Amanesoma Jɔn Aa Chwera Tɔn 12 - mzwDBL

Ba fuɡe noo ta Yeesu napaala ta

¹ Aa baa ka tɔpera anumɛl bá di Galekaa Tɔpejen la, Yeesu berɔ ba Bɛtani dɛ la Lasorɔs la waa chumu seo ta la dem.

² Ba hɔɔhro, o ne nɛra bane ne Lasorɔs so dɛɛ di kwaa la, asɛ Maata tɔɔ dɛɛ tɛɛ ba.

³ Anee Mɛɛre kpɔ nosɔɔhsoma loŋbir a yoɡ aa kpeɡa kohona ba fuɡe ta Yeesu napaala ta, dɛ kpɔ o nyumpona dɛɛ feera. Asɛ dea la bini bwa sɔɔh do som ken.

⁴ Belaa Yeesu habɔteŋra la bini bɛl baa dɛ yerɔ Judas Eskareɔt o taa dɛ ba Yeesu lee tɛ la ŋɔ,

⁵ “Ba fe yoɡ nosɔɔhsoma nɔ dɛ lɛ suuɡajena dɛ bɔne tɛ nyaara ta bɔ naa?”

⁶ Menɛkɛsɛ ŋɔ nyaara waa hiaoh waa o ŋɔ ɡɛ la. Waa ɛ ŋwɛɛ waa o ŋɔ ɡɛ. Dɛ onee dɛɛ kpoŋe ba suuɡa, asɛ dɛ yon ŋwɛ ane dɛɛ di.

⁷ Asɛ Yeesu ŋɔ, “Hé ɡelo jeiih ken. Noo o kpɔ dɛɛ huɡ mɛ.

⁸ He ne nyaara ɛɛ do lee saŋ bɛlbwa. Kɛ n te, maa he bee so ka tonɛ.”

Lasorɔs kpoe vɔrɔwa

⁹ Belaa Juu tena pirim aa noa kɛŋɔ Yeesu lɔ Bɛtani la, ba ba bela dɛɛ nyinu dɛ́ na. O ɡbo waa laa, Lasorɔs waa chumu seo ta la ɡe jao.

¹⁰ Anomanta, Sɔfonomonome la vɔrɔwɔ kɛŋɔ bá kpo Lasorɔs ɡba,

¹¹ dɛkalkɛŋɔ o waa Juu tena kɛrɛdɛ vɛh ba nɛɛ teŋa dɛɛ yarada Yeesu dɛ kpɔ ba te tɛo.

Yeesu jo Jerusalam jirima ne

¹² Tɔ aa pera la, nɛnlaa baa ba Jerusalam dɛɛ ba ba di Galekaa la noɔ kɛŋɔ Yeesu dɛ ba bela.

¹³ Belaa ba nyin bambie papooni dɛ kpɔ le bwɛɛ bini ka chemo ŋwɛnɛ ta silɛɛ ne dɛɛ ŋɔ, “Woowo! Korowii swee Israel tena Kooro waa valɛ o sɔn ta dɛɛ ba nɔ andɛɛɡa.”

¹⁴ Dɛ Yeesu nyin keeɡo bie bɛl, dɛ so o ta ɡɛ baa chwera Korowii Tɔn bini ŋɔ,

¹⁵ “Saayɔn tena, he bɛ ɔmɛ! Hé nyiŋi na! He Kooroo soɡe keeɡo bie ta dɛɛ ba la.”

¹⁶ Dɛ o habɔteŋra la ta o waa nɔ mun noɛ loɡla la, dɛ ka tel kɛ Korowii aa tɛo jirima mɔɔ ba ta lii kɛŋɔ ba chwerɛ o bwara waa Korowii Tɔn bini ɡɛ, asɛ ba ɛo ɡɛ kpela.

¹⁷ Dɛ nɛnlaa Yeesu aa yerɛ Lasorɔs lalbɔɔ bini, o ir seo ta ba siwi ta la bol ɡɛ waa ɛa la bwa dɛɛ baɡle nɛra.

¹⁸ Nɛnlaa baa noa kɛŋɔ o ɛ wejena nɔ la koh a waa dɛ ka chemo.

¹⁹ Belaa Farisii tena la bol dɔŋa be ŋɔ, “Hɛlaa yaa hɛlɛ la! Yaa won ɛo wobɛlbwa noo! Na nɛra bwa aa wura teŋɛ o nɛɛ ɡɛ!”

Grik tena bane baa dɛ nyin Yeesu dɛ́ na

²⁰ Dɛ Grik tena bane ja nɛra baa kaa Jerusalam dɛɛ la ká tomɛ Korowii Galekaa tɔpere la ta la nɛ.

²¹ Ba la Felep waa le Galilia harɛ bwɛɛ baa dɛ yerɔ Bɛtsaeda la be, dɛ ka soŋo ŋɔ, “Nomoa, ya dɛ nyin Yeesu dɛ́ nao.”

²² Belaa Felep ka ŋɔ Andriu be, asɛ ba bwa la ka bol Yeesu be.

²³ Anee o chaŋ ba ŋɔ, “Men Nɛn Bie la tɔpere telo kɛŋɔ Korowii tɛ mɛ jirima.

²⁴ Kasinteŋ, dɛ ba ta boyubii kpɔe du o pɔh aa, waa won ya. O ɡboo dɛ do le. Dɛ he duu te naa, o dɛ le dɛ ya kɛrɛdɛ.

²⁵ Nomɛlbwa o siwi aa swɛɛ harɛ nɔ ta silɛɛ kwaa ta la, wɛɛ paŋɛ o nyuu. Asɛ nomɛlbwa ɡe o siwi aa wola harɛ nɔ ta silɛɛ kwaa ta lɛ la, wɛɛ dɔ o nyuu dɛ dɔ Korowii mkpa aa wola jaɡa dɔe la.

²⁶ Nomɛlbwa waa sɛh dɛɛ tom mɛ la, wɛ́ɛ teŋɛ n nɛ. Bobɛlbwa maa do la, belaa n toroma ɡe ɛɛ ba doe. N Mɛɛ la ɛɛ tɛ nomɛlbwa waa dɛ tom mɛ la sɔnee.”

Yeesu bol o seo wa

²⁷ Anee Yeesu berɛ ŋɔ, “Taraken n liire ta bobeŋkpoŋ cheɡɛ. Ɛrɛɛ ń soŋe n Mɛɛ ŋɔɔ? Ń soŋo ŋɔ, ‘N Mɛɛ, lɛɛ mɛ le waa nɔ nyoa’ aa? Akai! A ta ɡɛ maɡrɛ, dɛkalkɛŋɔ ɡɛ waa nɔ waa n ba.”

²⁸ Asɛ o ŋɔ, “N Mɛɛ, ɡel he sɔn dɔ jirima!” Belaa ba no taa bɛl le nyundua kɛŋɔ, “N ɡelɔ n sɔn dɔ jirima, kɛ mɛɛ berɔɔ ɡel o dɔ ja.”

²⁹ Nɛnlaa baa ja o nɛɛ bela la aa no taa la, bane ŋɔ bwaalaa kɔra, asɛ bane ɡe ŋɔ nyundua torome bɛlee bol waa o be.

³⁰ Asɛ Yeesu ŋɔ, “N waa laa ya no ɡɛ taa nɔ. He waa.

³¹ Tɔpere Korowii aa bol harɛ nɔ ta nɛra bwa waa dɛ́ pa bole la telo, asɛ name ɡee mɛɛ ba ń doŋi Bɔnsam waa ɛ harɛ nɔ ta kooro la ta.

³² Men, baa ɡɔɔ mɛ nyundua le harɛ nɔ ta. Ba baa ɡɔɔ mɛ naa, mɛɛ tɛr nɛra bwaa ba n be.”

³³ Anɔ waa bola nɔ dɛ baɡle seo la soo siwi waa dɛ ba sewa.

³⁴ Belaa nɛnlaa la chaŋe ŋɔ, “Ya noɔ Korowii Tɔn la ɛɛ baɡle kɛŋɔ dɛ Kristo la balaa, waa sewɛ bwa. Aah, ɛrɛɛ he te berɛ ŋɔ Nɛn Bie la chɛ kɛŋɔ bá saɡɔ nyundua ɔ? Umee Nɛn Bie nɔ kwaraa te nɔ?”

³⁵ Anee Yeesu ŋɔ ba be ŋɔ, “Bɔr taa dɛ chaah he nɛɛ tɔpera anɛ nɔ, hɛ́ɛ valɛ o ta. Dɛ ɡɛ laa aa, bɔr ɛɛ biruu he nɛ. Nomɛlbwa waa dɛ valɛ biro ta la aa bela waa dɛ kaa jemɛ.

³⁶ Bɔr taa dɛ chaah he nɛɛ nɔ, hé yarada bochaah la dɛ berɛ bochaah nɛra.” Yeesu aa bol ɡɛ waa nɔ tonɛ la, o le ba baah asɛ dɛ ka sɔh.

Yeesu waa la bɛ yaradae

³⁷ O ɛ nyokpowaa kohona ba siwi ta, kɛ ane abwa, ba ta on yaradae.

³⁸ Anɔ dɛ baɡle kɛ Korowii keame Aesaya waa waa bola la ɛ kpela. O bolɔ ŋɔ, “N Dɔɔ, umee dɛ́ fe yarada waa yaa dɛ bol nɔɔ? Umee dɛ́ fe jemɛ kɛŋɔ Korowiirii ɛaɔ?”

³⁹ Gɛɛ a do ba ta waa la yaradae, asɛ Aesaya berɛ bol ja ŋɔ,

⁴⁰ “Korowii tɔɔɡe ba sie, dɛ ɡel ba bambile do kpeɡri, ɡɛ aa ɛ ba sibie bɛ na, ásɛ ba liiree bini bɛ chaah ba no a mun, á ba ɛ kɛ baa charɛ ba liire dɛ́ ba o be ó chaah ba.”

⁴¹ Yeesu jirimaa Aesaya na asɛ dɛ bol o waa ɡɛ la.

⁴² Juu tena nomonome kɛrɛdɛ ɡba yarada Yeesu, kɛ baa dɛ ɔmɛ Farisii tena nomanta, ba ta bolɛ nomɛlbwa no, dɛkalkɛ dɛ ba bolaa, aa ɡeloo ba doŋ ba cheremi dea joe.

⁴³ Nɛra bee baa nyin sɔn dɛ ɡwaa kɛ Korowii aa tɛɛ ba sɔn.

⁴⁴ Belaa Yeesu kpɔ takpeɡ dɛ ŋɔ, “Nomɛlbwa waa yarada mɛ la, n laa wɛɛ yarada. Naate waa tom mɛ laanee wɛɛ yarada la.

⁴⁵ Nomɛlbwa waa na mɛ la, dɛ naate waa tom mɛ laanee o na ɡɛ la.

⁴⁶ N ba harɛ nɔ ta kɛŋɔ kandea dɛ baa chaah nɛra bwa, ásɛ nomɛlbwa waa yarada mɛ la bɛ biro ta do kpa.

⁴⁷ Dɛ nɛn no n waa la dɛ waa a ta teŋaa, n laa dɛ bol o waa dɛ́ pa bole, dɛkalkɛ nɛra waa bola dɛ́ pa bole waa laa n ba harɛ nɔ ta. Nɛra bwa lɛɛ waa n ba.

⁴⁸ Kɛ nɛn waa vɛh n ne n waa maa dɛ bol la ɛɛ di bolchɔɡee. N waa maa dɛ bol nɔɔ dɛ́ pao bolchɔɡe tɔpere bwa jaɡa wee.

⁴⁹ Dɛkalkɛ n ɡbabir kpeɡri ne laa mɛɛ bol waa nɔ. N Mɛɛ waa tom mɛ laanee do mɛ dɛ chaɡ mɛ ɡɛ maa bol o wa.

⁵⁰ N jemɔ kɛŋɔ o waa la dɛ́ tɛ mkpa aa wola jaɡa dɔe, anomanta, anɔ la waa bol n be laanee n ɡee bol.”