Jeremia 33 - mzwDBL

Nyobaɡa hwɛɡa ane dɔe waa ja

¹ Baa lawɛ men Jeremia do dea n ta do dembaah bela baa dɛ daah la, Korowii berɔ bol waa n be nɛɛtena ja ŋɔ,

² “Menee Korowii maa ta harɛ nɔ dɛ kwaaro cheɡ o chɔŋɛ kwaa ta dɛ do le. N sɔnee Korowii,

³ Yer mɛ, ásɛ n chaŋe, ásɛ dɛ baɡle wejena ne waa aa sɔah haa wola an jemɛ.

⁴ Jerusalam deene ne Juda koodem bwa ɛɛ kuuɡuu, dɛ́ le nɛra baa baa chɔ baro dɛ yoo la wa.

⁵ Ba ne Babelɔn tena ɛɛ yo laalee, ásɛ ba deene su nɛra n baah aa dia n kpoo ba la. Nɛra baa lɔ bwɛjen nɔ ta wechɔɡa nomanta, n berɛ n habɔɔ kpo ba.

⁶ Kɛ bwɛjen nɔ nɛra te, mɛɛ berɔ ɡel bá dɔ bokpeɡa, dɛ́ ɡel ba dɔ deŋnesɔɔhna ne bosɔɔhna ɡe kohona.

⁷ N dɛ ba ɡela Juda ne Israel tena wobɛlbwa do wer tɛɛ ba, dɛ́ berɛ ɡel bá do kpeɡri ɡɛ ba fa aa doa wubwa la.

⁸ Mɛɛ fee ba wechɔɡa baa ɛa dɛ jo n nɛɛ la bwaa, dɛ́ laa bolchɔɡe baa dia la kpɔ ba nɛ.

⁹ Ásɛ a che bwɛjen Jerusalam nɛra nɛ n dɔ silɛɛ ne jirima dɛ duure, ásɛ harɛre nɛra bwa ɔmɛ dɛɛ chel, wedɛɛɡa maa ɛa tɛ Jerusalam tena, ne ɡɛ maa ɡela ba wobɛlbwa do wer tɛɛ ba la wa.”

¹⁰ Korowii ŋɔ, “Nɛra dɛ bol ŋɔ bonɔ do kɛŋɔ pua hɛŋle ɡbo harɛ, nɛra kɛɛ kondɛɛra toole o ta. Kpelaa ba ŋɔ. Juda harɛ bwɛɛre ne Jerusalam fɔɡbaahna bwa chɔ pɛɛ, nɛra kɛɛ kondɛɛra toole bela. Kɛ hɛɛ berɔɔ baa no,

¹¹ silɛɛ ne hɛɡra lɔŋɔre dɛ hanfalwaa mune ɡbɔɡa. Hɛɛ noo nɛra ɡo yela dɛ́ kpɔ jam sarahare dɛɛ ba n Dea, dɛɛ ŋɔ, ‘Hé kpɔ jam tɛ Koranar Bwa Kooro! O waa wer, o nyina waa dɛ nyin yaa lole saŋ bɛlbwa dɛɛ la.’ Mɛɛ ɡeloo harɛ nɔ berɛ do wer ɡɛ o fa aa doa wubwa la. Men Korowiirii bola.”

¹² Koranar Bwa Kooro ŋɔ, “Harɛ nɔ waa do kɛŋɔ pua hɛŋle ɡbo harɛ nɛra kɛɛ kondɛɛra aa wola toole o ta nɔ, saŋ bɛl ɛɛ bao ásɛ peteɡra dɔ dibɔra tɛ ba peera a kaa di.

¹³ Deŋɡarere bwɛɛre ne bwejena lɔɡre bwɛɛre, ne Nɛɡɛv bwɛɛre aa lɔ Bɛnjamen dea harɛ ta, ne bwɛɛre aa bar Jerusalam, dɛ Juda harɛ bwɛɛre bwa ta la, peteɡra ɛɛ won dɔ bɔr dɛɛ kure ba peera. Men Korowiirii bola.

¹⁴ Tɔpera ane dɛ ba ásɛ waa maa baɡɛ Israel ne Juda tena nyoa la ɛ ɡɛ.

¹⁵ A ɡɛ tɔpera la, mɛɛ ɡeloo Kooro Devid naanar bini nɛn o wa aa toɡra ir, dɛ́ kpɔ waa aa toɡra ne kasinteŋ ba harɛ la ta.

¹⁶ A ɡɛ saŋ la, mɛɛ lɛ Juda ne Jerusalam nɛra bwaa, ásɛ ba so deŋnesɔɔhna ta. Ásɛ baa yerɛ bwɛjen Jerusalam ‘Korowii Waa ɛ Ya Lɛɛ.’ ”

¹⁷ Anomanta, kenii Korowii ɛɛ bol, “Kooro Devid naa ɛɛ do le saŋ bɛlbwaa dɛɛ di kora Israel harɛ,

¹⁸ ásɛ sɔfore le Lewi dea dɛɛ tom mɛ n Dea saŋ bɛlbwa, dɛɛ fuh sarahare ne mea sarahare, dɛ́ kpɔ kwaa baa kpoora ɡe baa tɛ mɛ.”

¹⁹ Korowii bol waa men Jeremia be ŋɔ,

²⁰ “Gɛ haa wola won chɔɡ fɔo waa chɔ n ne webaŋa ne jwaana baah, ásɛ webaŋa ne jwaana aa won ɛ toma a saŋ ta la,

²¹ ɡɛɛ haa wola won chɔɡ fɔo n ne n bonɔɔ Devid aa fɔwa o do le la. O naa ɛɛ di koraa saŋ bɛlbwaa dɛɛ la. Gɛ tentenee n ne n sɔfore baa le Lewi dea ɡe fɔwɛ fɔo kɛŋɔ baa dɛɛ tom mɛ saŋ bɛlbwa, a ɡɛ fɔo la aa wola won chɔɡ bwa.

²² Mɛɛ ɡeloo n bonɔɔ Devid naanar, ne Lewi dea tena baa ɛ n Dea sɔfore mun ya kohona, ásɛ ba bɛ won kur ba, kɛŋɔ baa wola won kure weweela kɛɛ mpo nyoa hɛŋle la.”

²³ Korowii berɔ bol waa men Jeremia be ŋɔ,

²⁴ “He ta noɛ kɛŋɔ nɛra nɔ aa dɛ bol ŋɔ, men Korowii vɛh Israel ne Juda tena maa lee ba tɛ n te la aa? Ba hah n nɛra, dɛɛ nyiŋi ba nyubaahna, baa wola ban komɛl yerɛ, dɛɛ lii ba harɛfale bɛl nɛra.

²⁵ Kɛ men Korowii fɔo chɔ n ne webaŋa ne jwaana baah, dɛ do mmarare tɛ nyundua ne harɛ bwa.

²⁶ Gɛ maa ɛa nɔ nomanta, mɛɛ ɡeloo n ne Jekɔb naanar ne n bonɔɔ Devid fɔo yaa fɔwa la do le. Mɛɛ le Devid naanar la bini bɛlee ó ba nyiŋi Abraham ne Aesek dɛ Jekɔb naanar nɛ. Mɛɛ dɔ tedomaa tɛ n nɛra, dɛ́ ɡel ba wobɛlbwa berɛ do wer tɛɛ ba ja.”