Amanesoma Jɔn Aa Chwera Tɔn 16 - mzwDBL

¹ “N baɡle heyaa waa nɔ bwa, ásɛ wobɛlbwa bɛ won ɡel he le habɔɔ.

² Nɛra ɛɛ doŋi heyaa cheremi deene binii, ásɛ a ba saŋ bɛl kɛŋɔ bá kpoo heya, dɛɛ lii kɛŋɔ Korowii tetoowaa baa ɛ ɡɛ la.

³ Anɔ bwaa baa ba heyaa ɛɛ, dɛkalkɛŋɔ baa n ne n Mɛɛ jemɛ.

⁴ N bol waa nɔ he be, ásɛ dɛ a baa ba ɡɛ naa, he won lii dɛ́ jemɛ kɛŋɔ n fa bol he be. N ta aa lɔ he be la waa maa wola he be bolɛ chɔɔ bwa la.”

Toma Korowii Domadɛɛɡe aa dɛ ɛ

⁵ Yeesu berɔ ŋɔ, “Taraken mɛɛ berɔ kaa Naate waa tom mɛ la be, kɛ he bini bɛlbwa ta men bɔɔrɛ bela maa dɛ ba kaala.

⁶ Maa bol ɡɛ waa nɔ he be nomanta, he tea bini chɔɡɔ.

⁷ Kasinteŋii mɛɛ bol he be la, a wer tɛ heyaa kɛ ń kaa. Dɛ n ta kaalaa, Habɔchekpaa la aa he bee ba. Kɛ dɛ n baa kaalaa, mɛɛ tomɔɔ ó ba he be.

⁸ Dɛ o balaa, wɛɛ di nɛra kasinteŋii dɛ́ ɡel ba jemɛ waa aa ɛ wechɔɡa, ne waa aa dɛ su Korowii siwi, ne ɡɛ Korowii bole pae waa aa doa.

⁹ Wɛɛ di ba kasinteŋii ba wechɔɡa ɛɛ ta, dɛkalkɛ baa men yarada,

¹⁰ dɛ di ba kasinteŋ waa aa dɛ su Korowii siwi la ta, kaala maa dɛ kaa n Mɛɛ be haa wola men na kpa la nomanta.

¹¹ Wɛɛ di ba kasinteŋii Korowii bole pae la ta, dɛkalkɛŋɔ Korowii bol harɛ nɔ ta kpeɡnɛn la waa dɛ pao bolchɔɡe.

¹² N fe dɔ waa kohona dɛ́ bol baɡle heya, kɛ aa ɡwaa he nɛɛ kɛ he won no a mun buɡ nɔ ta.

¹³ Kɛ dɛ Korowii Domadɛɛɡe waa dɛ chaɡle Korowii kasinteŋ waa la balaa, wɛɛ pili wobɛlbwa binii tɛ heyaa hé no a mun. O ɡbabir nyu bini waa laa wɛɛ ba bola baɡle heya. Anɔ la waa noa le Korowii be laanee wɛɛ ba bola, dɛ́ chaɡle heyaa waa a taa lɔ sie dɛɛ ba bala.

¹⁴ Onee dɛ́ tɛ mɛ jirima, dɛkalkɛ onee dɛ́ kpɔ n wobɛlbwa ba bol he be.

¹⁵ Komɛlbwa n Mɛɛ la aa dɔa la ɛ n kon. A waa n ŋɔ Korowii Domadɛɛɡe laanee dɛ́ kpɔ n wobɛlbwa bol he be la.

Tebinichɔɡ ne silɛɛ wa

¹⁶ A ka tamaa ken haa men na kpa, ásɛ a berɔ ɛ tama ɡe aa, he na mɛ ja.”

¹⁷ O habɔteŋra la bane bɔɔ dɔŋa ŋɔ, “O waa nɔ waa dɛ bol nɔ munii ɛrɔɔ? O ŋɔ, a ka tama yaa on na, ásɛ a berɔ ɛ tama ɡe aa, ya nao ja, dɛ berɛ ŋɔ, o Mɛɛ la bee wɛɛ kaa waa yaa wola on na kpa la.”

¹⁸ Asɛ ba ŋɔ, “Ɛrɛɛ ‘a ka tama’ nɔ waa bola nɔ ɛɛ baɡle ɔ? Yaa a mun jemɛ!”

¹⁹ Belaa Yeesu aa jema kɛŋɔ ba dɛ nyin ba bɔɔro ɡɛ wobol la mun la, o ŋɔ, “Amɔ maa ŋɔa ŋɔ a ka tama haa men na, ásɛ a berɔ ɛ tama ɡe aa, he na mɛ ja nɔ, a waa hɛɛ bɔɔ dɔŋa a mun nɔ naa?

²⁰ Kasinteŋ, n dɛ ŋɔ he be, he loo ɛɛ kuu he wi, ásɛ nɛra baa dɔ harɛ nɔ ta ɡbo liire sie lɛ. He tea bini ɛɛ chɔɡoo, kɛ he tebinichɔɡ la ɛɛ berɛ heyaa silɛɛ.

²¹ Dɛ lol tea lɔ haah naa, o tea bini dɛ chɔɡ, dɛkalkɛŋɔ o bonyɛɡa saŋ telo. O baa lolɛ tonaa, o dɛ soh o bonyɛɡa la, ásɛ o sie berɛ lɛ kɛŋɔ waa lolɛ bie ba harɛ nɔ ta.

²² Gɛɛ a do he ɡe be. Taraken te, he tea bini chɔɡɔ, kɛ maa berɛ ba na heyaa la taa he sie ɛɛ ba lɛɛ kohona. Gɛ silɛɛ la, nomɛlbwa aa won lɛ he be.

²³ Tɔpere la telaa, haa men wobɛlbwaa bɔɔ kpa. Kasinteŋ, n dɛ ŋɔ he be, dɛ he soŋe komɛlbwa n Mɛɛ be naa, wɛɛ koh n waa dɛ́ tɛ heya.

²⁴ He ta n sɔn kpɔe dɛ soŋe komɛlbwa bwa. Kɛ taraken te, hé kpɔ n sɔn soŋe, hɛɛ dɔɔ ásɛ he sie lɛ kohona.

²⁵ Anɔ maa bola baɡle heyaa nɔ ɛ sɛɡla, kɛ tɔpere bɛl dɛ ba bala maa wola heyaa sɛɡle kpa. Mɛɛ bol n Mɛɛ la waa he bee dɛ́ pili a bini chasee ken.

²⁶ Tɔpere la telaa, hɛɛ kpɔ n sɔnee soŋe Korowii. N ta ŋɔe ŋɔ n dɛ che he naa ta dɛ́ soŋe tɛ heya.

²⁷ N Mɛɛ ɡbabir dɛ nyin heya, dɛkalkɛŋɔ he dɛ nyin mɛ, dɛ yarada kɛŋɔ o bee n le ba.

²⁸ O bee n le dɛ ba harɛ nɔ ta, taraken n berɔ dɛɛ le bonɔ dɛ kaa o be.”

²⁹ Anee o habɔteŋra la ŋɔ, “Taraken te haa yaa sɛɡle kpa. He dɛ pili waa bini chasee.

³⁰ Ya nao name kɛŋɔ he jemɛ wobɛlbwa aa lɔ nɛn nyu bini mɔɔ wɛɛ pɛɛre. A ta chɛ kɛŋɔ bɛlbwa pɛɛre waane kpa. A ɡelɔ ya yarada kɛŋɔ Korowii bee he le.”

³¹ Anee Yeesu bɔɔ ba ŋɔ, “He berɔ dɛɛ yarada mɛ taraken te naa?

³² Tɔpere bɛl dɛ ba, o joɔ tonɛ, he bwa dɛ ba chwae peɡre kaa he deremi ásɛ a ka n ɡbo. N ne n Mɛɛ aa lole saŋ bɛlbwa nomanta, aa n ɡbo kae ba.

³³ A waa mɛɛ baɡle heyaa waa nɔ ásɛ he dɔ deŋnesɔɔhna dɛ́ le pɛɛ n ne haa pɛa la ta la. Hɛɛ na hɔhɔrɔwaa harɛ nɔ ta, kɛ hé lawɛ bambile, dɛkalkɛ n faɡɛ harɛ nɔ ta komɛlbwa nɛ.”