Jeremia 4 - mzwDBL

Korowii ŋɔ Israel tena charɛ ba liire

¹ Korowii ŋɔ, “Israel tena, dɛ hɛɛ berɔɔ waa, hé berɛ ba n be. Dɛ hɛɛ laa voɡare maa kia laanee kpɔ n sie dɛ bɛ n habɔɔ le,

² dɛ́ kpɔ kasinteŋ ŋwɛnɛ ne waa aa toɡra ta ŋwɛɛ n sɔn ta naa, amɔ mɛɛ swee andɛɛɡaa tɛ harɛre nɛra bwa ásɛ ba kpɛɛ mɛ.”

³ Kenii Korowii bol Juda ne Jerusalam tena be, “Hé pwɛr he bambili kɛŋɔ paa yon buɡli harɛfale mɔɔ dɛ́ du kwaa la, dɛ bɛ kondwee kpɔ du sɔɔhne baah.

⁴ Hɛɛ teŋɛ fɔo he ne men Korowii haa dɛ tom mɛ aa fɔwa la ta, dɛ́ kpɔ he te bwa tɛ mɛ, he Juda ne Jerusalam tena bwa. Gɛ laa aa, n baah ɛɛ diu kohona, he wechɔɡa haa ɛa la wa, ásɛ nomɛlbwa aa won sɔɔh o nyoa.

Wenaale aa le weekaŋle nyunduabɔr

⁵ Hé bola Juda ne Jerusalam tena be ŋɔ, ‘Hé hoh bɛla harɛ la bwa ta.’ Hé do lɔŋɔ kohona ŋɔ, ‘Hé boa nyoa. Hé ɡel ya chwa kaa bwɛjena baa ma danjwɛkpeɡa bara la ta.’

⁶ Hé ir fraŋkaa chaɡɛ Saayɔn. He bɛ hɛlɛ, hé chwa dɛ́ lɛ he nyu. N kpɔ wenaale le weekaŋle nyunduabɔr dɛɛ ba, chɔɡa tenten nee mɛɛ ba he nɛ.”

⁷ Gɛ nyujente yon le o sɔɔhbɔr dɛɛ ba la, ɡɛɛ nɛn waa dɛ chɔɡ harɛre kpɔ o te dɛ le dɛɛ ba. O le bela waa lole, dɛ́ ba chɔɡ he harɛ. He bwɛjena ɛɛ berɛ dimɡbiaa, nɛra aa wola a taa so.

⁸ Hé kpɔ lweyale tɔ, dɛ́ wi dɛ́ɛ dooɡe lɔŋɔre, dɛkalkɛ Korowii bandia kohona la ta ya nɛɛ leɛ.

⁹ Korowii ŋɔ, “Awola tɔpere la, kooro ne nomonome bwa bambile ɛɛ teŋoo, sɔfore nyoa kpo kohona, ásɛ bɔyɔra kohona chole n keamere nɛ.”

¹⁰ Anee men Jeremia ŋɔ, “Nemenɛ Korowii, he neɡre Jerusalam tena kohona. He ŋɔ baa dɔ deŋnesɔɔhnaa. Na ɡɛ kere aa jaɡɛ ba baŋa baa ba ba kpoora.”

¹¹ Gɛ saŋ baa ŋɔ Jerusalam tena bee ŋɔ, peuwɔb bɛl tao le bwejena dor pua hɛŋle ɡbo harɛ ta, dɛ́ ba ta Jerusalam tena nɛ, kɛ peu waa do kɛ bá kpɔ palɛ kwaa laa.

¹² Peu waa kpeɡa kohona dɛ́ le Korowii be ba laanee. O dɛ́ ba ba waa bola dɛ́ pa bole name.

¹³ Korowii ŋɔ, “Hé na, dɔm la dɛ ba kɛŋɔ baama ken, kwaa aa do kɛŋɔ torɔɡore ɡee ba kɛŋɔ kawulewule, o jaɡre ɡbaŋre ɡwaa kɔle.” Nɛra la ŋɔ, “Ya bwɛɛlɛ, ya bwa serewɔ!”

¹⁴ Jerusalam tena, hé ɡel wechɔɡa ɛɛ ásɛ Korowii lɛ heya. Saŋ besoo hɛɛ ba he nyubinikpeɡ vɔrɔwa nɔ ɡela ɔ?

¹⁵ Taa bɛl le Dan dea harɛ waa lɔ weekaŋle nyundua, dɛɛ baɡle wenaale aa le Efrem harɛ deŋɡarere dor wa.

¹⁶ Taa la ŋɔ, “Ŋɔ ɡɛ waa nɔ harɛre nɛra be, dɛ́ bola Jerusalam ɡe be ŋɔ, ‘Laa tena baa wara le bojaŋ harɛ ta dɛɛ ba, dɛɛ dooɡe laa lɔŋɔre dɛ́ ba yo Juda harɛ bwɛjena.

¹⁷ Ba cheɡɔ bar Jerusalam kɛŋɔ baala aa dɛ daah koo, dɛkalkɛ o nɛra ɛɛ mɛ deŋnekpeɡ. Men Korowiirii bola.’

¹⁸ Juda tena, he we-ɛɛla ne he liiree ɡela anɔ bwa ba he nɛ. Deŋnetɛra aa chɛ heyaa laanee. A dɛ we kɛrɛdɛ. Na ɡɛ aa jo he bini.”

¹⁹ Anee Jeremia ŋɔ, “N weweele kan, a kan kohona to! N bwara bwaa dɛɛ wee mɛ mɛɛ beɡre n te. N loo kuu, n bambile ɛɛ lɔ kohona! Maa won tɔ nyoa, dɛkalkɛ n no bɛla sii, dɛ no laa lɔŋɔre.

²⁰ Wekpeɡa ane balaa, dɛ ane teŋɔ, harɛ la bwa berɛ dimɡbia. Kerabeŋkpoŋ dɛ n tɛnte deene maa soɡe a ta bwa chɔɡɔ.

²¹ Saŋ besoo laa fraŋkaare, ne bɛle hoeh nɔ ɛɛ ba ɡela ɔ?”

²² Korowii ŋɔ, “N nɛra ɡɛnɔ, baa men jemɛ. Ba ɛ bechale baa wola liire dɔe, baa waa mun no. Ba dɔ wejema bá kpɔ ɛ wechɔɡa kɛrɛdɛ, kɛ baa wedɛɛɡa ɛɛ te jemɛ.”

²³ N nyiŋi harɛ nɔ dɛ o ta mar dɔe, komɛlbwa toole o ta, asɛ nyundua ɡe, kwaa aa dɛ chaah bɔr toole.

²⁴ N berɔ nyiŋi bwejena dɛ a dɛ jiɡri, asɛ deŋɡarere bwa ɡe ɛɛ yiiɡi.

²⁵ N berɔ nyiŋi n ta nomɛlbwa nae, jumbii bwa ɡe ir kaa.

²⁶ N nyiŋo, dɛ harɛpare ondɛɛɡe la berɛ pua hɛŋle ɡbo harɛ, o bwɛjena bwa berɛ dimɡbia, Korowii bandia kohona la wa.

²⁷ Waa Korowii aa dɛ bol laanee nɔ, “Harɛ la bwa dɛ́ ba dimɡbia bera, kɛ maa den chɔɡ o bwa kwaraa.

²⁸ Gɛ nomanta, harɛ la ta nɛra ɛɛ wiu ásɛ nyundua bwa bir, dɛkalkɛ menee bola maa nsana le. N dɔɔ kpɔ a liire, maa habɔɔ le.”

²⁹ Nɛra baa soɡe jaɡre ta, ne banɔ la baa kpoŋe tori ɡbɔɡa ɡelɔ nɛra bwa chwa kaa. Bane chwao ka sɔh kɔne bini, bane chwa ka teeh bwea. Bwɛɛre la bwa chɔ pɛɛ, nɛra toole a bini.

³⁰ Jerusalam, he harɛ bwa chɔɡɔ, he do kɛ hanjwamane dɛ do tol-laala, dɛ kpɔ suuɡaswɛm baŋa kwaa ne deŋna kwaa do. Bɔkwaa dɔ kwaa kpɔe ɛ he siebɔr dɛ́ di toli ɔ? He kpɔ kondɛɛɡa dɛɛ kwaa he te pɛɛpɛɛ, he sɛnanar bwa vɛɛh hale dɛɛ nyini dɛ́ kpo.

³¹ N dɛ no lɔŋɔ kɛ haah loltea aa lɔɔ, wɛɛ eeh dɛɛ lolɛ o biloɡle. A kaa ɛ kɛŋɔ Jerusalamee do kɛŋɔ haah waa dɛ wi o hweera pi, dɛɛ tɛɡre nɔɔra ŋɔ, “Akwe, n na wa, ba dɛ ba dɛ́ ba kpo mɛ.”