Jeremia 46 - mzwDBL

Ijipt harɛ wa

¹ Waa Korowii aa bol men Korowii keame Jeremia be dɛɛ baɡle harɛre nɛra bwa waa laanee nɔ.

² Ijipt harɛ waa tɔ sie. Waa nɔ kaalɔ dɛɛ tɛ Ijipt Kooro Neko ne o laa tena. Onee Babelɔn Kooro Nebukadnesa yo dɛ pɔ o nɛ bwɛjen Kaakɛmes, o bɛne Yufretis Moo nyoa, ɡɛ saŋ Juda Kooro Josia bibaa Jehoiakim aa di kora bene anaarɛ ta.

³ Ijipt laa nomonome nyɛɡɔ ŋɔ, “Hé kpɔ kwaa haa kpɔ tɔ he te ɡbemɡbe laa ta, anjeɡre ne anjena dɛ́ le ka yo laa.

⁴ Hé kpɔ kwaa darawe jaɡre nɛ, dɛ́ teeh so a ta. Bɛlbwa ka che o chebɔr, dɛ́ kpɔ o ɡbɛrɛ pi. Hé sar he lampeare nyoo dɛ́ kpɔ he laa laala do.

⁵ Bɔkwaa mɛɛ na nɔɔ? Ɔmee kohona chole Ijipt laa tena nɛɛ ba le habɔɔ chwa dɛɛ kaa. Babelɔn laa tena yoo ba dɛ pɔ ba banyoola nɛ. Ba kpɔ bochela chwa dɛɛ le, bɛlbwa aa kee dɛɛ nyiŋi, ɔmee kohona su ba bwa. Men Korowiirii bola.

⁶ Laa tena baa ɡbaŋa kwara ta wone chwa le kaa. Ba lɔ naa weekaŋle nyunduabɔr Yufretis Moo ta dɛ choɡli.

⁷ Harɛ besoo nɛraa ɡɔɔ ba te kɛŋɔ Nael Moo waa sua dɛ bu atɛlɛ nɔɔ?

⁸ Ijipt harɛ nɛraa dɛɛ ɡɔɔ ba te kɛŋɔ Nael Moo, kɛŋɔ nee aa sua dɛ bu atɛlɛ ken. O ŋɔ, ‘Mɛɛ suu dɛ́ tɔ harɛ bwa dɛ́ chɔɡ bwɛjena ne a nɛra.’

⁹ Jaɡre ne kwaa aa do kɛ torɔɡore ba vɔwɛ dɛɛ pɛla, hé le dɛ́ ka yo. Nɛra haa soɡe jaɡre ta, hé kpɔ sibeɡra le. Banyoola, hé le dɛɛ kaa, Itiopia ne Lebya harɛre baala, hé kpɔ kwaa baa kpɔa dɛɛ tɔ ɡbemɡbe dɛɛ yo laa kpoŋe, ásɛ Lidia baala harɛ ba tori.

¹⁰ Awola tɔpere la ɛ Korowii, Koranar Bwa Kooro Tɔpere, tɔpere waa dɛ ba o dɔma kem bɔe. O tokobii nee wɛɛ ba ba kpoora, dɛ́ nyɔ ba chal sɔɔh nyɔɡre waa dɛ kpoo nyoa. Korowii, Koranar Bwa Kooro ɛɛ kpoo o dɔmaa awola tɔpere, Yufretis Moo nyoa, weekaŋle nyunduabɔr.

¹¹ Ijipt haa do kɛŋɔ bitolo waa wola baa jemɛ, he nɛra iro la Gelead harɛ ka nyin tɛɛɡa kwaraa naa, aa won chaah ba. Komɛlbwa aa won ɡel bá dɔ bokpeɡa.

¹² Harɛre nɛra bwa ɛɛ no he sihiih haa dia waa, bɛlbwa no he wii haa dɛ wi bobɛlbwa. Laa tena ɛɛ lɔ naa dɛ́ laa dɔŋa, dɛ́ bwa choɡli.”

¹³ Babelɔn Kooro Nebukadnesa aa baa yo Ijipt harɛ tena la, Korowii bol waa men Jeremia be ŋɔ,

¹⁴ “Bol waa nɔ Ijipt bwɛjen Miɡdol ne Mɛmfes, dɛ Tapanes nɛra be ŋɔ, ‘Hé nyin bɔra che dɛɛ kpa, dɛkalkɛ Babelɔn laa tena dɛ ba ba chɔɡ harɛre nɛra baa bar heyaa cheme.’

¹⁵ Bɔkwa waa bala he voɡjen Apis chole ɔ? Korowiirii taɡɔ o chole.

¹⁶ He laa tena ɛɛ teŋɔɔ dɛɛ lɔ na, dɛ́ choɡli dawɛ dɔŋa nɛ. Baa bol dɔŋa bee ŋɔ, ‘Hé ɡel ya ir, dɛ́ berɛ kaa bela yaa lea ne ya nɛra bini, ásɛ ya dɔma bɛ yaa kpoo.’

¹⁷ Belaa baa ba bala dɛ́ ba ŋɔ, ‘Gbɔɡaa Ijipt kooro ɛɛ do pɛɛpɛɛ, o paŋɛ waa aa chɛ kɛ ó dɔ bwa.’

¹⁸ N ŋwɛɛrɔ kɛŋɔ men Koranar Bwa Kooro aa lole saŋ bɛlbwa nɔ, menee kooro. Gɛ Tabɔ Bwejen aa jaŋa ɡwaa bwejena bwa asɛ Kaamɛl Bwejen ɡe do jaŋne che mpo nyoa la, ɡɛɛ nɛn waa ba yo heyaa la kpeɡri ɛɛ ba doe.

¹⁹ Ijipt tena, hé boa he laala nyoa bá lawɛ heyaa kaa bojaŋ harɛfale ta. Mɛmfes ɛɛ berɛ pua hɛŋle ɡbo harɛɛ, dɛ́ berɛ dimɡbia nomɛlbwa aa wola won so o ta.

²⁰ Ijipt harɛ do kɛŋɔ nanee waa wera ken, kɛ o dɔm ɛɛ le weekaŋle nyunduabɔree, dɛ́ ba yoo kɛŋɔ batatom aa dɛ domɛ nao ken.

²¹ Laa tena baa kaa yaɡ ba ŋɔ bá ba yo tɛɛ ba aa kpeɡe dɛ́ won yo, ba do kɛŋɔ nabiiri aa jea ken. Ba ɡe ɛɛ berɔɔ chwa kaa baa wola won che ba naa ta, dɛkalkɛ ba wenaale tɔpere la telo, saŋ telo kɛ bá dɔ deŋnetɛra.

²² Ijipt tena ɛɛ chwao dɛɛ si kɛ harɛkon ken ɡɛ saŋ baa na ba dɔma bala. Kpanfɛre nee ba dɔma ɛɛ ba bala bá yoo ba kɛŋɔ baala baa dɛ teŋe daa,

²³ dɛɛ chɔɡ kɔrjen la ken. Ba warɔ ɡwaa tontombɛ, baa wola won kur ba.

²⁴ Sihiih kpo Ijipt tena, ba dɔma le weekaŋle nyunduabɔr ba yoo ba dɛ pɔ ba nɛ.”

²⁵ Koranar Bwa Kooro, Israel tena aa dɛ tomɔ ŋɔ, “N dɛ ba deŋnetɛra ne bala ba ta Tebes tena voɡ Amɔn, ne Ijipt harɛ ne o voɡa dɛ koranar bwa nɛ. N dɛ ba n lawɛ Ijipt kooro ne nɛra baa kpɔ ba te dawɛ o nɛɛ bwa.

²⁶ Mɛɛ laɡ baa do nɛra baa dɛ nyin ba dɛ́ kpo nɔn ta. Banee, Babelɔn Kooro Nebukadnesa ne o laa tena. Kɛ a habɔɔ nɛra ɛɛ berɔ ba so Ijipt harɛ ta kɛ saŋ la ja. Men Korowiirii bola.”

Korowii ɛɛ lɛ o nɛraa

²⁷ “N nɛra Israel tena, he bɛ ɔmɛ, he bɛ ɡel he bambile chɔɡ. Mɛɛ lɛ heyaa le bojaŋ harɛre taa ba, he naanar baa laɡ ba kaa bojaŋ harɛfala ta bwa. Ásɛ he berɛ dɔ deŋnesɔɔhna ne bosɔɔhna, nomɛlbwa aa wola won aah heyaa kpa.

²⁸ N nɛra Israel tena, mɛɛ ja he nɛɛ dɛ́ lɛ heya, mɛɛ chɔɡ harɛre nɛra maa lɔ heyaa peɡre ba bini bwaa, kɛ he te, maa den chɔɡ heyaa kwaraa. Mɛɛ tɛr he deŋnee, kɛ aŋwɛnɛ taa mɛɛ ba he deŋne tɛra. Men Korowiirii bola.”