Amanesoma Jɔn Aa Chwera Tɔn 5 - mzwDBL

Yeesu chah baa bɛl Bɛtsata

¹ A habɔɔ la, dɛ Juu tena tɔpejen bɛl telo, asɛ Yeesu la Jerusalam.

² Dɛ tam bɛl chɔ Jerusalam asɛ Juu tena ɛɛ yerɔ Bɛtsata Hibru wobol ta. O chɔɔ bɛne Peera Doonyojen la. Tam la nyoa la, ba ɛ soŋnibɔra bele anue dɛ tɔa.

^3-4 Soŋnibɔra bela la, weela tena kɛŋɔ nyoŋa, boobie ne banɔ la ba peri aa serewa warɔ dɛ chɔ bela.

⁵ Dɛ baa bɛl ja weela tena la nɛɛ o weela do o nɛɛ bene fifraatoro dɛ anuatoro dɛ o ta chaeh dɔe.

⁶ Yeesu aa baa na o chɔe la, o wono jemɛ kɛŋɔ weela la aa lɔ o nɛɛ biɡro, anomanta, o bɔɔro ŋɔ, “He dɛ nyin kɛ he dɔ bokpeɡa aa?”

⁷ Anee o ŋɔ, “Ɔɔh. Kɛ tam la poraa, maa nɛn dɔ ó kpɔ mɛ kaa do o ta. Maa takapɔ ŋɔ ń ka jo o ta, dɛ n dɔŋ tɔ n sie.”

⁸ Asɛ Yeesu ŋɔ o be ŋɔ, “Ir che, dɛ́ kpɔ he kalaŋ kaa!”

⁹ Yeesu aa ŋɔ ɡɛ la, baa la ɡbaŋrɔ dɛ ir che dɛ kpɔ o kalaŋ dɛ valɛ dɛɛ kaa. Ona Tɔpere taa a ɡɛ waa nɔ chiɡ.

¹⁰ Asɛ Juu tena nomonome ŋɔ weela te la Yeesu aa chaoh la be ŋɔ, “Fini ɛ Ona Tɔpere, anomanta, he koni Mmara kɛŋɔ haa kpɔ he kalaŋ che la!”

¹¹ Asɛ o chaŋe ŋɔ, “Naate waa chaah mɛ laanee ŋɔa ŋɔ ń ir kpɔ n kalaŋ dɛ́ kaa.”

¹² Anee ba bɔɔro ŋɔ, “Umee su baah ŋɔ hé ir dɛ́ kpɔ he kalaŋ che nɔɔ?”

¹³ Baa la ta wone jemɛ naate la nɛnsoo waa chaoh la, dɛkalkɛ dɛ nɛnlaa tentenee lɔ bela asɛ Yeesu koo ba bini kaa.

¹⁴ A habɔɔ la, Yeesu na baa la Korowii Dea asɛ dɛ ŋɔ o be ŋɔ, “He nao kenɛ, taraken haa dɔ bokpeɡa nɔ, ɡel wechɔɡa ɛɛ, ásɛ anɔ la aa ɡwaa loɡla kwaa la bɛ he nɛɛ ba chiɡ kpa.”

¹⁵ Belaa baa la aa le bela la, o la Juu tena nomonome la be dɛ ka chaɡle kɛŋɔ Yeesuu chaoh la.

¹⁶ Baa noa kɛŋɔ Yeesuu ɛ a ɡɛ waa nɔ Ona Tɔpere ta la, belaa ba pa mun haoh, dɛkalkɛ dɛ o chɔɡ ba Ona Tɔpere Mmara.

¹⁷ Anee Yeesu chaŋ ba ŋɔ, “N Mɛɛ te dɛ ɛ o toma saŋ te bɛlbwa, anomanta, ɡɛɛ chɛ kɛŋɔ n ɡe ɛɛ ɛ.”

¹⁸ Gɛ waa nɔ Yeesu aa bola la ɛɛ ba bwaawee kohona dɛ ɡel baa nyinu dɛ́ kpo kwara, dɛkalkɛŋɔ dɛ Ona Tɔpere la ɡbo laa wɛɛ chɔɡ. O berɔ ŋɔ o Mɛɛ waa lolɔɔ Korowii, asɛ dɛ kpɔ o te dɛɛ maɡɔ kɛŋɔ o ne o ɛ kɛrɛdɛ.

Kpeɡri Korowii bie la aa dɔa

¹⁹ Belaa Yeesu chaŋ ba ŋɔ, “Kasinteŋ, n dɛ ŋɔ he be, toma Korowii aa dɛ ɛ laanee o Bie ɡe ɛɛ ɛ, dɛkalkɛ waa won kpɔ o ɡbo liire dɛɛ ɛ ɡɛ waa dɛ nyin. Anɔ la Korowii aa dɛ ɛ laanee o Bie ɡe nyiŋi dɛɛ ɛ.

²⁰ Dɛkalkɛ Korowii dɛ nyin o bie asɛ dɛɛ baɡlo o we-ɛɛla dɔŋa wɛɛ ɛ. Anomanta, wɛɛ baɡloo wɛɛ ɛ wejena aa ɡwaa anɔ kwara ásɛ a ɛ heyaa nyokpoa.

²¹ Gɛ Korowii aa dɛ chum nɛra baa serewa asɛ dɛ ɡel baa dɔ mkpa la, ɡɛ tentenee o Bie la ɡe ɛɛ ba wona chum bɛlbwa waa dɛ nyin dɛ́ tɛo mkpa.

²² Korowii ɡbaɡba aa nomɛlbwa waa bol dɛ́ pa bole. O tɛ o Bie la ŋwɛnɛ ŋɔ ó bol nomɛlbwa waa dɛ́ pa bole.

²³ Dɛ ŋɔ nómɛlbwa tɛ o Bie la jirima ɡɛ tenten baa dɛ tɛo jirima la. Anomanta, nomɛlbwa waa wola o Bie la jirima tɛ la, dɛ ɡɛɛ waa wola o Mɛɛ la waa tomɔ la jirima tɛ.

²⁴ Kasinteŋ, n dɛ ŋɔ he be, nomɛlbwa waa no n waa dɛɛ teŋɛ a ta asɛ dɛ yarada n Mɛɛ waa tom mɛ la, onee dɔ mkpa aa wola jaɡa dɔe la. Maa naate waa bol dɛ́ pa bole kpa, dɛkalkɛ o le seo nɔn ta dɛ berɛ dɔ Korowii mkpa.

²⁵ Kasinteŋ, n dɛ ŋɔ he be ja kɛŋɔ saŋ bɛl ɛɛ bao ásɛ nɛra baa serewa no men Korowii Bie la taa, ásɛ banɔ la baa dɛ no la dɔ Korowii mkpa. Tɔpere la dɔɔ tel kwara.

²⁶ Gɛ Korowii aa dɔ mkpa dɛɛ tɛ la, ɡɛɛ o ɡel o Bie la ɡe dɔ mkpa dɛɛ tɛ,

²⁷ asɛ dɛ tɛo kpeɡri kɛ ó won dɛɛ bol nɛra waa dɛɛ pa bole, dɛkalkɛ o Bie laanee Nɛn Bie la.

²⁸ He bɛ ɡel anɔ ɛ heyaa nyokpoa, dɛkalkɛ tɔpere bɛl dɛ́ ba ásɛ nɛra baa serewa la no n taa,

²⁹ ásɛ bɛlbwa le o bɔɔ bini. Banɔ la baa ɛ wedɛɛɡa la te ɛɛ berɔɔ dɔ Korowii mkpa, ásɛ banɔ la ɡe baa ɛ wechɔɡ-ɛɛra la, ó berɛ chɔɡ ba.”

Waa aa dɛ di Yeesu danseɛ

³⁰ Yeesu berɔ ŋɔ, “N ɡbo aa won ɛ wobɛlbwa n bambile ta, nemenɛ anɔ la Korowii aa chaɡ mɛ la. A taa n che dɛ bol nɛra waa dɛɛ pa bole. An ɡela n bole pae toɡre nɔ, dɛkalkɛ waa n Mɛɛ waa tom mɛ la aa kpɔa tɛ mɛ la ɡboo mɛɛ ɛ dɛ ɡel n bambile wa.

³¹ Dɛ n ŋɔ mɛɛ di danseɛ tɛ n ɡbaɡba aa, nɛra ɛɛ ŋɔɔ nyosonee mɛɛ teŋe.

³² Kɛ nomɛl lole dɛ di danseɛ dɛɛ tɛ mɛ, asɛ n jemɛ kɛŋɔ o danseɛ dii ɛ kpela.

³³ Jɔn bee he tomɛ he toroma asɛ o bol kasinteŋ la baɡle heya.

³⁴ Maa n te kpɔe dɛɛ dawɛ nɛwɛnyini nɛɛ ó di mɛ danseɛ. N dɛ bol anɔ ásɛ he yarada Korowii ó won lɛ heya.

³⁵ A ɡɛ Jɔn nɔ fa do kɛ kandea baa choŋu wɛɛ chaah bɔr kohona, asɛ hɛɛ nyin o bɔr chaahna la som dɛ na tama mɔɔ.

³⁶ Kɛ n dɔ danseɛ bɛl waa kpeɡa dɛ ɡwaa Jɔn danseɛ waa baa di tɛ mɛ la kwara. Anee kɛ toma n Mɛɛ Korowii aa kpɔa do n nɔn ta ŋɔ ń ɛ la. Anee dɛɛ baɡle kɛ onee tom mɛ.

³⁷ Asɛ n Mɛɛ la waa tom mɛ laanee dɛɛ di mɛ danseɛ. He ta o taa noɛ bwa á ba ɛ kɛŋɔ he na o siebɔr ka,

³⁸ he ta o waa la ɡe kpɔe do he bambile bini, dɛkalkɛ he ta nɛn waa tomɔ he be la yaradae.

³⁹ He swɛɛ siwi dɛɛ kure Korowii Tɔn la, ásɛ dɛɛ lii kɛŋɔ hɛɛ dɔ mkpa aa wola jaɡa dɔe le a ta. Asɛ ɡɛ tɔn nɔ bini waa ɡe ɛɛ di danseɛ dɛɛ tɛ mɛ.

⁴⁰ Kɛ haa nyin kɛ he ba n be dɛ́ ba dɔ mkpa la.

⁴¹ Maa sɔn nyin nɛwɛnyini be.

⁴² He te, n jemɛ heyaa dɛ jemɛ kɛŋɔ he bambile ta Korowii waa lawɛ.

⁴³ N Mɛɛ Korowii sɔn nee n ba he vɛɛh mɛ, kɛ dɛ nomɛlee fe bala o ɡbaɡba sɔn ta naa, he fe ɛɛ no o bee.

⁴⁴ He dɛ nyin sɔn dɔŋa be, kɛ a ta wehiah ɛɛ tɛ heyaa kɛŋɔ hé nyin sɔn Korowii te be. He do ken aa, ɛrɛɛ hɛɛ ba wona dɛ yarada mɛ nɔ?

⁴⁵ He bɛ dɛɛ lii kɛŋɔ menee dɛ che Korowii sie dɛɛ baɡle he wechɔɡa haa ɛa. Me laa. Mosis haa kpɔ he hwɛɡa bwa do o nɛɛ la, on dɛɛ baɡla.

⁴⁶ He fe yaradao waa, he fe yarada n ɡe, dɛkalkɛ onee chwerɛ n waa o tɔn bini.

⁴⁷ Haa wola waa waa chwera yaradae nɔ, ɛrɛɛ hɛɛ ba wona yarada n waɔ?”