Jeremia 52 - mzwDBL

Jerusalam paɡra wa

¹ Kooro Sedekia di bene fifraanɛ dɛ beŋkpoŋ dɛ di kora. O soɡe Jerusalam di kora bene fi dɛ beŋkpoŋ. O nya sɔne Hamutal, Jeremia bihaahnee o le Lebna.

² Kooro Sedekia ɛ wechɔɡa dɛ jo Korowii nɛ, ɡɛ Kooro Jehoiakim aa ɛa la.

³ Korowii baah di Jerusalam ne Juda harɛ nɛra nɛɛ kohona, anomanta, o doŋ ba le o sie. Kooro Sedekia baa ɛ Babelɔn kooro deŋnekpeɡ.

⁴ Kooro Sedekia aa di kora bene anuanaarɛ, korobie fi tɔpera fi ta la, Babelɔn Kooro Nebukadnesa kpɔ o laa tena bwa kaa Jerusalam dɛ ka yoo ba. Ba baŋre ba tɛnte deene bwɛɛ la dahare, dɛ ma kwaa sawɛ bwɛjen la danjwɛɛ baa che a ta teeh jo o bini.

⁵ Ba teŋɔ tɔ bwɛɛ la tena do ka tel Kooro Sedekia aa di kora bene fi dɛ beŋkpoŋ ta.

⁶ A ɡɛ benanyoa la korobinaarɛ tɔpenuanaarɛ ta, dɛ lɔr o nyoa aa do kpeɡri kohona chole bwɛjen Jerusalam, kondikwaa toole nɛra di.

⁷ Babelɔn laa tena la kuuɡi danjwɛɛ waa bar Jerusalam la. Kooro Sedekia ne Jerusalam laa tena kpɔ doonyoa bɛl waa lɔ danjwɛɛre anɛ ane baah ta, ba kpɔ bela dɛɛ kaa kooro bodɛɛɡe waa du daa ta, dɛ le kpɔ sie chaɡɛ kaa Jɔɔdan Fɛlembɔjen ta jwaana,

⁸ kɛ Babelɔn laa tena la ti Kooro Sedekia, dɛ ka lawɔ Jeriko harɛ waa chɔa kaa ta, asɛ o laa tena bwa chwa ɡelo.

⁹ Ba lawɔ kaa bwɛjen Ribla waa lɔ Hamat harɛ ta, ka tɛ Babelɔn Kooro Nebukadnesa o ka bol o waa dɛ pao bolchɔɡe.

¹⁰ Babelɔn kooro kpoo Kooro Sedekia bibaala o siwi ta Ribla bela, dɛ kpoo Juda nomonjena ɡe bwa,

¹¹ dɛ foromi Kooro Sedekia sibie dɛ doo ayaawa jɔɡrɔre dɛ kpɔɔ kaa Babelɔn harɛ ta ka doo dea ka tel o serewe wee.

¹² Babelɔn Kooro Nebukadnesa aa di kora bene fi dɛ anuanaarɛ, korobie anue tɔpera fi ta la, o laa sitɔɔ Nebusaradan la Jerusalam.

¹³ O kaa fuh Korowii Dea ne koodem, dɛ Jerusalam deremi bwa. O fuh nomonjena dedɛɛɡe te bɛlbwa.

¹⁴ Babelɔn laa tena Nebusaradan aa chɔ ba nyoa la kuuɡi danjwɛɛ waa bar Jerusalam la bwa.

¹⁵ Laa sitɔɔ Nebusaradan lawɛ nɛra baa ka bwɛjen la ta, ne tom-ɛɛra, dɛ banɔ la baa le Kooro Sedekia habɔɔ, dɛ ka teŋɛ Kooro Nebukadnesa nɛɛ la bwa kaa Babelɔn harɛ ta.

¹⁶ Kɛ o ɡel nyaara baa lɔ Juda harɛ la bane ŋɔ baa ɛ toma daa kooni ne kooni aa lɔ bela la ta.

¹⁷ Babelɔn laa tena la kuuɡi ayaawa pilare ne kwaa aa dɔ nakpale baa taɡa a do Korowii Dea, dɛ ayaawa loɡ baa dɛ yerɔ Mpo la, dɛ kpɔ a bwa kaa Babelɔn harɛ ta.

¹⁸ Dɛ berɛ pa viine ne soofire ne kwaa baa pa tɔɔ dɛɛ do a bini, ne kwaa baa kpɔa dɛɛ menɛ kandea ŋwɛɛra, ne loɡa baa kpɔa dɛɛ chaɡɛ kwaa baa dɛ kpoo chale, ne loɡa baa dɛ fuh daawiile a bini, dɛ ayaawa kwaa bwa soo siwi baa kpɔa dɛɛ ɛ toma Korowii Dea bwa kaa.

¹⁹ Laa sitɔɔ la kpɔ kwaa baa kpɔa dɛɛ buh nii, ne loɡa baa do nee kɛɛ chal a bini dɛ ɛ dɛɛ merɛ la, kandea daa ne loɡa bwa soo siwi baa kpɔa dɛɛ ɛ sen sarahare, komɛlbwa baa kpɔ suuɡaswɛm tenten ne suuɡapoŋ ɛa te, ba kaa a bwa ne.

²⁰ Ayaawa aa lɔ pilare anɛ la ta, ne kwaa aa dɔ nakpale baa taɡa ne loɡbajen baa dɛ yerɔ Mpo, asɛ nabali fi dɛ anɛ do o lɔɡa, Kooro Solomɔn ɛa cheɡ Korowii Dea la, a kan kohona kɛŋɔ ba won maɡɛ a tɔɡre.

²¹ Pilare anɛ la le dɔŋa, bɛlbwa jaŋne dɛ kaa nyundua lɔ naɡale fifraanɛ dɛ anuanɛ, asɛ ayaawa baa kpɔa ɛa la ɡe jaŋne dɛ bara ɡe ɛ naɡale fi dɛ anuatoro.

²² Asɛ ba kpɔ ayaawa ɛ kafola a do ɡuleɡule kɛŋɔ, daa nɔna ane baa dɛ yera pɔmeɡranet ken dawɛ pila la bɛlbwa doa, a jaŋne dɛ kaa nyundua lɔ naɡale anuanɛ ne tama. Pila nɛɛte la ɡe kwaa la bwa ɛ beŋkpoŋ.

²³ Pɔmeɡranet nɔna aa do ɡuleɡule la bwa lɔ fifraanuanaarɛ dɛ anumɛl dɛ do baŋ bɛlbwa ta, asɛ pɔmeɡranet nɔna aa lɔ anɔ la aa lɔ kafola la ta nyundua bwa ɡe lɔ lafa.

²⁴ Laa sitɔɔ Nebusaradan lawɛ Sɔfonomoa Seraya ne o dɔŋ Sefania o ɡe aa dɛ chao, dɛ nomonome batoro bane baa dɛ daah doonyoa la laa ta kaa.

²⁵ Ba bini banɔ la baa ka bwɛjen la bini la, o lawɛ nomoa waa chɔ laa tena nyoa ne nɛra banuanɛ baa dɛ ja kooro la. Dɛ lawɛ laa nomoa la nɛn waa dɛ chao dɛ chwerɛ waa dɛɛ bil, dɛ laa tena fifraanumɛl baa jaa dɛ do bwɛɛ la bini.

²⁶ Babelɔn laa sitɔɔ Nebusaradan kpɔ ba bwa kaa bwɛjen Ribla ka tɛ Babelɔn koojen.

²⁷ Ribla waa lɔ Hamat harɛ taa Babelɔn koojen ɡel ba kpoo ba bela. Gɛɛ a do ba lawɛ Juda tena le ba harɛ ta, dɛ kaa ba ne bojaŋ harɛfale ta.

²⁸ Nɛra Babelɔn Kooro Nebukadnesa aa laɡ ba laa ta kaa bojaŋ harɛfale ta laanee teŋa nɔ. O kora dii bene anuanɛ ta la, Juu tena lɔ kaɡboŋa batoro fifraanɛ dɛ batoro,

²⁹ bene fi dɛ anuatoro ta la, nɛra lafraanuatoro fifraatoro dɛ banɛɛ o lawɛ le Jerusalam,

³⁰ asɛ bene fifraanɛ dɛ atoro ta ɡe, Juu tena lafraanuanɛ fifraanaarɛ dɛ banue. Nebusaradan waa chɔ laa tena nyoa laanee laɡ ba kaa. Ba bwa lɔ nɛra kaɡboŋa banaarɛ lafraanumɛl.

Ba le Kooro Jehoiachin dea baa doo

³¹ Baa lawɛ Juda Kooro Jehoiachin laa ta kaa Babelɔn harɛ bene fifraatoro dɛ anuanɛ la, ɡɛ saŋee Babelɔn Kooro Evil Mɛrɔdak di kora. O tɛ ŋwɛnɛ dɛ ɡel ba le Kooro Jehoiachin dea korobie fi dɛ anɛ, tɔpera fifraanɛ dɛ anue ta.

³² Kooro Evil Mɛrɔdak bol wobodɛɛɡa tɛ Kooro Jehoiachin, dɛ tɛo jirima ɡwaa koranar baa ja o nɛɛ ba laɡ ba kaa bojaŋ harɛ ta Babelɔn bela la bwa.

³³ Anomanta, Kooro Jehoiachin dɔ ŋwɛnɛ dɛ laa laala waa doa ba doo dea la foo bil, dɛ kpɔ anfala do, asɛ o ne Babelɔn kooro pɛ nɔn dɛɛ di kwa o soɡa bini bwa.

³⁴ Dɛ Kooro Jehoiachin soɡa bini bwa la, dɛ Babelɔn Kooro Evil Mɛrɔdak dɛ tɛo suuɡa waa kpɔ yawɛ kwaa aa hiaoh.