Jeremia 42 - mzwDBL

Nɛra la ŋɔ Jeremia soŋe Korowii tɛɛ ba

¹ Belaa laa nomonome la bwa, ne Karea bibaa Johanan ne Hosaya bibaa Jesania, dɛ nɛra baa kaa bwa, dɛ́ le bechale nɛɛ ba nomonjena bwa nɛ

² ba men Korowii keame Jeremia be dɛ ba ŋɔ, “Ya dɛ soŋe, no ya wesoŋa nɔ, dɛ́ soŋe Korowii yaa dɛ tomɔ nɔ tɛ ya nɛra yaa ka harɛ nɔ bwa ta nɔ. He ɡbabir nao kɛŋɔ dɛ ya fa warɔ, kɛ taraken te, ya nɛra tamaa kenii kaa.

³ Soŋe Korowii yaa dɛ tomɔ la, ó baɡle yaa bela yaa kaa ne ɡɛ yaa ɛ.”

⁴ Anee n chaŋe ŋɔ, “N noɔ, mɛɛ soŋe Korowii yaa dɛ tomɔ ɡɛ haa dɛ soŋe laanee, ásɛ wobɛlbwa waa bol n be la, ń bol he be. Maa wobɛlbwaa kpɔ sɔh heya.”

⁵ Belaa ba ŋɔ n be ja ŋɔ, “Korowii yaa dɛ tomɔ laanee dɛ́ ɛ yaa danseɛ dɛ́ di yaa kasinteŋ, dɛ ya ta waa waa kpɔa tɛɛ ŋɔ he ba bol ya be la ta teŋaa.

⁶ Dɛ a wer kɛɛ aa were kwaraa naa, yaa teŋɛ Korowii yaa dɛ tomɔ waa taa, o bee ya tomɛ la. Ya dɛ teŋɛ o waa bwa ta naa, ya wobɛlbwa ken ɛɛ won do wer tɛ yaa.”

Korowii no Jeremia wesoŋa

⁷ Tɔpera fi habɔɔ la, Korowii bol waa men Jeremia be ja.

⁸ Anomanta, n yerɛ Karea bibaa Johanan, ne laa nomonome bwa baa ja o nɛɛ la, dɛ nɛra baa jaa bwa,

⁹ dɛ ŋɔ ba be ŋɔ, “Waa Korowii Israel tena aa dɛ tomɔ, asɛ he tom mɛ ŋɔ ń ka soŋe he waa o be tɛ heya la ŋɔ,

¹⁰ ‘Dɛ hɛɛ so harɛ nɔ taa yaa, mɛɛ lawɛ heyaa ir maa wola ɡel he chole, dɛ́ kwaa du heya kɛŋɔ da, ásɛ he che kiŋkiŋ maa wola heyaa fuɡri kɛŋɔ dua, dɛkalkɛ wenaale maa kpɔa ba ta he nɛɛ la, ɡelɔ mɛɛ di suna kohona.

¹¹ He bɛ Babelɔn kooro haa dɛ ɔmɔ taraken nɔ ɔmɛ. Men Korowii ŋɔ he bɛ on ɔmɛ, dɛkalkɛ n ja he nɛɛ dɛ́ won lɛ heyaa le o nɔn ta.

¹² Mɛɛ dɔ tedomaa tɛ heya, ásɛ dɛ ɡel Babelɔn kooro ɡe dɔ tedoma he nɛ, dɛ́ berɛ ba he ne he harɛ ta ja. Men Korowiirii bola.’

¹³ Kɛ dɛ he ŋɔ, ‘Yaa harɛ nɔ taa so,’ dɛ vɛh waa Korowii haa dɛ tomɔ nɔ nɛɛ teŋa,

¹⁴ kɛɛ dɛ ŋɔ, ‘Akai, yaa kaalo ka so Ijipt harɛ ta, bela yaa wola laa ne bɛle sii kɛɛ lɔree na naa,’

¹⁵ amɔ hé no waa Koranar Bwa Kooro, Israel tena aa dɛ tomɔ la aa dɛ bol he Juda tena haa kaa la be. ‘Dɛ he siwi beɡre Ijipt harɛ ta kaala dɛ́ ka so bela aa,

¹⁶ amɔ laa haa dɛ ɔmɛ laanee dɛ́ ba he nɛ, lɔr haa dɛ ɔmɛ kohona la ɡe ɛɛ teŋɛ he nɛɛ kaa Ijipt harɛ ta, ásɛ he serewe bela.

¹⁷ Kasinteŋ, banɔ la bwa ba siwi aa beɡra kɛ bá kaa Ijipt harɛ ta la, laa ne lɔr dɛ weechɔɡaa dɛ́ kpoo ba. Beŋkpoŋ ɡba aa won chwa le wekpeɡa maa kpɔa dɛɛ ba ba nɛɛ la ta.’

¹⁸ Koranar Bwa Kooro, Israel tena aa dɛ tomɔ la ŋɔ, ‘Gɛ maa kpɔ n bandia kohona ba ta nɛra baa lɔ Jerusalam nɛɛ la, ɡɛɛ dɛ he kaa Ijipt harɛ ta naa, mɛɛ ba n bandia kpɔe ba ta he nɛ. Nɛra ɛɛ nao dɛɛ taah heya ba bambile teŋe, dɛɛ mamɛ heya. He siwi aa harɛ nɔ nae ba kpa.’ ”

¹⁹ N berɔ bol ba be ja ŋɔ, “Korowii ŋɔ he Juda tena haa kaa la be ŋɔ he bɛ Ijipt harɛ ta kaa. Anomanta, n dɛ kah heyaa fini ŋɔ,

²⁰ he kono kohona, a chɛ kɛ hé sewɛ. He ŋɔ n be ŋɔ ń soŋe Korowii yaa dɛ tomɔ ó nyiŋi he nɛ, dɛ baɡɛ nyoa ŋɔ hɛɛ teŋɛ waa waa do heyaa bwa taa.

²¹ Taraken, n bol he be, kɛ he vɛh waa Korowii aa tom mɛ n ba bol he be la bwa.

²² Anomanta, hé lii waa nɔ. Laa ne lɔr, dɛ weechɔɡaa dɛ́ kpoo heya, harɛ haa dɛ nyin he ka so o ta la ta.”