Jeremia 41 - mzwDBL

¹ Korobie anuanɛ ta la, Nɛtanea bibaa Ismael, waa ɛ koobie, dɛ berɛ ɛ kooro nomonome la bini bɛl la, o iro dɛ lawɛ baala fi ja o nɛɛ ba la Ahikam bibaa Gedalia be Mispa. Ismael nabaa sɔne Elisama. Kondikwaa dii saŋ aa tela, ba bwa pɛ so dɛɛ di kwaa la,

² belaa Ismael ne baala fi baa jaa la ir kpɔ keri dɛ kpo Gedalia, dɛ onee Babelɔn kooro le ŋɔ wɛɛ nyiŋi harɛ la ta.

³ Ismael berɔ kpoo Juu tena baa ja Gedalia nɛɛ Mispa, dɛ Babelɔn laa tena baa lɔ bela bwa.

⁴ Tɔ aa pera, mɔɔ bɛlbwa jemɛ Gedalia kpoe waa la,

⁵ dɛ baala fifraanuatoro fonɛ ba tampona dɛ kɛɛ ba laala, dɛ kpɔ keri mɔne ba bwara, a baɡle kɛŋɔ ba lɔ lwe ta, dɛ le bwɛɛre Sɛkem ne Silo dɛ Samaria ba. Dɛ ba kpoŋe mea ne daawiile a sɔɔh aa soma, dɛ́ kpɔ ba ɛ sarahare Korowii Dea.

⁶ Anomanta, Ismael leɔ dɛ kpɔ wii ka chem ba, asɛ dɛ ŋɔ ba be ŋɔ, “N poo heya, hé ba dɛ́ ba na Gedalia.”

⁷ Baa dena jo bwɛjen la bini la, Ismael ne baala baa ja o nɛɛ la kpoo ba bini fifraanuanɛ, dɛ paa ba ta kɔlɔŋ bɛl bini.

⁸ Ba bini fi soŋe Ismael ŋɔ, “Bɛ yaa kpoo! Ya dɔ mea ne ɔleve no dɛ tooh a sɔh kpɔɡ bini.” Anomanta, o ɡel ba.

⁹ Kɔlɔŋ la Ismael aa pa Gedalia ne nɛra waa kpoo ba ka ta o bini la, o ɛ Kooro Asa kɔlɔŋ waa kwiu ɡɛ saŋ Israel Kooro Baasa aa baa yoo laa. Nɛra waa kpoo ba la su kɔlɔŋ la.

¹⁰ Ismael lawɛ nɛra baa ka Mispa la bwa, kooro bihaahna ne banɔ la baa jaa dɛ ka bela. Dɛ Nebusaradan waa chɔ kooro laa tena baa dɛ daahno nyoa, le Ahikam bibaa Gedalia o chɔ ba nyoa. Waa laɡ ba la, o ɡale Jɔɔdan Moo dɛ kpɔ sie chaɡɛ Amɔn tena harɛ pera dɛɛ kaa bane.

¹¹ Karea bibaa Johanan ne laa nomonome la bwa baa ja o nɛɛ la no hiribiwaa Nɛtanea bibaa Ismael aa ɛa la.

¹² Anomanta, ba kpɔ ba laa tena bwa dɛ́ ka yo Ismael. Ba tiu dɛ ka lawɔ tamjen bɛl waa chɔ Gebeɔn jwɛh.

¹³ Nɛra Ismael aa laɡ ba dɛɛ kaa aa na Johanan ne o laa tena baa ba la, ba sie lɛo.

¹⁴ Ate, ba bwa berɛ chwa le o be, dɛ kaa Karea bibaa Johanan be.

¹⁵ Kɛ Ismael ne o baala la bini banuatoro chwao le Johanan be, dɛ kaa Amɔn tena be.

¹⁶ Ismael aa kpo Gedalia habɔɔ la, Johanan ne laa nomonome la bwa baa ja o nɛɛ la tɔ nɛra baa ka Mispa Ismael fe laɡ ba dɛɛ kaa la sie. Haahna ne laa tena, bechale dɛ koodem nomonome baa le Gebeɔn bwa.

¹⁷ Ismael ne o bala baa ja o nɛ valɔ dɛ ka onɛ bobɛl baa dɛ yerɔ Gerut Kimham, o bɛne Bɛtlɛham dɛ kaa Ijipt harɛ,

¹⁸ ɡɛ aa ɛ ásɛ ba won le Babelɔn tena nɔn ta. Dɛ ba dɛ ɔm ba, dɛkalkɛ Ismael kpo Gedalia la Babelɔn kooro aa leo wɛɛ nyiŋi harɛ la ta.