Jeremia 5 - mzwDBL

Nomɛlbwa waa ta toɡrɛ

¹ Korowii ŋɔ, “Jeremia, ir la ka nyiŋi Jerusalam fɔɡbaahna. Nyiŋi o bini kɛrɛdɛ dɛ́ bar, ásɛ dɛ ɡaaɡe bela nɛra aa dɛ cheme bwa. Dɛ hɛɛ won dɔ nɛmbeŋkpoŋ kwaraa o wa aa wera dɛɛ di kasinteŋ aa, mɛɛ kpɔ Jerusalam tena wechɔɡaa kɛ ba.

² A lole kɛ ba ŋɔ ba dɛ tomɛ men Korowii, kɛ ba teŋe nyosone dɛɛ ŋwɛɛ n sɔn ta.”

³ Belaa n lii ŋɔ, “N Naa Korowii, kasinteŋ ɡbo laa hɛɛ nyin aa? He tɛr ba deŋne, kɛ ba ta weweele bɛlbwa nae, he do ba sibeɡra, kɛ ba ta wobɛlbwa hwele le a ta. Ba ɡelɔ ba bambile do kpeɡri kɛŋɔ bwe ken, dɛ vɛh kɛ baa charɛ ba liiree.”

⁴ Ate, n berɛ lii ŋɔ, “Ba ɛ nyaara ɡbo baa wola jemɛ, ba ɛ ɡɛna, dɛkalkɛ baa waa Korowii baa dɛ tomɔ aa dɛ nyin jemɛ.

⁵ Anomanta, mɛɛ la nomonjena bee n ne bá ka bol. Ba te jemɛ Korowii baa dɛ tomɔ la waa bwa kɛrɛdɛ.” Kɛ ba bwa pɛ nyoa dɛ vɛh Korowii waa la ta teŋa.

⁶ Anomanta, nyujente ɛɛ le kpɔɡ binii dɛ́ ba kpoo ba, ɡboli le pua hɛŋle ɡbo harɛ ta dɛ́ ba toɡri ba ola. Ásɛ noniete ba chɔ ba bwɛɛ dahare, dɛ́ toɡri nomɛlbwa waa le ola, dɛkalkɛ ba wechɔɡa kan, ba habɔɔ bera dɛ́ kpo Korowii ɡe ɡwaa.

⁷ Korowii ŋɔ, “Juda tena, ɛrɛ waa a chɛ kɛ ń kpɔ he wechɔɡa kɛ heya ɔ? He vɛɛh mɛ dɛɛ tomɛ voɡare a wa aa wola kasinteŋ dɔe. N tɛ heyaa komɛlbwa haa dɛ nyin, kɛ he ɡarɛ kaa bɔ jwamane, he ne hanjwamanere ɛɛ valɛ.

⁸ Ba do kɛŋɔ jaɡ-bala aa dɔ kwaa di vaɡɛ kohona, dɛɛ nyin jweera ken. Bɛlbwa pɛla lawɛ o dɔŋ haah.

⁹ A ta chɛ kɛŋɔ ń tɛr ba deŋne waa nɔ wa aa? A ta chɛ kɛ n bɔ harɛ waa do ken nɔ nɛra kem aa? Men Korowiirii bola.

¹⁰ Mɛɛ ɡeloo dɔma ba teŋni n nɛra daa kooni nɔna ta, kɛ baa den chɔɡ a bwa kwaraa. Mɛɛ ɡeloo ba teŋni a kpala bwa ta, dɛkalkɛ ba cheɡɔ tɛ nɛra baa wola men jemɛ la.

¹¹ Israel ne Juda tena bwa waa ta kasinteŋ dɔe tɛ mɛ kwaraa. Men Korowiirii bola.”

¹² Korowii nɛra teŋe nyosone ŋɔ, “Waa yaa wobɛlbwa ɛɛ ba. Yaa wekpeɡa bɛlbwa nae ba. Laa bɛlbwa aa ya nɛɛ ba, a ba ɛ kɛŋɔ lɔr kpo yaa yá serewe.

¹³ Korowii keamere la waa do kɛŋɔ peu aa taa baa kaa ken, Korowii waa la toole ba bini, anomanta, waa baa dɛ bol la ɛɛ ɡure ba nyu taa.”

¹⁴ Anomanta, waa Korowii Waa Ɛ Koranar Bwa Kooro aa dɛ bol laanee nɔ, “Nɛra nɔ aa bol ɡɛ nomanta, n wobol maa kpɔ do he nyoa la ɛɛ doo kɛŋɔ nii ken. Ba ɡe ɛɛ doo kɛŋɔ daa nii aa dɛ fuah.”

¹⁵ Korowii ŋɔ, “Israel tena, n kpɔ nɛra le bojaŋ harɛ ta ásɛ ba ba yo heya. Harɛ o nɛra aa lole le saŋ la bwa dɛ do kpeɡri haa wola ba wobol no, haa a mun ɡe no.

¹⁶ Ba laa tena jemɛ hɛma tae kohona, baa wola nomɛlbwa nɛɛ sune.

¹⁷ Baa di he kondikwaa bwaa, dɛ́ kpoo he bibaala ne bihaahna. Baa kpoo he peera ne naee, dɛ́ chɔɡ he ɡrepo ne fiɡ daa bwa. Baa chɔɡ he bwɛjena baa ma danjwɛkpeɡa bara, hɛɛ hwɛɡɛ a ta bwaa.”

¹⁸ Korowii berɔ ŋɔ, “Ane a bwa, tɔpere la telaa, maa he bwaa chɔɡ kwaraa.

¹⁹ Ba bɔɔ ɡɛ aa bala n ɛ anɔ bwa naa, Jeremia, ŋɔ ba be ŋɔ, ‘Gɛ haa dena berɛ habɔɔ kpo mɛ dɛ kaa tomɛ harɛfala voɡare la, ɡɛɛ hɛɛ ba nɛŋhɔɔhra toma ba harɛ ta.’ ”

²⁰ Korowii ŋɔ, “Ŋɔ waa nɔ Jekɔb naanar be dɛ́ bola baɡle Juda tena ŋɔ,

²¹ ‘Hé cheɡ deŋne, ɡɛna haa wola liire bɛlbwa dɔe. He dɔ sibie kɛ haa na, he dɔ deŋna kɛ haa waa no.

²² Menee Korowii, amɔ haa men ɔmaa? A ta chɛ kɛ hɛɛ chel n sie naa? Menee ɡela hɛŋle ɛ mpo jwɛh, o do le saŋ bɛlbwa mpo aa wola won su ɡale. Nehɛma ɛɛ won ta ɡɛ bɛlbwa, kɛɛ dɛɛ si kohona, kɛ aa won ɡale kaa hɛŋle baŋ.

²³ Kɛ he nɛra nɔ te, he ɡɛnɔ dɛ ɛ bambikpeɡ nɛra. He berɛ habɔɔ kpo mɛ dɛ ɡel n toma ɛɛ.

²⁴ He ta liire dɔe ŋwɛnɛ bɛlbwa ta kɛŋɔ he kpɔ duure tɛ mɛ. Menee ɡela bwaala loɡla ne yoo bwaala ɛɛ nɛ, he kondikwaare ɛɛ do wer, hɛɛ koma bena bɛlbwa.

²⁵ Anomanta, ɡɛ waa aa wera nɔ paŋɛ heya, he wechɔɡa haa ɛa la wa.

²⁶ Wechɔɡ-ɛɛra soɡe n nɛra bini, dɛ chɔ dɛɛ kpa kɛŋɔ nɛra yon harɛ bela dɛɛ lawɛ jumbii, ne bela baa hara dɛɛ lawɛ nɛra ken.

²⁷ Gɛ kpaah yon pa jumbii su ɡbɛr bini la, ɡɛɛ ba pa laala baa cheɡɛ ŋwɛnɛchɔɡa ta su ba deene. Anee ɡela ba dɔ suuɡa dɛɛ di kpeɡri.

²⁸ Baa di kondɛɛɡa vaɡɛ dɛ je nomanta, ba wechɔɡa ta jaɡa dɔe. Baa bilalbii waa bolɛ dɛɛ tɛɛ ba, baa kasinteŋ bol dɛɛ cha nyaara ɡe.

²⁹ A ta chɛ kɛŋɔ men Korowii tɛr ba deŋne waa nɔ wa aa? A ta chɛ kɛ ń bɔ harɛ waa do ken nɔ nɛra kem aa?

³⁰ Waa aa dɔ nyokpoa aa wola were chiɡ harɛ la ta.

³¹ N keamere dɛ bol wa aa ɛ nyosone ɡbosoroo, sɔfore cheɡɛ ba kpeɡri ta dɛɛ nyiŋi harɛ la ta, kɛ n nɛra sie dɛ lɛ a ta. Anɔ bwa habɔɔ, ɛrɛɛ baa ba ɛɛ yɔ?’ ”