Amanesoma Jɔn Aa Chwera Tɔn 1 - mzwDBL

Yeesu waa ɛ Korowii Nyoa Wobol la wa

¹ Wobɛlbwa mumpar Korowii aa wola nyundua ne harɛ tae mɔɔ la, dɛ Korowii Nyoa Wobol la lole. Dɛ o ne Korowiirii lole, asɛ o ne o bwa ɛ beŋkpoŋ.

² Dɛ onee ja Korowii nɛɛ mumpar la.

³ O nɛɛ Korowii che dɛ ta komɛlbwa. Kontaale bɛlbwa toole waa wola o nɛɛ cheɡɛ dɛ tao.

⁴ Korowii Nyoa Wobol la bee Korowii mkpa do, asɛ ɡɛ mkpa nɔ ɡe ɛ kɛŋɔ nii dɛɛ chaah nɛwɛnyini sie.

⁵ Nii nɔ lole dɛɛ chaah biro ta, kɛ biro ta wone tɔɔ ŋwɛnɛ ó chaah bɔr kahonɛ bwa.

⁶ Dɛ baa bɛl lole baa yerɔ Jɔn. Korowiirii tomɔ

⁷ ŋɔ ó ba bol nii la waa dɛ chaah nɛwɛnyini sie la waa nɛra be, ásɛ ba no dɛ yarada.

⁸ Dɛ Jɔn ɡbaɡba laa ɡɛ nii la. Balaa o ba dɛ ba bol nɛn waa ɛ nii tenten la waa ásɛ nɛra jemɛ o wa.

⁹ Korowii Nyoa Wobol laanee nii kasinteŋ waa dɛ ba harɛ nɔ ta dɛ́ ba pili nɛwɛnyini sie la.

¹⁰ O nɛɛ Korowii che dɛ ta nɛwɛnyini, kɛ waa ba harɛ ta bonɔ la, nɛwɛnyini ta on jemɛ.

¹¹ O ba o ɡbaɡba harɛ ta, asɛ o ɡbaɡba nɛra vɛoh.

¹² Kɛ nɛra la te bwa baa lɛo dɛ yaradao la, o tɛɛ ba kpeɡri kɛŋɔ bá ɛ Korowii bii.

¹³ Ŋwɛnɛ nɛwɛnyini aa cheɡɛ o ta dɛɛ lolɛ bii la, kɛɛ nɛwɛnyini pɛla, kɛɛ nɛwɛnyini tetoora ta laa ba lol ba ba ɛ Korowii bii. Korowii kpeɡri taa a che ba berɛ o bii.

¹⁴ Korowii Nyoa Wobol la baa berɛ nɛwɛnyini, dɛ ba so ya be. Ya na o jirima waa dɔa, dɛ jemɛ kɛŋɔ Korowii Bibeŋkpoŋ laanee on. Dɛ o wobɛlbwa wer, asɛ o dɔ kasinteŋ ɡe kohona.

¹⁵ O waa Jɔn faa bol kohona dɛɛ ŋɔ, “Nɛn n fa aa dɛ bol o waa dɛ ŋɔ men tɔ sie o nɛɛ kɛ o ɡwaa mɛ, dɛkalkɛŋɔ o lole mɔɔ ba lol mɛ la, on la.”

¹⁶ Korowii chao kohona asɛ o ɡe na ya sum dɛɛ tɛ yaa andɛɛɡa saŋ bɛlbwa, waa wola ɡel bwa.

¹⁷ Mosis nɛɛ Korowii che dɛ ba Mmara la ne. Yeesu Kristo ɡe nɛɛ nɛn nɛɛ suna ne kasinteŋ bwa che dɛ ba harɛ ta.

¹⁸ Nomɛlbwa ta Korowii nae bwa. O Bibeŋkpoŋ waa pɛlo la, on ɡela nɛwɛnyini jemɔ.

Jɔn waa dɛ sɔ nɛra Korowii nee webaɡla

¹⁹ A wola bɛl, Juu tena nomonome baa lɔ Jerusalam la tomɛ ba sɔfore ne Lewi dea tena ŋɔ bá ka bɔɔ Jɔn o nɛnsoo. Waa waa bola dɛ kpɔ di Yeesu danseɛ laanee nɔ.

²⁰ Baa bɔɔro ɡɛ la, o ta nyoa tɔe. O bol kasinteŋ ŋɔ, “Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa la laa men.”

²¹ Anee ba bɔɔro ŋɔ, “Aah dɛ umee hen ɔ? Elaejaa hen kɛɛ?” Asɛ o ŋɔ, “O laa men.” Anee ba ŋɔ, “Korowii keame laanee hen kɛɛ?” Asɛ o ŋɔ, “Akai.”

²² Belaa ba ŋɔ, “Baɡle he nɛnsoo yá jemɛ, dɛ́ won dɔ wobɛl ka bol nɛra baa tomɛ yaa la be. Nɛn besoo hɛɛ lii he te nɔ?”

²³ Belaa Jɔn kpɔ Korowii keame Aesaya waa o fa aa bola la chaŋ ba ŋɔ, “Menee naate waa dɛ bol waa takpeɡ ne pua hɛŋle ɡbo harɛ ta dɛ ŋɔ, ‘Hé ɡel he we-ɛɛla toɡre, dɛ́ kpɔ he te dɛɛ kpa he Dɔɔ bala’ la.”

²⁴ Anee nɛra Farisii tena la aa tom ba la

²⁵ bɔɔ Jɔn ŋɔ, “He ŋɔ Kristo la laa hen, Elaeja ɡe laa hen, Korowii keame la ɡe laa hen, aah dɛ ɛrɛɛ he ɛ dɛ won dɛɛ sɔ nɛra Korowii neɔ?”

²⁶ Belaa Jɔn ŋɔ, “Nee n te kpɔ dɛɛ sɔ nɛra Korowii ne. Nomɛl lɔ he bini taraken haa wola on jemɛ.

²⁷ Men bala mɔɔ o ba, kɛ o ɡwaa mɛ. Maa o napaa tee kwaraa dɔ.”

²⁸ Bwɛɛ baa dɛ yerɔ Bɛtani o do Jɔɔdan Moo la wee leebɔr pera la, belaa a ɡɛ waa nɔ chiɡ. Dɛ belaa Jɔn ɛɛ sɔ nɛra Korowii ne.

Yeesu Korowii pebie la wa

²⁹ Tɔ aa pera la, Jɔn na Yeesu kɛŋɔ waa dɛ ba o be. Belaa Jɔn ŋɔ nɛra o ne baa cheɡa la be ŋɔ, “Hé na Korowii Pebie waa dɛ ba nɛra bwa wechɔɡa laa dɛ́ kpɔ ba nɛɛ la!

³⁰ O waa n faa bol ŋɔ, ‘Nomɛl lɔ n habɔɔ dɛɛ ba, dɛ ɡwaa mɛ, dɛkalkɛ o lole mɔɔ ba lol mɛ’ la.

³¹ Dɛ n ɡbabir fa aa on jemɛ, kɛ o waa n ba dɛ baa sɔ nɛra Korowii nee ásɛ Israel tena jemɔ.”

³² Jɔn bol Yeesu waa ja ŋɔ, “N na Korowii Doma la aa le nyundua kɛŋɔ borɔnoma, dɛ ba so o nɛ.

³³ N te fe aa jemɛ kɛ onee, kɛ Korowii waa lee mɛ ŋɔ ń ba kpɔ nee dɛɛ sɔ nɛra Korowii nee laanee ɡela n jemɔ. O ŋɔ n be ŋɔ, ‘Hɛɛ na n Doma laanee o ba so naate nɛ. On dɛɛ ba n Domadɛɛɡe kpɔe dɛ sɔ nɛra la.’

³⁴ A ɡɛ waa nɔ chiɡo n na, anomanta, n dɛ ŋɔ he be ŋɔ Korowii Biee on.”

Yeesu aa kpɔ o loɡla habɔteŋra wa

³⁵ Tɔ aa pera la, dɛ Jɔn ne o habɔteŋra banɛ cheɡɛ bela ja.

³⁶ O na Yeesu o baa kaa, asɛ dɛ ŋɔ, “Hé na Korowii Pebie la!”

³⁷ Waa ŋɔ ɡɛ la, o habɔteŋra banɛ la noɔ, dɛ ka teŋɛ Yeesu nɛ.

³⁸ Belaa Yeesu ke nyiŋi dɛ na kɛ baa teŋɛ o nɛ, asɛ o bɔɔ ba ŋɔ, “Bɔkwaa hɛɛ nyin ɔ?” Asɛ ba bɔɔro ŋɔ, “Rabae, lee he dem doɔ?” Rabae munii nɛn waa dɛ chaɡle wa.

³⁹ Belaa o ŋɔ, “Hé ba na.” Asɛ ba la dɛ ka na o dem. Dɛ a bɔ jɔmɔra dɔŋ anaarɛ, asɛ ba so o be bela wee ba jo.

⁴⁰ Dɛ Andriu ɛ nɛra banɛ la Jɔn aa bol waa ba no dɛ teŋɛ Yeesu nɛɛ la bini bɛl. Seemɔn Pita nimee on.

⁴¹ Waa waa tɔ sie ɛ laanee kɛŋɔ o kaa nyin o dɔɔ Seemɔn bɔr, dɛ ŋɔ o be ŋɔ, “Ya na Mɛsaya la.” Mɛsaya munii Kristo.

⁴² O la Seemɔn ne Yeesu be. Belaa Yeesu nyiŋu dɛ ŋɔ, “He sɔne Seemɔn. Jɔn biee hen. Taraken baa dɛɛ yerɛɛ Sefas.”

Yeesu yerɛ Felep ne Nataaneɛl

⁴³ Tɔ aa pera la, Yeesu ɛo kɛŋɔ wɛɛ la Galilia harɛ taa. O kaa na Felep dɛ ŋɔ o be ŋɔ, “Baa teŋɛ n nɛ!”

⁴⁴ Dɛ Felep bwɛɛ Bɛtsaeda, belaa Andriu ne Pita ɡe le.

⁴⁵ Felep ɡe kaa na Nataaneɛl, dɛ ŋɔ o be ŋɔ, “Ya na naate Mosis aa chwerɛ o waa Korowii Tɔn bini la. O waa Korowii keamere la ɡe chwerɛ la. O sɔne Yeesu. Josef waa le Nasarɛt la biee.”

⁴⁶ Belaa Nataaneɛl ŋɔ, “Nasarɛt ɡe, kondɛɛɡe besoo dɛ́ won le bela ɔ?” Anee Felep ŋɔ, “Ba ba na nɔ!”

⁴⁷ Yeesu aa na Nataaneɛl wɛɛ ba o be la, o ŋɔ, “Israel te tentenee nɔ. O waa dɔ kasinteŋ kɛrɛdɛ!”

⁴⁸ Belaa Nataaneɛl bɔɔro ŋɔ, “Ɛrɛɛ he ɛ jem mɛ nɔ?” Asɛ Yeesu chaŋo ŋɔ, “Haa lɔ fiɡ la mun la, n nae mɔɔ Felep ka yerɛ la.”

⁴⁹ Anee Nataaneɛl ŋɔ, “Nomoa, Korowii Biee hen. Henee Israel tena Kooro la.”

⁵⁰ Asɛ Yeesu ŋɔ o be ŋɔ, “Maa ŋɔ he be ŋɔ n nae fiɡ la mun la waa he den yarada mɛ nɔ naa? Hɛɛ na wejenaa a ɡwaa anɔ!”

⁵¹ Yeesu ŋɔ ba be ŋɔ, “Kasinteŋ, n dɛ ŋɔ he be, hɛɛ nao nyundua aa pila, ásɛ nyundua toroma che bela tu dɛɛ ba Men Nɛn Bie be, dɛ berɛ teeh dɛɛ kaa.”