Jeremia 40 - mzwDBL

Ba le Jeremia dea

¹ Korowii bol waa men Jeremia be, ɡɛ saŋ Nebusaradan waa chɔ kooro laa tena baa dɛ daahno nyoa, aa lee mɛ dea baa do mɛ Rama la. Dɛ ba laɡ mɛ dɛ do mɛ jɔɡrɔre, dɛ kpɔ n ne Jerusalam dɛ Juda tena baa lawɛ yaa laa ta la kaa Babelɔn harɛ ta.

² Nebusaradan laɡ mɛ le bokɛre dɛ ŋɔ n be ŋɔ, “Korowii haa dɛ tomɔ la bolɔ ŋɔ wekpeɡa ɛɛ ba he harɛ nɔ taa,

³ asɛ taraken dɛ ɛ ɡɛ waa bola la. A ɡɛ waa nɔ bwa balɔ, dɛkalkɛ he ɛ nɛra wechɔɡa dɛ jo Korowii nɛ, dɛ vɛh o waa ta teŋa.

⁴ Kɛ fini, n laa jɔɡrɔre la dɛɛ foo he nɔɔra. Hɛɛ won teŋɛ n nɛɛ kaa Babelɔn ásɛ n nyiŋi he nɛ, dɛ haa nyin ɡe aa, he ɡel. Harɛɛ chɔa kaa la, hɛɛ won kaa bobɛlbwa haa dɛ nyin ka so.”

⁵ Mɔɔ men Jeremia aa berɛ n te ŋɔ ń kaa la, Nebusaradan berɛ ŋɔ, “Berɛ kaa Ahikam bibaa Gedalia o nabaa aa ɛ Safan be. Babelɔn kooro leo dɛ kpɔ Juda bwɛɛre do o nɔn ta wɛɛ nyiŋi a ta, ásɛ he ne ó ka so nɛra la bini, kɛɛ dɛ bobɛlbwa ɡee hɛɛ nyin aa, hɛɛ won ka so.” Asɛ Nebusaradan kpɔ kondikwaa ne koŋkɛɛla ane tɛ mɛ n kpɔ kaa.

⁶ Anomanta, n la Ahikam bibaa Gedalia be Mispa n ne nɛra baa ka harɛ la ta la ka so.

Gedalia kpoe wa

⁷ Juda laa nomonome la bwa ne ba laa tena baa peɡra dɛ do kpɔɡ bini la noɔ kɛŋɔ Babelɔn kooro le Ahikam bibaa Gedalia ɛ ba harɛ nomoa, wɛɛ nyiŋi bela harɛ la ta. O kpɔ baala ne haahna dɛ bechale baa nyaa, baa wola ba te lawɛ kaa bojaŋ harɛfale ta Babelɔn la,

⁸ ba bwa iro la Gedalia be Mispa. Banee Nɛtanea bibaa Ismael, ne Karea bibaala Johanan ne Jonatan, ne Tanhumet bibaa Seraya, ne Efai bibaala baa le Nɛtɔfa, ne Jaasania waa ɛ Maaka te, dɛ baala baa ja ba nɛɛ bwa.

⁹ Belaa Gedalia ŋwɛɛ ntam baɡ ba ŋɔ, “Hɛɛ berɛ Babelɔn tena nɔ ɔma, hé so bonɔ dɛɛ tomɛ Babelɔn kooro, aa chiɡ heyaa kɛrɛdɛɛ.

¹⁰ N ɡbabir dɛ ba Mispa soɡa dɛ́ che he naa ta, Babelɔn tena baa dɛɛ ba ya be la sie. Kɛ a chɛ kɛ he boa sen ne daa nɔna ne ɔleve noo nyoa cheɡ, dɛ́ ka so bwɛɛre haa dɛ ba ba so a ta la ta.”

¹¹ Juu tena bwa baa lɔ Moab ne Amɔn ne Edom, dɛ harɛre aa jaa nɛra aa noa kɛ Babelɔn kooro ɡel nɛra bane Juda harɛ, dɛ le Ahikam bibaa Gedalia, o nabaa aa ɛ Safan wɛɛ nyiŋi ba nɛɛ la,

¹² ba bwa berɔ le bwɛɛre baa peɡra ka so a ta, dɛ ba Juda harɛ ta. Ba ba Gedalia be Mispa, asɛ ba boa sen ne daa nɔna nyoa a warɛ kohona.

¹³ Karea bibaa Johanan ne laa nomonome baa peɡra ka do kpɔɡ bini la bwa ba Gedalia be Mispa,

¹⁴ dɛ ba ŋɔ o be ŋɔ, “Haa jemɛ kɛŋɔ Amɔn Kooro Baalis tomɛ Nɛtanea bibaa Ismael ŋɔ ó ba kpoe naa?” Kɛ Gedalia ta waa la yaradae.

¹⁵ Belaa Karea bibaa Johanan sɔh ka ŋɔ Gedalia be Mispa ŋɔ, “Tɛ mɛ ŋwɛnɛ n sɔh ka kpo Nɛtanea bibaa Ismael, nomɛlbwa aa wola na. Ɛrɛɛ chɛ kɛ o kpoe asɛ Juu tena baa ja he nɛɛ bonɔ nɔ lɔ peɡre dɛ kpɔ sibeɡra ba ta nɛra baa kaa dɛ ta so bela nɛɛ nɔɔ?”

¹⁶ Anee Gedalia chaŋe Johanan ŋɔ, “Bɛ ɡɛ waa nɔ ɛ! Ismael waa haa bola nɔ ta kasinteŋ ɛɛ!”