Jeremia 45 - mzwDBL

Korowii nyoa waa baɡɛ Baruk

¹ Waa Korowii keame Jeremia aa bol Nɛrea bibaa Baruk be, ɡɛ saŋ Juda Kooro Josia bibaa Jehoiakim aa di kora bene anaarɛ ta la, dɛ Baruk dɛ chwerɛ waa Jeremia aa dɛ bol.

² A habɔɔ la, Korowii Israel tena aa dɛ tomɔ ŋɔ ń bol Baruk be ŋɔ,

³ “He ŋɔ n be ŋɔ, ‘N bwɛɛlɛ. Korowii kpɔ suna dii ba ja n wenaale ta, n koɔh n hima maa dɛ hime ta, maa onɛ bwa.’ ”

⁴ Belaa Korowii ŋɔ men Jeremia bol Baruk be ŋɔ, “Mɛɛ taɡɛ komɛlbwa maa mao ta harɛ, dɛ́ fuɡri komɛlbwa maa duu ta, harɛ nɔ ta bobɛlbwa.

⁵ Ɛrɛɛ hɛɛ nyin kɛŋɔ nɛra nyiŋi he nɛɛ kɛrɛdɛ nɔɔ? Bɛ an dɛɛ nyin, dɛkalkɛ n dɛ ba wenaale kpɔe ba ta harɛ nɔ nɛra bwa nɛ. Bobɛlbwa haa chwa kaa la, mɛɛ ɡeloo he dɔ he nyu. Men Korowiirii bola.”