Jeremia 9 - mzwDBL

¹ Jeremia berɔ ŋɔ, “N nyu bini fe do kɛŋɔ bule bini ne, asɛ n siniire do kɛŋɔ nenapale aa, n fe ɛɛ wiu chɔɔ ne jwaana, kpoora baa kpoo n nɛra la wa.

² N dɛ nyin kɛ n fe aa dɔ bobɛl ka so pua hɛŋle ɡbo harɛ ta, dɛ́ le bela n nɛra aa lole. Ba bwa waa ta kasinteŋ dɔe, dɛ ɛ nɛnchɔɡa ɡbosoroo.

³ Ba dɛ kpa saŋ bɛlbwa kɛŋɔ bá teŋe nyosone kɛŋɔ ba yon harɛ hɛm dɛ́ tao la ken. Ba ta sɛɛh dɛɛ bol kasinteŋ.” Anomanta, Korowii ŋɔ, “N nɛra ɛ wechɔɡa aa, ba yon berɛ ka ɛ ane ja, baa jemɛ kɛ menee Korowii aa chɛ kɛ bá tom mɛ.

⁴ Hɛ́ɛ nyiŋi he daamanar kɛrɛdɛ, dɛɛ berɛ he hwɛɡa kpɔe do he lolanar nɛ, dɛkalkɛ ba bɛlbwa ɛ nyosonteŋni, asɛ daamanar ɡe ɛɛ chɔɡ dɔŋa.

⁵ Dam dɛ neɡre o dɔŋ, bɛlbwa aa kasinteŋ bol. Nyosone ɡboo su ba nyoo, baa koh wechɔɡa ɛɛ ta.

⁶ Jeremia, nyosonteŋna binii he so, ba nyosone teŋa nomanta, ba vɛɛh mɛ kɛ menee Korowii baa dɛ tom mɛ. Men Korowiirii bola.”

⁷ Anomanta, Koranar Bwa Kooro ŋɔ, “Mɛɛ do n nɛra nii taa, dɛ́ daah ba na kɛŋɔ ba yon kpɔ buni do nii ta la ken. Bɔkwaa mɛɛ ba ɛɛ n nɛra wechɔɡa waa jaɔ?

⁸ Ba nyoa wobol do kɛŋɔ hɛm waa dɛ kpo ken, wechɔɡa ɡboo baa bol. Nyoa wobol ɡbo nee baa lea dɔŋa, kɛ ba bambile bini te ta chaahnɛ, ba dɛ haɡre dɔŋa bela.

⁹ A ta chɛ kɛŋɔ ń tɛr ba deŋne waa nɔ wa aa? A ta chɛ kɛ ń bɔ harɛ waa do ken nɔ nɛra kem aa? Men Korowiirii bola.”

¹⁰ Belaa n ŋɔ, “Mɛɛ wiu dɛɛ dooɡe lɔŋɔre bwejena wa, dɛ taa wiile pua hɛŋle ɡbo harɛ, kondɛɛra dibɔra la wa. A bwa berɛ dimɡbia, nomɛlbwa aa a ta kpɔ, bɛlbwa aa nae ɡbɔɡa ɡe no. Jumbii bwa iro kaa, kpɔɡ bini ola ɡe bwa chwa kaa.”

¹¹ Korowii ŋɔ, “Mɛɛ paɡre Jerusalamee o berɛ dimɡbia, ásɛ kalampoŋare kpɔ bela berɛ a sobɔr, dɛ́ chɔɡ Juda harɛ bwɛɛre, nomɛlbwa aa wola won so a ta.”

¹² Asɛ n bɔɔ ŋɔ, “N Naa Korowii, umee dɔ wejema kohona dɛ́ won no waa nɔ mun ɔ? Umee he le ŋɔ ó won baɡle a bini nɔ? Bɔkwa waa harɛ nɔ chɔ pɛɛ kɛŋɔ pua hɛŋle ɡbo harɛ nɛra aa wola o ta kpɔ kpa nɔɔ?”

¹³ Anee Korowii chaŋe ŋɔ, “Baa vɛh n webaɡla maa kpɔa tɛɛ ba la waa, ba ta duure kpɔe tɛ mɛ, kɛɛ dɛɛ teŋɛ me Mmarare ta.

¹⁴ Kɛ ba ɡarɔ teŋɛ ba bambikpeɡ we-ɛɛla ta. Voɡa Baalre nɛɛ ba teŋɛ dɛɛ toma, ɡɛ ba naawa aa baɡ ba la.

¹⁵ Anomanta, kenii men Koranar Bwa Kooro, Israel tena aa dɛ tom mɛ la ɛɛ bol, ‘Mɛɛ do tɛɡchɔɡa kondikwaa ne nee taa tɛ nɛra nɔ ba di.

¹⁶ Mɛɛ lɔ baa peɡre harɛre ba ɡbabir kɛɛ ba naawa aa wola an jemɛ ta. Dɛ ɡel laa tena ti ba ka tel kɛŋɔ baa kpoo ba bwa kwaraa.’ ”

Jerusalam tena wio dɛɛ nyin chae

¹⁷ Waa Koranar Bwa Kooro aa dɛ bol laanee nɔ. “Hé nyiŋi waa aa chiɡa nɔ! Hé yerɛ haahna baa dɛ wi, haahna baa jemɛ wiile taara kɛrɛdɛ la, hé yer ba, bá ba.”

¹⁸ Anee nɛra la ŋɔ, “Hé ɡel ba ba warane, dɛ́ ba taa wiile tɛ yaa, ka tel kɛŋɔ siniire aa su ya sibie dɛɛ yɔɔ yaa.

¹⁹ Hɛ́ɛ no wii ɡbɔɡa aa dɛ le Saayɔn. Ba ŋɔ, ‘Akwe, ya chɔɡɔ! Sihiih kpo yaa kɛrɛdɛ. A chɛ kɛŋɔ yá le ya harɛ nɔ ta, ya soŋnibɔra bwa paɡrɔ.’ ”

²⁰ Belaa Jeremia ŋɔ, “Haahna, hé cheɡ deŋne Korowii be, dɛ́ɛ no waa waa dɛ bol. Hé chaɡle he bihaahna ɡɛ baa dɛ wi, ne he daamanar ɡɛ baa dɛ taa wiile.

²¹ Seo do kɛŋɔ nɛnchɔɡe dɛ che ya tokorore ta jo ya deremi. Bechale serewɔ chɔ fɔɡbaahna, asɛ bonɔɔna ɡe serewe chɔ cheremibɔra.

²² Waa Korowii aa ŋɔa n bol laanee nɔ. ‘Nɛra serewɔ chɔ bobɛlbwa kɛŋɔ haahra aa chɔ kpɔɡ bini ken. A do kɛ nɛra aa kuuɡi boyu a daŋɛ chɔ ba habɔɔ nomɛlbwa aa wola toole dɛ́ boa a nyoa.’ ”

²³ Korowii ŋɔ, “Wejerema bɛ mbarafo ɛ ba wejema baa dɔa wa, bokpeɡa tena bɛ ba te dɛɛ maŋkura ba bokpeɡa baa dɔa wa, kɛɛ dɔɔh kpɔ o te dawɛ o kondɔɔh ta.

²⁴ Nomɛlbwa waa dɛ nyin o te maŋkurae la, wɛɛ maŋkura o te kɛŋɔ o jemɛ men Korowii dɛɛ no n waa mun, dɛkalkɛ n nyina lole saŋ bɛlbwa dɛɛ la. N waa wer dɛ toɡre ɡe, dɛkalkɛ a ɡɛ waa nɔɔ dɛɛ lɛ n sie. Men Korowiirii bola.

²⁵ Saŋ bɛl dɛ ba ń tɛr nɛra baa teŋe ba pena ɡbo, men Korowii wa aa wola toole ba bambile bini la deŋne.

²⁶ Banee Ijipt ne Juda ne Edom ne Amɔn ne Moab tena, dɛ nɛra baa lɔ pua hɛŋle ɡbo harɛ ta, dɛ do bojaŋ harɛre ta la. Dɛkalkɛ a ɡɛ harɛre nɔ nɛra ne Israel tena ta n waa kpɔe do ba bambile bini.”