Jeremia 38 - mzwDBL

Ba lawɛ Jeremia ta kɔlɔŋ bini

¹ Dɛ Matan bibaa Sɛfatea ne Pasur bibaa Gedalia ne Sɛlɛmia bibaa Jehukal dɛ Malkija bibaa Pasur dɛ no waa men Jeremia yon bol dɛɛ baɡle nɛra dɛɛ ŋɔ,

² “Waa Korowii aa dɛ bol laanee nɔ. Nomɛlbwa waa so bwɛjen Jerusalam ta la, laa kɛɛ lɔr kɛɛ weechɔɡaa dɛɛ ba o kpoe. Kɛ banɔ la baa kpɔ ba te ka do Babelɔn tena lɔɡa la ɛɛ dɔ ba nyuu, baa wola sewɛ.”

³ Korowii berɔ bol ŋɔ, “N dɛ ba bwɛjen nɔ nɛra kpɔe do Babelɔn Kooro ne o laa tena nɔn ta, ásɛ ba yoo ba, dɛ́ pɔ ba nɛ.”

⁴ Belaa nomonome la ŋɔ Kooro Sedekia be ŋɔ, “Baa nɔ chɛ kpoe. O dɛ chɔɡ laa tena baa ka bwɛjen nɔ ta, ne nɛra la bwa liire o wobol ne. Ba kɛrɛdɛ laa wɛɛ nyin, ka ja ba chɔɡa ta.”

⁵ Anee Kooro Sedekia chaŋe ŋɔ, “N kpɔɔ do he nɔn ta. Maa won tɔe ŋwɛnɛ.”

⁶ Anomanta, ba lawɛ men Jeremia dɛ kpɔ mɛ ta kooro bibaa Malkija kɔlɔŋ bini. Dɛ o lɔ kooro dembaah bela nɛra la aa dɛ daah la. Ŋwɛɛraa ba kpɔ vɔɡ mɛ dɛ kpɔ mɛ tu kɔlɔŋ la bini. Dɛ nee toole o bini, kpechɛɡre ɡboo, asɛ n ka jo a ta.

⁷ Kɛ Itiopia te Ɛbɛd Mɛlɛk, o ɡe aa ɛ nomoa dɛ do koodem bela noɔ kɛ ba laɡ mɛ ta kɔlɔŋ bini. Gɛ saŋ dɛ kooro soɡe Bɛnjamen Doonyoa la ta,

⁸ anomanta, Ɛbɛd Mɛlɛk iro la o be dɛ ka ŋɔ,

⁹ “N naa kooro, nyubinikpeɡ waa baala nɔ ɛ Korowii keame Jeremia la. Ba lawɔ ka ta kɔlɔŋ bini bela lɔr aa dɛ ba o kpoe ó sewɛ, dɛkalkɛ bwɛjen nɔ kwaraa ta la, kondikwaa toole kpa.”

¹⁰ Belaa kooro do Ɛbɛd Mɛlɛk ŋɔ ó kpɔ baala fifraatoro ja o nɛ, ásɛ dɛ tɛr mɛ le kɔlɔŋ la bini ásɛ n bɛ sewɛ.

¹¹ Anomanta, Ɛbɛd Mɛlɛk lawɛ baala la ja o nɛ, asɛ ba la dea bɛl baa dɛ cheɡ laala a yoɡ aa kpeɡa o bini koodem bela la lɔɡa. O pa yakwane ne laala ane aa kɛɛra le bela asɛ dɛ vɔrɔwa, dɛ ta ŋwɛɛra la do n be kɔlɔŋ la bini.

¹² Belaa Ɛbɛd Mɛlɛk ŋɔ n be ŋɔ, “Lawɛ yakwane la ne laala aa kɛɛra la do he luɡbɔɔne ásɛ ŋwɛɛra haa kpɔ vɔwɛ a ta la bɛ hen bola ba do.” N ɛ ɡɛ,

¹³ asɛ ba tɛr mɛ le kɔlɔŋ la bini ŋwɛɛra la ne. Asɛ n den ka do dembaah bela nɛra la aa dɛ daah la.

Kooro Sedekia bɔɔ Jeremia waa ja

¹⁴ Ate, Kooro Sedekia tomɛ ŋɔ bá ka yerɛ men Jeremia ba doonyotooro te waa lɔ Korowii Dea bela la ta, asɛ dɛ ŋɔ n be ŋɔ, “N dɛ ba hen waane bɔɔra, kɛ na kɛŋɔ haa wobɛlbwaa kpɔ sɔɔh mɛ.”

¹⁵ Asɛ men Jeremia chaŋe Kooro Sedekia ŋɔ, “N naa kooro, dɛ n bol kasinteŋ la he be naa, hɛɛ kpo mɛɛ. Hale dɛ n ŋɔ mɛɛ jae kwaraa ɡe aa, haa n bee no.”

¹⁶ Anomanta, Kooro Sedekia sɔɔh dɛ ŋwɛɛ baɡ mɛ ŋɔ, “Korowii waa lole saŋ bɛlbwa dɛɛ tɛ yaa mkpa nɔ, maa hen kpo kɛɛ dɛ́ lawɛ do nɛra baa dɛ nyini dɛ́ kpo nɔn ta.”

¹⁷ Belaa n ŋɔ Kooro Sedekia be ŋɔ, “Korowii Waa Ɛ Koranar Bwa Kooro, Israel tena aa dɛ tomɔ la ŋɔ, ‘Dɛ he kpɔ he te do Babelɔn kooro nomonome lɔɡa aa, baa hen kpo, ásɛ dɛ ɡel bwɛjen nɔ ɡe fuih, he ne he lolanar bwa ɡe dɔ he nyu.

¹⁸ Kɛ dɛ he ta he te kpɔe ka do Babelɔn kooro nomonome lɔɡa aa, bwɛjen nɔ ɛɛ ka do Babelɔn tena nɔn taa ásɛ ba fuuh, he ɡbabir kwara aa he nyuu dɔ.’ ”

¹⁹ Asɛ Kooro Sedekia ŋɔ men Jeremia be ŋɔ, “N dɛ ɔmɛ Juu tena baa kpɔ ba te ka ja Babelɔn tena bini la, dɛkalkɛ Babelɔn tena la ken ɛɛ lee mɛɛ tɛɛ ba, ásɛ ba fiɡ mɛ.”

²⁰ Anee men Jeremia chaŋe ŋɔ, “Baa he lee ba dɛ tɛɛ ba. He te ɛɛ teŋɛ waa Korowii aa bola la ta, ásɛ wobɛlbwa kaa kɛrɛdɛ tɛɛ, he dɔ he nyu.

²¹ Kɛ dɛ he ta sɛɛh dɛ kpɔ he te do Babelɔn kooro lɔɡa aa, waa Korowii aa pili a bini baɡ mɛ laanee kɛŋɔ,

²² haahna la bwa baa kaa dɛ do Juda kooro dem bela la, baa laɡ baa le bela ka tɛ Babelɔn kooro nomonome. A ɡɛ haahna la ɛɛ bol he bee ŋɔ, ‘Kooro daamanar tenten neɡro, ba waa tɔɔɡe o waa ta. Taraken o nakpale aa morɛ kpechɛɡre ta nɔ, o daamanar chwao ɡelo.’ ”

²³ Asɛ men Jeremia berɛ ŋɔ, “Baa lawɛ haahna ne ba bii bwaa ka tɛ Babelɔn tena. He ɡbabir ɡe aa a nyoa lee ba. Babelɔn kooro ɛɛ lawɛ hen kooro laa taa kaa bojaŋ harɛfale ta, ásɛ ba fuh bwɛjen nɔ bwa dɛɛboo ken.”

²⁴ Belaa Kooro Sedekia chaŋ mɛ ŋɔ, “Bɛ ɡel nomɛlbwa no waa yaa bola nɔ, ɡɛ la aa, hɛɛ sewɔɔ.

²⁵ Nomonome la noɔ kɛŋɔ n ne he bol waane aa, baa bao dɛ ba bɔɔre waa haa bol kooro be, ne waa waa bol he be. Baa baɡɛ nyoa ŋɔ dɛ hɛɛ bol kasinteŋii yaa, baa hen kpo.

²⁶ Den ŋɔ ba be ŋɔ dɛ he dɛ soŋ mɛ ŋɔ n bɛ hen lawɛ ka do dea Jonatan dem ásɛ he sewɛ bela.”

²⁷ Ate, nomonome la bwa ba n be dɛ ba bɔɔ mɛ wa, asɛ n bol wobɛlbwa kooro aa do mɛ ŋɔ ń bol ba be la. Anomanta, ba ta wone ɛ wobɛlbwa kpa, dɛkalkɛ ba bini bɛlbwa ta waa n ne kooro aa bola la noɛ.

²⁸ Anomanta, ba laɡ mɛ do dea n do koodem dembaah bela ka tel tɔpere Babelɔn laa tena aa baa yo Jerusalam tena dɛ pɔ ba nɛ.