɡri tɛ heyaa kɛɛ?

⁶² Dɛ he fe na Men Nɛn Bie la n berɛ dɛɛ kaa nyundua bela maa lea ba la ɡe sɛ?

⁶³ Hé jemɛ kɛŋɔ Korowii Domadɛɛɡe ɡbosoroo dɛɛ tɛ mkpa. Nɛwɛnyini bokpeɡa te ɛ pɛɛpɛɛ. Waa maa dɛ bol he be nɔ dɛ ba Korowii Domadɛɛɡe la ne, asɛ dɛɛ tɛ heyaa mkpa.

⁶⁴ Kɛ he bini bane ta yaradae.” Mumpar la bwa dɛ Yeesu te jemɛ ba bini banɔ la baa wola yaradae dɛ kpɔ ba te tɛo, ne naate waa leo tɛ bá kpoo la.

⁶⁵ Yeesu berɔ ŋɔ, “Anɔ waa n ŋɔ nomɛlbwa aa won ba n be nemenɛ n Mɛɛ Korowii leo tɛ mɛ la.”

⁶⁶ A ɡɛ waa nɔ taa a che nɛra ba fa aa teŋɛ o nɛɛ la kɛrɛdɛ le mumur dɛ ɡel o nɛɛ teŋa.

⁶⁷ Anee o bɔɔ o habɔteŋra fi dɛ banɛ la ŋɔ, “He ɡe dɛ nyin kaala kɛɛ?”

⁶⁸ Asɛ Seemɔn Pita ŋɔ, “N Dɔɔ, dɛ ya le he be naa, ume bee yaa ba kaala ɔ? He wobol taa mkpa aa wola jaɡa dɔe do.

⁶⁹ Ya dɛ yaradae, dɛ jemɛ kɛŋɔ henee Korowii Biɡoroŋ la.”

⁷⁰ Belaa Yeesu chaŋe ŋɔ, “Menee le he nɛra fi dɛ banɛ nɔ, kɛ he bini bɛl ɛ Bɔnsam nɛn.”

⁷¹ Dɛ Seemɔn Eskareɔt bie Judas waa wɛɛ bol la. O habɔteŋra fi dɛ banɛ la bɛlee, kɛ onee dɛ́ ba leo tɛ.