Jeremia 7 - mzwDBL

Jeremia Korowii waa bola

¹ Korowii ŋɔ Jeremia be ŋɔ

² ó che Korowii Dea doonyoa dɛ́ bol waa nɔ, “Juda tena bwa, hé no waa Korowii aa dɛ bol, heyaa yon kpɔ doonyoa nɔ ta jo dɛ baa tomɛ Korowii.

³ Hé charɛ he we-ɛɛla, ásɛ n ɡel he so bonɔ.

⁴ He bɛ nɛra baa dɛ teŋe nyosone nɛɛ teŋɛ kɛŋɔ baa dɛ bol ŋɔ he dɔ deŋnesɔɔhna la. Ba yon ŋɔ, Korowii Dea laanee la! Korowii Dea laanee la! Korowii Dea laanee la!

⁵ Hé charɛ he liire dɛ́ ɡel ɡɛ haa dɛ ɛ la. Hé ɡel he waa dɔ kasinteŋ tɛ dɔŋa.

⁶ Hé ɡel hɔɔhra ne bilalbii dɛ luhaahna fiiɡa. Hé ɡel nɛra baa wola wechɔɡa bɛlbwa ɛɛ dɛ so he bini la kpoora, dɛ́ ɡel voɡare ɡe toma, a ɡɛ ɛɛ won chɔɡ heya.

⁷ Hé charɛ he liire aa, hɛɛ teŋɔɔ so harɛ nɔ maa kpɔa tɛ he naawa o ɛ ba kon saŋ bɛlbwa dɛɛ la la ta.

⁸ Hé no, waa aa ɛ nyosone taa he yarada do.

⁹ He dɛ ŋwɛ, dɛɛ kpoo nɛra, dɛɛ bɔ jwamane dɛɛ di dansewea, dɛɛ kpoo kwaa dɛɛ ɛ sarahare voɡ Baal ta, dɛɛ tomɛ voɡare haa wola an jemɛ wubwa.

¹⁰ Waa maa kia laanee he yon ka ɛ, dɛ́ berɛ ba che n sie n Dea bonɔ dɛ́ ŋɔ, ‘Ya dɔ deŋnesɔɔhna.’

¹¹ He dɛ lii kɛ n Dea maa ŋɔa baa tom mɛ o bini nɔ ɛ ŋwɛɛra sɔɔhbɔr kɛɛ? N na waa haa dɛ ɛ bwa.

¹² Hé la Silo bela n fa aa tɔ sie le cheɡ ŋɔ hɛɛ tom mɛ la, dɛ́ ka na waa maa ɛa bela, n nɛra Israel tena wechɔɡa baa ɛa la wa.

¹³ Hé taa dɛ ɛ wechɔɡa nɔ la, men Korowii bol he be keraŋwɛnɛ bwa, kɛ he vɛh n be noe. N yerɛ heya, kɛ he ta men chaŋɛ.

¹⁴ Anomanta, ɡɛ maa ɛ Silo laanee mɛɛ ba n Dea maa lea cheɡ ŋɔ hɛɛ tom mɛ o bini, dɛɛ hwɛɡɛ o ta la ɛɛ. Dea nɔ maa kpɔa tɛ he ne he naawa nɔ ɛɛ doo kɛŋɔ maa ɛ Silo la.

¹⁵ Mɛɛ doŋi heyaa le n sie ɡɛ maa doŋi Israel tena baa ɛ he lolanar bini bane la. Men Korowiirii bola.”

Israel tena Korowii deŋnekpeɡ ɛɛ wa

¹⁶ Belaa Korowii ŋɔ, “Jeremia, bɛ wobɛlbwa soŋe tɛ nɛra nɔ, dɛɛ berɛ ba naa ta cheɡa soŋe ba wechɔɡa n be tɛɛ ba. Dɛkalkɛ maa he bee no.

¹⁷ Haa ba we-ɛɛla na Juda bwɛjena ne Jerusalam fɔɡbaahna aa?

¹⁸ Ba bechale cheɡɛ damara ba bil, ba mɛɛnanar ɛɛ mar nii, asɛ haahna kpɔ noo koo men ta, dɛ charama dɛ wɔɔra kɛŋɔ paanoo, dɛɛ tɛ ba voɡ baa dɛ yerɔ Nyundua Haŋkooro la. Ba berɔ fuɡe sen dɛ kpɔ ɛ sarahare tɛ voɡare ane ɡe, dɛ kpɔ dɛɛ muɡli n baah.

¹⁹ Amɔ men Korowii baahnee baa muɡli ɡɛ nɔ naa? Akai, ba ɡbabirii dɛɛ do ba te sihiih.

²⁰ Anomanta, men Nemenɛ Korowii ɛɛ kpɔ n bandia waa do kɛ nii ba ta n Dea nɔ ne nɛra dɛ kondɛɛra bwa nɛ. Hale daa ne koo kondikwaa bwa soo siwi. N bandia la aa sɔɔh bwa.

²¹ N nɛra, he dɛ ba sarahare kwaa fuih yaa, he dɛ fuh ane bwa kon baa dɛ ɛ sarahare o ta, dɛɛ di ane ɡe, kɛ men Korowii dɛ bol he be ŋɔ, hɛɛ won dɛɛ di a bwa.

²² Maa lawɛ he naawa le Ijipt harɛ ta ba la, n ta ban saraha kwaa baa fuah kɛɛ saraha bɛlbwa waa ta doe.

²³ N do ba ŋɔ baa no n wa, ásɛ n ɛ Korowii baa dɛ tom mɛ, ásɛ ba ɡe ɛ n nɛra. N berɔ ŋɔ ba be ŋɔ a chɛ kɛ baa ɛ ɡɛ maa do ba la, ásɛ wobɛlbwa do wer tɛɛ ba.

²⁴ Kɛ ba ta deŋne cheɡɛ dɛ no n be, dɛ teŋɛ ba deŋnekpeɡ ne wechɔɡa we-ɛɛla aa lɔ ba bini la ta, dɛ chɔɡ ba te kwaraa.

²⁵ Le awola he naawa aa le Ijipt harɛ ta ba le fini, keraŋwɛnɛ bwaa n teŋɛ dɛɛ tomɛ toroma baa ɛ n keamere la he be.

²⁶ Kɛ he ta deŋne cheɡɛ dɛ no n be. Hale he bambile berɔ do kpeɡri dɛ ɛ deŋnekpeɡ tena kohona ɡwaa he naawa.

²⁷ Jeremia, he bol ɡɛ waa nɔ ba be kwaraa naa, baa he bee no, he yer ba ɡe aa, baa hen chaŋe.

²⁸ Anomanta, ŋɔ ba be ŋɔ, ba harɛ nɛra aa men Korowii baa dɛ tom mɛ waa ta teŋɛ kɛɛ dɛ hweli waa ane le ba deŋnetɛra ta. Kasinteŋ toole kpa. Baa a waa bol kpa kwara.

²⁹ Jerusalam tena, hé wi, hé fonɛ he nyuune dɛ́ pa ta. Hé kaa deŋɡarere dor dɛ́ kaa taa wiile, dɛkalkɛ men Korowii, n baah di he nɛɛ n vɛh heya.

Henɔm Fɛlembɔjen bini wechɔɡa

³⁰ Juda tena ɛ wechɔɡa ane. Ba kpɔ ba voɡare maa kia la cheɡ n Dea maa lea cheɡ ŋɔ baa tom mɛ o bini la, dɛ kpɔ doŋa kaoh.

³¹ Henɔm Fɛlembɔjen binii ba ma kon baa dɛ ɛ saraha o ta dɛɛ yerɔ Tɔfɛt. Belaa ba kpoo ba bibaala ne bihaahna dawɛ nii ta ɛ saraha. Gɛ laa n bol ba be, ɡɛ toole n liire ta.

³² Anomanta, saŋ bɛl ɛɛ bao baa wola on yerɛ Tɔfɛt kɛɛ Henɔm Fɛlembɔjen kpa, baa dɛɛ yerɔ Nɛŋkpoa Fɛlembɔjenii. Baa huɡe nɛra belaa ka tel kɛ bɔr aa wola lee do bá huɡ ba.

³³ Ba dɛ ba serewa chɔ dɛ́ ɛ kondikwaa tɛ jumbii ne kpɔɡ bini ola, nomɛlbwa aa wola lee do dɛ́ doŋa.

³⁴ Harɛ la ɛɛ berɛ pua hɛŋle ɡbo harɛɛ. Mɛɛ laa silɛɛ ɡbɔɡa te bɛlbwaa kpɔ Juda ne Jerusalam fɔɡbaahnaa, hale ba hanfalwaa silɛɛ bwa. Dɛkalkɛ harɛ la ɛɛ berɛ dimɡbiaa.”