Jeremia 43 - mzwDBL

Jeremia lawa dɛ́ kaa Ijipt harɛ ta

¹ Men Jeremia bol wobɛlbwa Korowii Juda tena aa dɛ tomɔ la aa tom mɛ ŋɔ ń ba bol ba be la bwa.

² Belaa Hosaya bibaa Asaria ne Karea bibaa Johanan, dɛ deŋnekpeɡ baala bane ba ŋɔ n be ŋɔ, “He dɛ teŋe nyosone! Korowii yaa dɛ tomɔ ta hen tomɛ ŋɔ yá ɡel Ijipt laŋa.

³ Nɛrea bibaa Baruk doe ŋɔ hé kpɔ yaa do Babelɔn tena nɔn ta, ásɛ ba kpoo yaa kɛɛ dɛ́ lawɛ yaa kaa bojaŋ harɛfale ta Babelɔn.”

⁴ Anomanta, Johanan kɛɛ laa nomonome la bɛlbwa, dɛ nɛra la bɛlbwa ta waa Korowii aa do ba ta teŋɛ, dɛ ta so Juda harɛ ta bela.

⁵ Belaa Johanan ne laa nomonome la kpɔ nomɛlbwa waa kaa dɛ do Juda harɛ ta la kaa Ijipt harɛ ta, ba ne nɛra baa peɡra dɛ ka so harɛfala ta dɛ berɛ ba so Juda harɛ ta la bwa.

⁶ Ba berɔ tɔ baala ne haahna ne bechale, dɛ kooro bihaahna Nebusaradan waa chɔ laa tena baa dɛ daah kooro nyoa sie kaa. Nebusaradanee kpɔ ba do Ahikam bibaa Gedalia, ne men Jeremia maa ɛ Korowii keame, dɛ Nɛrea bibaa Baruk nɔn ta dɛ tɔ ba sie ba kaa.

⁷ Anomanta, ba kpɔ deŋnekpeɡ vɛh Korowii waa la, dɛ ka jo Ijipt harɛ, dɛ kpoŋe kaa bwɛjen Tapanes ta.

⁸ Baa lɔ Tapanes bela la, Korowii bol waa men Jeremia be ŋɔ,

⁹ “Kpɔ bwekuŋe ane Juu tena la siwi ta, dɛ́ huɡa choh ta bela baa kpɔ berekese ma ŋwɛnɛ ó kaa nyundua, dɛ́ kaa Ijipt kooro koodem waa lɔ Tapanes la doonyoa.

¹⁰ Ásɛ dɛ berɛ ŋɔ ba be ŋɔ men Koranar Bwa Kooro, Israel tena aa dɛ tom mɛ ŋɔ, ‘Mɛɛ kpɔ n bonɔɔ Kooro Nebukadnesa waa ɛ Babelɔn kooroo ba bonɔ, dɛ́ ɡel ó kpɔ o kookara ba cheɡ bwekuŋe haa huɡa nɔ ta. Wɛɛ baŋre o tɛnte deaa ó do kɛŋɔ koodem.

¹¹ Wɛɛ ba yo Ijipt tenaa dɛ́ pɔ ba nɛ, ásɛ banɔ la weechɔɡa aa kpoo ba la serewe, banɔ la baa laɡ ba la, bá laɡ ba kaa, ásɛ banɔ la ɡe baa kpoo ba laa ta la, bá kpoo ba.

¹² Mɛɛ kpaa nii do Ijipt harɛ voɡare deene ta, ásɛ dɛ ɡel Babelɔn kooro fuh ba voɡare kɛɛ dɛ́ paa kaa. Gɛ peteɡre yon laa kpanjeɡa dɛɛ kpɔ o batakaare ta la, ɡɛɛ Babelɔn kooro ɛɛ ba doŋa laa kpɔ Ijipt harɛ ta, dɛ́ pɔ ba nɛɛ le bela kaa.

¹³ Wɛɛ kuuɡi bwea baa paaɡa dɛɛ duura Hɛleopɔles Ijipt harɛ ta laanee, dɛ́ fuh Ijipt voɡa deene ɡe bwa.’ ”