Amanesoma Jɔn Aa Chwera Tɔn 11 - mzwDBL

Lasorɔs seo wa

¹ Baa bɛlee fa lole baa yerɔ Lasorɔs. Dɛ o bwara dɛ weo. Bwɛɛ waa lɔ o ta sɔne Bɛtani. Dɛ ɡɛ bwɛɛ nɔ taa Mɛɛre ne o nahaah Maata ɡe do.

² A ɡɛ Mɛɛre nɔɔ fa fuɡe nosɔɔhsoma ɛ Yeesu nakpale dɛ kpɔ o nyumpona feera la. O nimambiee Lasorɔs o bwara aa dɛ weo nɔ.

³ Asɛ o nimambii la tomɛ nɛra ba ka ŋɔ Yeesu be ŋɔ, “N Dɔɔ, he dandɛɛɡe la bwara dɛ weo.”

⁴ Yeesu aa no ɡɛ la, belaa o ŋɔ, “Serewe weela laa wɛɛ we nɔ. Gɛ aa ɛ Korowii dɔ jirima ásɛ a che a ta Korowii Bie la ɡe dɔ jirima waa a ba ɡɛ.”

⁵ Dɛ Yeesu dɛ nyin Maata ne Mɛɛre ne Lasorɔs bwa taeh.

⁶ Kɛ waa no Lasorɔs weela waa la, o soɡe bela tɔpera anɛ mɔɔ.

⁷ A habɔɔ la, o ŋɔ o habɔteŋra la be ŋɔ, “Hé ɡel ya berɛ kaa Juda harɛ ta.”

⁸ Anee ba ŋɔ, “N Dɔɔ, he laa baah bɛl ta bela tena fe ɛɛ nyini dɛ́ foɡre bwea kpo la kɛɛ, ɡɛɛ he berɛ dɛɛ nyin bela laŋa taraken ja aa?”

⁹ Anee o chaŋe ŋɔ, “Le chɔɔ wee aa le ka tel jɔmɔra wee aa jo la, dɔŋhwere fi dɛ anɛ laa aa? Dɛ bɔr chaahnɔ nɛn ɛɛ valaa, waa naa lɔ bwa, dɛkalkɛ wee leɔ bɔr chaah.

¹⁰ Kɛ dɛ nɛn dɛ valɛ biro ta naa, anee wɛɛ lɔ na, dɛkalkɛ o ta kon dɔe wɛɛ chaahno bɔr. Korowiirii wola o sie chaahnɛ la.”

¹¹ Waa bol ɡɛ tonɛ la, o berɔ ŋɔ, “Domii ya dam Lasorɔs chɔ, anomanta, mɛɛ lao dɛ́ ka chumu.”

¹² Belaa o habɔteŋra la chaŋo ŋɔ, “N Dɔɔ, dɛ domii o chɔ te naa, wɛɛ iruu dɛ́ dɔ bokpeɡa.”

¹³ Dɛ Lasorɔs seo waa wɛɛ bol ba be, asɛ ba ɡe ta a mun noɛ dɛɛ lii o dom chɔe waa la.

¹⁴ Belaa Yeesu pili a bini chasee ŋɔ, “Lasorɔs sewɔ.

¹⁵ Kɛ he nomanta, a do n som kɛ maa wola toole bela o sewɛ, dɛkalkɛŋɔ an dɛ́ ɡel he yarada mɛ. Hé ir yá kaa o be bela!”

¹⁶ Belaa Tɔmas baa dɛ yerɔ Didimas la ŋɔ o bala Yeesu habɔteŋra la be ŋɔ, “Hé ɡel ya pu nomoa ásɛ ya ne o bwa kaa, dɛ seo kwaraa yaa, yá ne ó sewɛ.”

Yeesuu dɛɛ chum nɛra seo ta dɛɛ tɛ mkpa

¹⁷ Baa tel bela la, Yeesu noɔ kɛŋɔ Lasorɔs sewɔ ba huɡo o dɔ tɔpera anaarɛ.

¹⁸ Bɛtani ne Jerusalam baah ɛɛ ɛ kwansini anɛɛ.

¹⁹ Asɛ Juu tena warɛ dɛ ba Maata ne Mɛɛre be dɛ baa bwɛɛ ba ba nimambie la seo wa.

²⁰ Maata aa noa kɛŋɔ Yeesu dɛ ba la, o leɔ dɛ ka chemo, asɛ Mɛɛre te ta so dem.

²¹ Maata aa chemo la, o ŋɔ o be ŋɔ, “N Dɔɔ, he fe lɔ bonɔ naa, n nimambie nɔ fe ta sewɛ nɔ.

²² Kɛ n jemɔ kɛŋɔ taraken kwara, komɛlbwa haa soŋe Korowii la, wɛɛ ɛo tɛɛ.”

²³ Belaa o chaŋo ŋɔ, “He nimambie la ɛɛ ir seo taa dɛ́ dɔ mkpa.”

²⁴ Anee Maata ŋɔ, “N jemɔ kɛ tɔpera bwa jaɡa wee la lala bwa aa ir seo ta la, o ɡee iruu.”

²⁵ Asɛ Yeesu ŋɔ o be ŋɔ, “Menee dɛɛ chum nɛra seo ta, menee dɛɛ tɛɛ ba mkpa. Nomɛlbwa waa yarada mɛ la, dɛ o sewɔ kwaraa naa, wɛɛ dɔ mkpaa.

²⁶ Asɛ nomɛlbwa waa soɡe le dɛɛ yarada mɛ la, wɛɛ dɔ mkpaa, waa sewɛ bwa. He dɛ yarada ɡɛ waa nɔ naa?”

²⁷ Anee o sɛh ŋɔ, “Ɔɔh, n Dɔɔ, n yaradao kɛŋɔ henee Korowii Bie Kristo baa bola ŋɔ wɛɛ ba harɛ nɔ taa la.”

Yeesu aa wia wa

²⁸ Maata aa bol ɡɛ tonɛ la, o berɔ la dem dɛ ka sɔh bol Mɛɛre be ŋɔ, “Nomoa la balɔ dɛɛ pɛɛ he wa.”

²⁹ Mɛɛre aa no ɡɛ la, o iro warane asɛ dɛɛ kaa o be.

³⁰ Dɛ Yeesu ta bwɛɛ bini joɛ mɔɔ. Dɛ o ta lɔ bela Maata aa baa chemo la.

³¹ Juu tena bane baa lɔ Mɛɛre be dem bela dɛɛ larawe o bwara la aa naa kɛŋɔ o iro dɛ ɛ warane le buse la, ba ɡe iro teŋɛ dɛɛ lii kɛŋɔ o ken dɛ kaa bela baa bil o nimambie la ka wi.

³² Mɛɛre aa tel bela Yeesu aa lole asɛ dɛ nao la, o kaa ɡuŋi o sie dɛ ŋɔ, “Nomoa, he fe lɔ bonɔ naa, n nimambie nɔ fe ta sewɛ nɔ.”

³³ Yeesu aa na ɡɛ waa dɛ wi asɛ Juu tena baa teŋɛ o nɛɛ la ɡe ɛɛ wi la, o loo kuu asɛ chal valɛ o bwara bini.

³⁴ Belaa o pɛɛ ba ŋɔ, “Leperaa he bilu wɔ?” Anee ba ŋɔ, “N Dɔɔ, ba dɛ́ ba na.”

³⁵ Yeesu wio.

³⁶ Asɛ Juu tena la ɛɛ bol dɔŋa be ŋɔ, “Hé na nyina waa dɛ nyinu dɛɛ wi ɡɛ!”

³⁷ Bane ɡe ŋɔ, “Baa nɔ laa wona ɡel nyoŋe na la aa? Dɛ o lɔ bonɔ naa, o fe ta wone chah onɔ o fe bɛ sewaa?”

Yeesu ir Lasorɔs seo ta

³⁸ Belaa Yeesu loo ku, chal valɛ o bwara bini ja, asɛ ba la bela Lasorɔs aa chɔa la. O bɔɔ la, bwee ba komɛ dɛ ɡbili bwe tɔ o nyoa.

³⁹ Yeesu ŋɔ ba be ŋɔ, “Hé laa bwe la ɡbili le bɔɔ la nyoa.” Belaa Maata waa ɛ Lasorɔs nimambie la ŋɔ o be ŋɔ. “N Dɔɔ, taraken o ken ka chɔɡɔ dɛ do sɔɔh, dɛkalkɛ o tɔpera anaarɛɛ la.”

⁴⁰ Anee Yeesu ŋɔ o be ŋɔ, “N ta ŋɔe ŋɔ dɛ he yarada mɛ naa, hɛɛ na ɡɛ Korowii aa dɔ jirimaa yaa?”

⁴¹ Ba laa bwe la ɡbili le bɔɔ la nyoa, asɛ Yeesu ha sie nyundua dɛ ŋɔ, “N Mɛɛ, n dɛ jaame kɛ haa dɛ no n wa.

⁴² N te jemɔ kɛ tɔpere bwaa hɛɛ no n wa. Nɛra baa ja n nɛɛ bonɔ nɔ waa mɛɛ bol ɡɛ, ásɛ ba won jemɛ kɛŋɔ henee tom mɛ la.”

⁴³ Waa bol ɡɛ tonɛ la, o kpɔ takpeɡ dɛ yerɛ lale la ŋɔ, “Lasorɔs, le ba!”

⁴⁴ Asɛ o ir dɛ le bɔɔ la bini. Dɛ yal baa kpɔa vɔrɔwe o nakpale ne o nɔɔra la ta vɔwɔ ɡɛ, asɛ botire ɡe vɔwɛ o nyu. Anee Yeesu ŋɔ ba be ŋɔ, “Hé pur laala la bwa ásɛ o kaa.”

Yeesu kpoe vɔrɔwa

⁴⁵ Juu tena la baa ba Mɛɛre be la aa na ɡɛ waa nɔ Yeesu aa ɛa la, ba kɛrɛdɛ yaradao.

⁴⁶ Kɛ ba bini bane te berɔ la Farisii tena la be, asɛ dɛ ka bol waa Yeesu aa ɛa la bwa.

⁴⁷ Anomanta, Sɔfonomonome ne Farisii tena kaa cheme ba Juu tena nomonome baa dɛ nyiŋi ba waa bini la, dɛ ŋɔ, “Aah, ɛrɛɛ yaa ba ɛɛ taraken ɔ? Na nyokpowe-ɛɛla nɔ bwa dɔŋa baa nɔ aa dɛ ɛ.

⁴⁸ Dɛ ya ɡelo waa, nɛra kɛrɛdɛ bwa ɛɛ yaradao, ásɛ a che a ta ya dɔɔranar Rom tena dɔ bɔr dɛ́ ba lɛ ya Korowii Dea nɔ ne harɛ nɔ bwa kpeɡri dɛɛ di.”

⁴⁹ Belaa ba bini bɛl baa dɛ yerɔ Kaefas o ɛ Sɔfonomoa a ɡɛ benanyoa la ta la ŋɔ, “He ta liire dɔe ken aa?

⁵⁰ Nɛmbeŋkpoŋ lɛ nɛra bwa seo dɛ sewaa, a ta bɔ kɛ harɛbir bwa aa paɡra aa?”

⁵¹ Kaefas ɡbaɡba liire laa o kpɔ bol ɡɛ waa nɔ. Waa ɛ Sɔfonomoa laanee Korowii tɛo ɡɛ liire la o bola ŋɔ Yeesu ɛɛ lɛ Juu tena bwa sewee sewɛ la.

⁵² Juu tena ɡbo laa. Ba ne Korowii nɛra baa lɔ bobɛlbwa la bwa sewee wɛɛ ba lɛɛ sewɛ dɛ́ lawɛ ba bwa pɛ, ásɛ ba ɛ beŋkpoŋ.

⁵³ Awolaa ba le pɛ nyoa dɛɛ nyin Yeesu dɛ́ kpo.

⁵⁴ Anomanta, dɛ waa o te kpɔe dɛɛ jo Juu tena la bini kpa. O joɔ kaa pua hɛŋle ɡbo harɛ bwɛɛ bɛl baa dɛ yerɔ Efrem ta, asɛ o ne o habɔteŋra la ka so bela.

⁵⁵ Juu tena Galekaa Tɔpejen la aa dɛ tel la, nɛra kɛrɛdɛ le ba bwɛɛre ta dɛ kaa Jerusalam dɛ kaa ɛ we-ɛɛla ane dɛ́ laa doŋa kpɔ ba nɛɛ dɛ́ won di tɔpere la.

⁵⁶ Belaa nɛra baa ba Jerusalam la ɛɛ ɡaaɡe Yeesu bɔr dɛ che Korowii Dea dɛɛ pɛɛ dɔŋa ŋɔ, “Wɛɛ ba ya tɔpejen nɔ taa kɛɛ waa ba nɔ? Ɛrɛɛ hɛɛ lii rɔ?”

⁵⁷ Dɛ Sɔfonomonome la ne Farisii tena la te dɔɔ bol ŋɔ, dɛ nomɛlbwa jemɛ bela waa lole naa, ó baɡ ba ásɛ ba ka lawɔ.