Jeremia 51 - mzwDBL

Babelɔn tena deŋnetɛra ja

¹ Waa Korowii aa dɛ bol laanee nɔ, “Mɛɛ ɡeloo peuchɔɡe waa dɛ chɔɡ kwaa ba chɔɡ Babelɔn harɛ ne o nɛra.

² Mɛɛ tomɛ nɛŋhɔɔhraa ba ba chɔɡ Babelɔn harɛ ne o nɛra kɛŋɔ peu aa ta haahra dɛɛ kaa la ken. Awola tɔpere la, baa le baŋ bɛlbwaa ba yo o nɛra, ásɛ harɛ la chɔ pɛɛ.

³ He bɛ Babelɔn laa tena ŋwɛnɛ tɛ ba ta hɛma, kɛɛ dɛ́ kpɔ ba laa laala do. He bɛ ba bonɔɔna ɡel, hé kpoo laa tena la bwa kwaraa!

⁴ Baa do laa tena la bolaa, ásɛ ba serewe chɔ bwɛjena la fɔɡbaahna.

⁵ Men Korowii, Koranar Bwa Kooro ta n nɛra Israel ne Juda tena vɛɛh. A lole kɛŋɔ ba ɛ wechɔɡa dɛ jo men Israel Nɛŋɡoroŋ la nɛ.

⁶ Hé chwa le Babelɔn harɛ! Hé chwa lɛ he nyuune! He bɛ Babelɔn tena wechɔɡa waa koh serewe. Saŋ telo kɛ men Korowii bɔ ba kem, mɛɛ tɛr ba deŋnee ɡɛ aa chɛa.

⁷ Babelɔn fa do kɛŋɔ suuɡaswɛm numol, dɛ do men Korowii nɔn ta, dɛ ɡel harɛre nɛra bwa nyɔ o bini sen, dɛ dɛɛ dɛ bwa ɛɛ we choɡla.

⁸ Babelɔn ɛɛ piɡru paɡre dɛ́ chɔɡ. Hé wi dɛɛ tɛ o nɛra! Hé nyin noo aa ɛ tɛɛɡa do ba ŋwɛra ta, a ken ɛɛ ɡeloo bá dɔ bokpeɡa.

⁹ Asɛ nɛŋhɔɔhra baa soɡe bela ŋɔ, ‘Ya takapɔ ŋɔ ya cha ba, kɛ a kaa mun ta. Hé ɡel ya ɡel ba waa tɛɛ ba, ásɛ bɛlbwa berɛ kaa o harɛ ta. Korowii kpɔ o kpeɡri dɛ tɛr ba deŋne dɛ chɔɡ ba kwaraa.’ ”

¹⁰ Korowii bol o nɛra be ŋɔ bá do lɔŋɔre ŋɔ, “Korowii ta yaa tɔɔ, Hé ba, ya la Jerusalam ka bol waa Korowii yaa dɛ tomɔ aa ɛa.”

¹¹ Laa sitɔɔla ŋɔ, “Hé sar hɛma nyoo, dɛ́ kpɔ kwaa haa kpɔ tɔ he te ɡbemɡbe laa ta! Korowii di Midia koranar liire, dɛkalkɛ o dɛ nyin ó chɔɡ Babelɔn harɛ. Korowii koh o Dea la wa dɛɛ nyin ó bɔ ba ba wechɔɡa kem.

¹² Hé ir fraŋkaa ásɛ laa tena jemɛ dɛ́ ba kuuɡi Babelɔn danjwɛɛre. Hé le laa tena la bane ba ba ja dɛɛ daah bwɛɛ la dahare, bane ɡe chɔ baro.” Korowii dɔɔ kpɔ liire ŋɔ wɛɛ chɔɡ Babelɔn tenaa.

¹³ Babelɔn tena, he nɛra haa soɡe neerare aa wara nyoo dɛ dɔ kondɔɔh kohona, he serewa telo.

¹⁴ Koranar Bwa Kooro ŋwɛɛ o ɡbaɡba ŋɔ, “Mɛɛ kpɔ laa tena baa wara kɛŋɔ tontombɛɛ bá yo heya, ásɛ dɛ pɔ he nɛɛ dɛɛ moo silɛɛ ne.”

Korowii kpɛɛra yel

¹⁵ Korowii cheɡɛ o kpeɡri ta dɛ ta harɛ, o wejema nee o ta harɛ nɔ bwa, dɛ che o liire ta dɛ paɡri nyundua ɡe.

¹⁶ O bol wa aa, bwaala dɛ nɛ dɛɛ kɔɡre nyundujaɡla, o ɡelɔ baama aa dɛ nɛ bwaala ir dɛɛ le harɛ jaɡa. O ɡelɔ bwaala ɛɛ nɛ dɛɛ nyɛɡle, asɛ dɛ ɡel peu ta le bela waa lole.

¹⁷ Nomɛlbwa ta liire dɔe, ba ɡɛnɔ, sihiih kpo nɛn waa kpɔ suuɡaswɛm kwaa o voɡare la. Kwaa waa ɛa la bwa ɛ nyosone, a ta hweera dɔe.

¹⁸ A waa ta tɔnɔ bɛlbwa dɔe, dɛ ɛ kwaa a wa aa dɔ wesoma. A chɔɡa saŋ telo Korowii ba naa, wɛɛ chɔɡ a bwaa.

¹⁹ Kɛ Korowii Israel tena aa dɛ tomɔ la ta do kɛ ban, dɛkalkɛ onee ta komɛlbwa, dɛ le Israel tena tɛ o te, dɛ kpɔ ba ɛ o kapɛrɛ nɛra. Koranar Bwa Kooroo o sɔn.

²⁰ Korowii ŋɔ, “Babelɔn, he do kɛŋɔ n hamba waa ɛ n dɔmkon mɛɛ la o ne laa. Henee n kpɔ yo harɛre nɛra, dɛ paɡre ba harɛre ne ba koranar.

²¹ Henee n kpɔ kpoo jaɡre ne nɛra baa soɡe a ta, dɛ paɡre kwaa aa do kɛ torɔɡore baa vɔwa pɛl jaɡre, ne nɛra baa soɡe a ta bwa.

²² Henee n kpɔ kpoo haahna ne baala, ne banjeni dɛ bonɔɔna, hale bonɔmbie ne toli bwa.

²³ Henee n kpɔ kpoo peteɡra ne ba peera, dɛ kpoo paara ne nae aa dɛ parɛ, ne nɛra baa dɛ nyiŋi harɛre ta, ne ba nomonome.

²⁴ He siwi taa mɛɛ ba bwɛjen Babelɔn ne nɛra baa soɡe Babelɔn harɛ ta kem bɔe, wechɔɡa baa ɛa Jerusalam la wa. Men Korowiirii bola.

²⁵ Babelɔn, he do kɛŋɔ bwejen haa dɛ chɔɡ harɛ nɔ ta nɛra. Kɛ men Korowii ɛɛ dɔm, mɛɛ ɡeloo hé fuh dɛ́ berɛ tɔɔ ásɛ n taɡɛ ta harɛ.

²⁶ He bwe bɛlbwa aa werii do bá kpɔ ma dea, kɛɛ dɛ́ kpɔ pa dea mun kpa, dɛkalkɛ he dɛ ba doe kɛŋɔ pua hɛŋle ɡbo harɛ saŋ bɛlbwa dɛɛ la. Men Korowiirii bola.

²⁷ Hé ir fraŋkaa harɛ la ta! Hé hoh bɛla ásɛ harɛre nɛra jemɛ! Hé boa harɛre nɛra nyoa ásɛ ba ka yo Babelɔn tena. Bol Ararat ne Mini dɛ Askenas harɛre nɛra be. Le laa sitɔɔ waa tɔ ba sie, dɛ́ kpɔ jaɡre aa wara kɛŋɔ tontombɛ dɛ́ ka yo.

²⁸ Boa harɛre nɛra nyoa bá ba yo Babelɔn tena laa. Koranar baa le Midia, harɛ la sitɔɔla dɛ ba nomonome, dɛ harɛre baa dɛ nyiŋi a ta laa tena bwa ba.

²⁹ Harɛ la jiɡro, dɛkalkɛ waa Korowii aa maɡla bil la telo kɛŋɔ Babelɔn harɛ chɔ pɛɛ, ásɛ nomɛlbwa aa won so bela kpa.

³⁰ Babelɔn laa tena ɡel yoi dɛ ka so ba dekpeɡa bini. Ba bokpeɡa tonɔ ba do kɛŋɔ haahna ken. Ba kuuɡi bune baa kpɔa dɛɛ kaɡre ba doonyojena bwa, dɛ kpaa nii do ba deene ta.

³¹ Nae toroma na teŋɛ dɛ kaa bol Babelɔn kooro be ŋɔ, ba kuuɡi o bwɛjen la danjwɛjen dɛ jo o bini.

³² Dɔma tɔ leebɔɔne dɛ kpaa nii do ba dekpeɡa ta, asɛ ɔmee chole Babelɔn laa tena nɛɛ kohona.”

³³ Koranar Bwa Kooro, Israel tena aa dɛ tomɔ la ŋɔ, “Babelɔn harɛ nɛra do kɛŋɔ baa kuu mea dɛ kpɔ kaa a lɔ bɔr, asɛ nɛra ba tiɡra do harɛ, aa biɡri bá chɔɡ harɛ la.”

³⁴ Jerusalam tena ŋɔ, “Babelɔn kooro chɔɡ ya Jerusalam tena dɛ kpoo yaa, o ɡelɔ ya do kɛŋɔ loŋ komɛlbwa aa wola toole o bini ken. O do kɛ harɛkon dɛ lawɛ yaa lile ya ola do o som o tea su, dɛ berɛ uɡe yaa ta.

³⁵ Hɔhɔrɔwa bɛlbwa yaa naa bwa dawɛ Babelɔn harɛ nɛra nɛ. Ya seo kembɔr bwa ɡure nɛra baa lɔ Babelɔn nyu ta.”

³⁶ Anomanta, Korowii bol Jerusalam tena be ŋɔ, “Hé no, mɛɛ che he habɔɔ dɛ́ yo, dɛ́ bɔ he dɔma Babelɔn tena kem waa baa ɛ heyaa la wa. Mɛɛ tɔ Babelɔn neerare nyuunee, a ɡel ba buli bwa ɡe hweeh.

³⁷ Babelɔn dɛ ba paɡra dɛ́ berɛ dimɡbia ne kalampoŋare sobɔr, dɛ́ berɛ kon nɛra aa na ba bambile teŋe baa mamɔ, nomɛlbwa aa won so bela.

³⁸ Babelɔn tena dɛ dooɡe lɔŋɔre dɛɛ ŋoo kɛŋɔ nyujentena ken.

³⁹ Ba dɛ nyin kondikwa kohona kɛɛ? Mɛɛ ɛ kondikondɛɛɡaa cheɡ ba, ásɛ ba di dɛ́ nyɔ sen dɛɛ lɛ ba sie, dɛ́ mamɛ dɛɛ moo. Baa iruu ka chɔ baa wola won ir kpa bwa. Men Korowiirii bola.

⁴⁰ Mɛɛ ɡeloo ba laɡ ba, kɛŋɔ ba yon lawɛ peloni kɛɛ boohna kɛɛ pebala, dɛ́ ka kpoora la ken.”

⁴¹ Korowii bol Babelɔn waa ŋɔ, “Na ɡɛ baa yo Babelɔn, bwɛjen harɛ nɔ nɛra bwa fa aa dɛ kpɛɛro dɛɛ tɛo jirima la. Na ɡɛ waa chɔɡa dɛ kpɔ bambiteŋa kohona ba ta harɛre nɛra bwa nɛ.

⁴² Mpo suu tɔ Babelɔn harɛ ta, o nehɛma tao ba bɔle o ta.

⁴³ O bwɛɛre bwa chɔ pɛɛ dɛ hol, kɛŋɔ pua hɛŋle ɡbo harɛ ken. Nomɛlbwa aa harɛ la taa so, á ba ɛ kɛ nɛn ɛɛ kpɔ o taa.

⁴⁴ Mɛɛ tɛr voɡ Baal waa lɔ Babelɔn deŋnee, dɛ́ ɡel o uɡe komɛlbwa waa dia. Harɛre nɛra aa berɛ dɛɛ tomɔ dɛ́ kpɔ kwaa baa tɛo kpa. Babelɔn danjwɛɛ bwa dɛ́ ba kuuɡa.

⁴⁵ N nɛra Israel tena, hé chwa le ba. Hé chwa dɛ́ dɔ he nyu. Hé chwa le men Korowii bandia waa do ɔma la ta.

⁴⁶ He bɛ ɡel he bambile chɔɡ kɛɛ dɛɛ ɔmɛ, waa haa dɛ no harɛ la ta wa. Bena bɛlbwa hɛɛ dɛɛ no wefalaa, hɛɛ no yoi waa harɛ taa, kooro ne o dɔŋ kooro ɛɛ dɛɛ yoo.

⁴⁷ Anomanta, saŋ bɛl dɛ ba, ásɛ n chɔɡ voɡa aa lɔ Babelɔn harɛ ta. Sihiih ɛɛ kpo harɛ la nɛra bwaa, ásɛ ba kpoo ba ba serewe chɔ o ta.

⁴⁸ Belaa koŋkwaa aa lɔ nyundua ne harɛ ɛɛ ba silɛɛ lɔŋɔre doe Babelɔn wa, dɛkalkɛ nɛra dɛ ba weekaŋle nyunduabɔr lee dɛ́ ba yoo dɛ́ chɔɡo.

⁴⁹ A chɛ kɛ bwɛjen Babelɔn paɡre, kpoora baa kpoo Israel tena dɛ kpoo harɛ nɔ ta nɛra la ɡe wa. Men Korowiirii bola.”

⁵⁰ Korowii berɔ bol waa o nɛra baa lɔ Babelɔn harɛ ta be ŋɔ, “He nɛra haa chwaa dɛ dɔ he nyu la, hé le warane, he bɛ hɛlɛ. Hé lɔ bojaŋ harɛ ta te, kɛ he lii n wa, dɛɛ lii Jerusalam ɡe wa.”

⁵¹ He ŋɔ, “Sihiih kpo yaa ya di ncho, dɛkalkɛ nɛŋhɔɔhra dɔ bɔr jo Korowii Dea bɔra aa do ɡoroŋ bela.”

⁵² Kɛ Korowii ŋɔ, “Tɔpera ane dɛ ba bala ásɛ n chɔɡ Babelɔn harɛ voɡa, ásɛ nɛra baa do ba bola bwa ɛɛ pɛmɛ harɛ la ta.

⁵³ Hale Babelɔn wono kaa nyundua, o dekpeɡa kaa nyundua kwaraa naa, mɛɛ ɡeloo nɛra ba chɔɡo. Men Korowiirii bola.”

⁵⁴ Korowii berɔ ŋɔ, “Hé no lɔŋɔre aa dɛ le Babelɔn harɛ, o nɛra dɛ wi harɛ la chɔɡa wa.

⁵⁵ Men Korowii dɛ ba Babelɔn harɛ chɔɡa, dɛ́ ɡel ɡbɔɡa aa dɛ le o ta nyoa sɔɔh. Dɔma ɛɛ ba lɔɔ tɔ ba nɛɛ kɛŋɔ nehɛma a nyoa aa kpeɡa ken, dɛ́ yoo ba dɛɛ do lɔŋɔre.

⁵⁶ Baa bao dɛ́ ba chɔɡ Babelɔn harɛ, dɛ́ lawɛ o laa tena bwa, ásɛ dɛ kuuɡi ba tori. Menee Korowii maa dɛ tɛr wechɔɡ-ɛɛra deŋne. Mɛɛ bɔ Babelɔn tena kemee ɡɛ aa chɛa.

⁵⁷ Mɛɛ ɡeloo o koranar ne nomonome, ne wejerema dɛ laa tena, nyɔ sen dɛɛ. Baa chɔ domii baa wola won ir kpa. Men Koranar Bwa Kooro maa ɛ Kooro laanee bola.”

⁵⁸ Koranar Bwa Kooro bolɔ ŋɔ, “Babelɔn danjwɛkpeɡ la dɛ́ ba kuuɡa chɔ harɛ, ásɛ nii le o doonyojena ta. O nɛra koeh baa koah ɛ pɛɛ, ásɛ nii le a bwa ta á fuh.”

⁵⁹ Waa men Jeremia aa kpɔa tɛ Nɛrea bibaa Seraya, baa dɛ yerɛ o nabaa Maaseya laanee teŋa nɔ. Dɛ onee dɛɛ cha Juda Kooro Sedekia ɡɛ saŋ waa di kora bene anaarɛ, asɛ o ne o la Babelɔn harɛ ta.

⁶⁰ Dɛ men Jeremia chwerɛ wenaale bwa aa dɛ ba Babelɔn harɛ ta bala do tɔn bini.

⁶¹ N ŋɔ Seraya be ŋɔ, “He tel Babelɔn harɛ ta naa, na kɛŋɔ hɛɛ kure tɔn nɔ bini waa bwaa takpeɡ ne kohonaa ba no.

⁶² Dɛ berɛ ŋɔ, ‘N Naa Korowii, he fa bolɔ ŋɔ hɛɛ chɔɡ bonɔɔ, ásɛ nɛra kɛɛ kondɛɛra aa wola won so o ta, ó berɛ dimɡbia saŋ bɛlbwa dɛɛ la.’

⁶³ Seraya, he kure tɔn nɔ bini waa baɡle nɛra la tonaa, kpɔ ŋwɛn lawɛ bwe vɔwɛ marɛ o ta, dɛ́ kpɔ ka ta Yufretis Moo ta.

⁶⁴ Asɛ dɛ berɛ ŋɔ, ‘Gɛ maa ɡela bwe la morɛ la, ɡɛɛ mɛɛ ba ɡela Babelɔn chɔɡ baa wola won kwaa vɔrɔwo kpa, wenaale Korowii aa kpɔa dɛɛ ba ba ta ba nɛɛ la wa.’ ” Men Korowii keame Jeremia, n wobol jaɡɛ bonɔ.