Jeremia 37 - mzwDBL

Jeremia lawa dɛ́ do dea

¹ Babelɔn Kooro Nebukadnesa lawɛ Josia bibaa Sedekia so kora ta Juda harɛ ta chiɡ Jehoiakim bibaa Jehoiachin naa ta.

² Kɛ o ne o nomonome ne harɛ la ta nɛra bini bɛlbwa ta deŋne cheɡɛ, dɛ no waa Korowii aa cheɡɛ men Jeremia nɛɛ dɛ bol ba be la.

³ Belaa Kooro Sedekia tomɛ Sɛlɛmia bibaa Jehukal, ne Maaseya bibaa sɔfo Sefania ŋɔ ń che ba naa ta soŋe Korowii yaa dɛ tomɔ la tɛ ya harɛ nɛra.

⁴ Dɛ ba ta men Jeremia lawɛ do dea mɔɔ, asɛ n do nɛra la baah dɛɛ valɛ.

⁵ Babelɔn laa tena yon ba bar Jerusalam cheme dɛɛ yoo ba, kɛ baa noa kɛŋɔ Ijipt kooro laa tena le Ijipt harɛ ta dɛɛ ba la, ba laa berɛ kaa.

⁶ Belaa Korowii Israel tena aa dɛ tomɔ la bol waa n be ŋɔ,

⁷ ń bol Juda Kooro Sedekia be ŋɔ, “Ijipt laa tena lɔ ŋwɛnɛ ta dɛɛ ba bá cha heya, kɛ baa berɔɔ kaa ba harɛ ta.

⁸ Ásɛ Babelɔn laa tena la berɛ ba ja dɛ́ ba yo bwɛjen nɔ nɛra dɛ́ pɔ ba nɛ, ásɛ dɛ fuh o bwa ja.

⁹ Men Korowii ŋɔ hɛ́ɛ berɛ he te neɡra dɛɛ lii kɛŋɔ Babelɔn tena ɛɛ ɡel heyaa. Baa ɡɛɛ ɛ!

¹⁰ Hale dɛ he wono pɔ Babelɔn laa tena bwa nɛ, asɛ a ka banɔ la baa do ba bola ɡbo ba chɔ ba tɛnte deene bini kwaraa naa, baa iruu le dɛ́ ba fuh bwɛjen nɔ bwa.”

¹¹ Babelɔn laa tena berɔ le Jerusalam kaa, dɛkalkɛ Ijipt kooro laa tena dɛ ba.

¹² Ate, men Jeremia pa mun le bwɛjen Jerusalam ta dɛ́ kaa Bɛnjamen dea harɛ ta, dɛ́ ka lɛ n bɔr maa dɔ le n lolanar harɛ ta.

¹³ Kɛ maa tel Bɛnjamen Doonyoa ta la, nomoa waa chɔ nɛra baa dɛ daah bela nyoa baa yerɔ Irija, o mɛɛ Sɛlɛmia, o nabaa ɡe sɔne Hanania, laɡ mɛ dɛ ŋɔ n be ŋɔ, “He chwao dɛɛ kaa Babelɔn tena be.”

¹⁴ Anee n chaŋe ŋɔ, “Gɛ laa a do! Chwae laa n chwa dɛɛ kaa Babelɔn tena be.” Ane a bwa, Irija ta n be noɛ, o laɡ mɛ dɛ kpɔ mɛ kaa nomonome la be.

¹⁵ Ba baah di n nɛɛ kɛrɛdɛ dɛ ŋɔ bá lɔɔ mɛ, dɛ kpɔ mɛ ka do koodem karake Jonatan dea. Dɛ ba beɡre o dea la dɛ lawɛ nɛra dɛɛ do o bini.

¹⁶ Anomanta, ba laɡ mɛ do dea bɛl baa kwiu bɔɔ, biro tenten do o bini, asɛ n do bela biɡri.

¹⁷ A habɔɔ la, Kooro Sedekia tomɔ ba ba yer mɛ ba o be koodem. Asɛ o bɔɔ mɛ bokɛre ŋɔ, “Waane lole dɛ le Korowii be tɛ yaa kɛɛ?” Anee n chaŋe ŋɔ, “Waane lole, baa lawɛɛ tɛ Babelɔn kooro.”

¹⁸ Belaa n bɔɔ Kooro Sedekia ŋɔ, “Wechɔɡa besoo n ɛ he ne he nomonome ne nɛra nɔ, asɛ he laɡ mɛ do dea nɔɔ?

¹⁹ He keamere baa ŋɔa ŋɔ Babelɔn kooro aa he harɛ nɔɔ ba yo la bɔkwa waa puu baɔ?

²⁰ Taraken n naa kooro, cheɡ deŋne dɛ́ no waa maa dɛ ba he bɔɔra nɔ dɛ́ ɛ tɛ mɛ. N dɛ soŋe kɛ he bɛ men kpɔ ka do dea Jonatan dem bela kpa. He ɛ ɡɛ naa, sewaa chɛ kɛ n den sewɛ.”

²¹ Anomanta, Kooro Sedekia ɡelɔ ba do mɛ dea o dembaah bela. N lɔ bela, asɛ tɔpere bɛlbwa nɛra baa dɛ wɔɔ paanoo ɛɛ tɛ mɛ paanoo beŋkpoŋ, ka tel kɛŋɔ paanoo aa baa tonɛ bwɛjen la bwa ta.