Jeremia 8 - mzwDBL

¹ Korowii ŋɔ, “A ɡɛ saŋ la, baa pa Juda koranar ne nomonome, ne sɔfore ne Korowii keamere, dɛ banɔ la baa jaa dɛ fa so Jerusalam la hoɡaa le ba lalbɔɔne bini.

² A fe aa chɛ kɛ bá boa a nyoa dɛ́ ka huɡa la, aa chɔɔ kɛŋɔ haahra aa ɡela harɛ ɛɛ do wer ken harɛ la bobɛlbwa. Baa pa hoɡa laanee nyenɛ, ásɛ wee ne korobie ne weweela aa do kɛ voɡare a ɡɛ nɛra nɔ aa nyina kohona dɛɛ toma, dɛ kaa bɔɔ ba nyu waa a be la ɛɛ lɔ a ta.

³ Ásɛ nyubinikpeɡ tena baa ka dɛ́ so harɛ la ta la, banɔ la men Korowii aa lɔ ba peɡre ba so bobɛla ɛɛ dɛɛ nyinu kɛŋɔ, ba fe serewe ɡwaa kɛ ba taa soɡe le. Men Nemenɛ Korowiirii bola.”

Wechɔɡa ne deŋnetɛra wa

⁴ Korowii ŋɔ men Jeremia bol o nɛra be ŋɔ, “Nɛn cholaa, waa berɛ dɛɛ ir kpa aa? Nɛn nyoɡre ŋwɛnɛ aa, waa habɔɔ berɛ aa?

⁵ Bɔkwa waa bala nɛra nɔ berɛ habɔɔ kpo mɛ nɔɔ? Ɛrɛɛ saŋ bɛlbwa Jerusalam tena ɛɛ le habɔɔ nɔɔ? Ba sie ta dɛ lɛ waa aa ɛ nyosone ta, baa nyin kɛ bá berɛ ba n be.

⁶ N cheɡ deŋne dɛɛ no ba be, kɛ baa kasinteŋ bol. Nomɛlbwa aa lii kɛŋɔ wɛɛ charɛ o liiree dɛ́ bɔɔ ŋɔ, ‘Bɔkwa waa n ɛɔ?’ Bɛlbwa ne o ŋwɛnɛ waa dɛ kpɔ o taa kɛŋɔ jaaɡɔ o sie aa beɡra baa kaa o ne laa ta ken.

⁷ Hale chaŋɡale aa dɛ ɡah nyundua ɡba jemɛ komɛlbwa saŋ, ɡɛɛ kwehre ne konkolombiiri bwa ɡe jemɛ saŋ aa kpɔa dɛɛ ɡaaɡe sobɔrfala. Kɛ n nɛra te aa jemɛ waa maa dɛ nyin dɛɛ teŋɛ a ta.

⁸ Ɛrɛɛ hɛɛ ba wona ŋɔ he jemɛ wa dɛ jemɛ me Mmarare la ɡeɔ? Nɛra baa dɛ chwerɛ Mmarare la bera, dɛ́ neɡre heya.

⁹ Sihiih ɛɛ kpo wejerema la bwaa, baa wiluu á do kɛŋɔ bel aa laɡ ba. Baa vɛh n waa la nomanta, ba ta wejema bɛlbwa dɔe kpa.

¹⁰ Anomanta, mɛɛ kpɔ ba haahnaa tɛ jafala, dɛ kpɔ ba kooni do nɛnfala nɔɔra ta baa nyiŋi a ta. Nomɛlbwa, le bechale nɛɛ kaa nomonome nɛ, bɛlbwa dɛ nyin kwaa sibeɡra ne. Hale n keamere ne n sɔfore bwa, ba sie dɛ lɛ nɛra faahra ta.

¹¹ Ba dɛ jaɡre n nɛra ŋwɛra dɛɛ liira kɛŋɔ a ɛ kure, anomanta, baa lii kɛ a ɛ sibeɡra. Dɛɛ bol ŋɔ, ‘Deŋnesɔɔhna, deŋnesɔɔhna,’ dɛ deŋnesɔɔhna bɛlbwa ɡe toole.

¹² Amɔ sihiih kpo ba ba wedoŋa baa ɛa nɔ ta kenɛ? Akai, sihiih ta ban kpoe, ba siebɔra ɡba dɛ baɡle kɛ sihiih ta ban kpoe. Anomanta, baa chɔɡoo kɛŋɔ bane aa chɔɡa la. Awola maa ba tɛr ba deŋne la, ba wobɛlbwa ɛɛ ba a jaɡaa. Men Korowiirii bola.

¹³ Dɛ n dɛ nyin n boa nɛra nyoa, kɛŋɔ paa yon komɛ koo kondikwa dɛ boa a nyoa la ken. Kɛ ba do kɛŋɔ daa waa wola nɔna dɔe, kɛŋɔ fiɡ daa nɔna aa wola toole o ta ken, hale a papooni bwa hol. Anomanta, n ɡelɔ nɛŋhɔɔhra ba lɛ ba harɛ dɛ so o ta. Men Korowiirii bola.”

¹⁴ Korowii nɛra la ŋɔ, “Ɛrɛɛ ya bwa ta so nɔɔ? Yá boa ya nyoa. Hé ɡel ya chwa kaa bwɛjena baa ma danjwɛkpeɡa bara bini, dɛ́ den ka serewe bela. Korowii ŋɔ yá na waa dɛ́ serewe, dɛ do tɛɡchɔɡa nee ta tɛ yaa ŋɔ yá nyɔ, wechɔɡa yaa ɛa dɛ jo o nɛɛ la wa.

¹⁵ Deŋnesɔɔhna dɔe taa yaa hwɛɡɛ, kɛ yaa wedɛɛɡa bɛlbwa na. Ya dɛ hwɛɡɛ kɛ ya dɔ chaeh, ɔmeeree bera ba chole ya nɛ.

¹⁶ Ya dɛ no ya dɔma jaɡre hweera aa nyoa aa kpeɡa, dɛ le bwɛjen Dan ta. Jaɡ-bala sii kpɔ ɔmee kohona ba ta harɛ la nɛra bwa nɛ baa chel. Ba balɔ dɛ́ ba chɔɡ ya harɛ ne komɛlbwa waa lɔ o ta, ne bwɛjen la dɛ nɛra baa lɔ o ta bwa.”

¹⁷ Korowii bolɔ ja ŋɔ, “Hɛ́ɛ no! Mɛɛ tomɛ he dɔmaa kɛŋɔ harɛkonchɔɡa á ba yo heya. Domkpuli aa dorome heya, haa wola won vɔwa kabere.”

Jeremia bambile chɔɡɔ o nɛra wa

¹⁸ N bambile chɔɡɔ kohona, asɛ n loo ku.

¹⁹ Hé no n nɛra wii baa dɛ wi bojaŋ harɛ ta dɛɛ ŋɔ, “Korowii toole Saayɔn kpa kɛɛ? Saayɔn Kooro ɡe toole bela kɛɛ?” Asɛ Korowii waa ɛ ba kooro la chaŋe ŋɔ, “Ɛrɛɛ he kpɔ kwaa he ɡbabir aa ɛa dɛɛ muɡli n baah, dɛɛ tomɛ voɡa aa wola tɔnɔ dɔe, dɛ le harɛfala ta nɔɔ?”

²⁰ Nɛra la do lɔŋɔ ŋɔ, “Lɔmɔɡa saŋ kaalɔ, kwaa koma ba a jaɡa, kɛ ya ta lɛɛ dɔe mɔɔ.”

²¹ Asɛ Jeremia ŋɔ, “Lokua su n bwa, dɛkalkɛ ba chɔɡ n nɛra. N dɛ wi, n bwara yɔr kohona.

²² Tɛɛɡa toole Gelead harɛ kɛɛ? Nɛra baa dɛ chah weela toole bela aa? Ɛrɛɛ n nɛra ta chaeh dɔe nɔɔ? Ba ŋwɛra aa won tonɛ.”